ఎన్నికల వాగ్ధానాలు ...

  

 పార్టీలు ఎన్నికల ముందు  ఎన్నో హామీలను ఇస్తాయి . 

 ఉదా..కేంద్రంలో గెలిచిన  వాళ్ళు.. నల్లడబ్బును తిరిగి తెస్తామని, అవినీతిని అరికడతామని, నదులను మురుగు నుండి ప్రక్షాళన చేస్తామని, ధరలను తగ్గిస్తామని ....ఎన్నో వాగ్ధానాలతో ఎన్నికలలో గెలుపొందారు. 

అయితే, ఇచ్చిన  హామీలు  నత్తనడక  నడుస్తున్నాయి.
.................................. 

గంగానది నుండి మురుగును తొలగించాలంటే , ఎన్నో పరిశ్రమల నుండి గంగలోకి వదులుతున్న వ్యర్ధాలను కట్టడి చేసే చర్యలను వేగవంతం చేయాలి.
.....................

ఇక, బుల్లెట్ ట్రైన్లు.. .అంటూ చెబుతున్నారు. బుల్లెట్ ట్రైన్ల సంగతి అలా ఉంచితే,  దేశంలోని రైళ్ల పరిస్థితి అందరికీ తెలిసిందే.

 చాలా  లెవెల్ క్రాసింగుల వద్ద గేట్లు  లేక యాక్సిడెంట్స్  జరిగాయి . అలా జరగకుండా చూడాలి . 

ఇక రైల్వేస్టేషన్ల వద్ద  ట్రాక్ ల వద్ద చూస్తే మలమూత్రాలతో అసహ్యంగా ఉంటాయి. మలమూత్రాలు   ట్రాక్స్ పైన పడకుండా  రైళ్ళలో  సరికొత్త   టాయ్ లెట్స్ ఏర్పాటు చేస్తామని ఎప్పటినుంచో చెబుతున్నారు. 


అవన్నీ ఆచరణలోకి వచ్చేటప్పటికి  ఎంతకాలం పడుతుందో  ?  సాధారణ  రైళ్ళ విషయంలో  పరిస్థితి  బాగుపడితే,  అప్పుడు  బుల్లెట్ ట్రైన్లు   వచ్చినా   బాగుంటుంది . 
..................

ఇక స్వచ్చభారత్ అంటూన్నారు  కానీ,  స్వచ్చభారత్ కు అవసరమైన ఏర్పాట్లేవీ ? 
ప్రతివీధికి రెండు, మూడురకాల చెత్తడబ్బాలను ఏర్పాటు చేయాలి. వంటింటి చెత్త,  ప్లాస్టిక్ వేస్ట్, ఎలెక్ట్రానిక్ వేస్ట్..ఇలా దేనికది విడిగా పారవేయటానికి చెత్తబుట్టలను ఏర్పాటుచేయాలి. 

 తగినంతమంది  పారిశుధ్య కార్మికులను  నియమించి  వారికి జబ్బులు రాకుండా  మాస్కులను,  గ్లవుసులను  ఇచ్చి  నియమించాలి. ఇవేమీ ఏర్పాటు చేయకుండా  స్వచ్చభారత్ ఎలా సాధ్యం ?

స్వచ్చభారత్ అనే పిలుపు వల్ల మాత్రం ప్రజలలో ఎంతోకొంత మార్పు వచ్చింది. అయితే, ప్రభుత్వాలు ప్రకటించే చక్కటి పధకాలు ఆచరణలో సరిగ్గా అమలుజరిగేలా అధికారులూ,  ప్రజలూ కూడా సహకరిస్తేనే    చక్కటి ఫలితాలు వస్తాయి.
....................

ఇక,   భారీ పరిశ్రమల వల్ల ఎక్కువమందికి ఉపాధి లభించదని... చిన్నతరహా పరిశ్రమల వల్లే ఎక్కువమందికి ఉపాధి లభిస్తుందనీ  లెక్కలతో సహా  సాక్షాత్తూ ప్రధానమంత్రి గారే తెలియజేసారు.  

మరి, భారీ పెట్టుబడులు కావాలి, భారీ పరిశ్రమలు రావాలి .. .అంటూ  ఇతర దేశాలను అంతగా అడగటం ఏమిటో  అర్ధం కాదు. 

అయితే ప్రధానమంత్రి గారికి ఈ దేశాన్ని అభివృద్ధి చేయాలనే బలమైన పట్టుదల ఉందన్నది  కాదనలేని విషయం. 

 ముద్రా బ్యాంక్ అనేదాన్ని ప్రారంభించి చిన్న, మధ్య తరహా పరిశ్రమలకు చేయూతనిస్తామనీ చెప్పారు. ఇది చాలా ఆశాజనకంగా ఉంది.

 అయితే ఆచరణలో వేగం ఉంటుందా ? లేక ఇది కూడా నత్తనడక నడుస్తుందా ? అనేది ఇప్పుడే తెలియదు. 
............................ 

ఈ దేశంలో ఎంతో ప్రతిభ కల యువత ఉన్నారు. మనదేశంలోనూ చక్కటి వ్యాపారం తెలిసిన వాళ్ళున్నారు. అద్భుతమైన తెలివితేటలున్నవాళ్ళున్నారు.

 ఇక్కడ వారికి సరైన ఆదరణ లభించక విదేశాలకు  తరలిపోతున్నారు.  సరైన ఆదరణ లభిస్తే  టెక్నాలజీతో  సహా  అన్ని రంగాల లోను   ఎన్నో అద్భుతాలను సాధిస్తారు. 

మనవాళ్ళను  సరిగ్గా  పట్టించుకోకుండా ,  అన్ని విషయాల లోనూ   విదేశాల  సాయం  కోసం  తిరగటం వల్ల  దేశానికి  కలిగే  గొప్పలాభమేమీ ఉండదు.
.........................

ఇక ,రైతులకు భరోసాను కల్పిస్తామని  అంటూనే  భూసేకరణ చట్టాన్ని తెచ్చింది కేంద్రప్రభుత్వం. ఇది మాత్రం  దేశంపై చాలా ప్రభావాన్ని చూపే అంశం. 

 ప్రభుత్వభూములను  సెజ్ ల కోసం కేటాయిస్తారు. ఇంకా  భూములు కావాలంటూ రైతులను బలవంతం చేస్తారు. 

అసలే రైతులు గిట్టుబాటుధరలు లేక బాధపడుతుంటే  దెబ్బమీద దెబ్బ అన్నట్లు దిగజారింది దేశంలోని రైతుల  పరిస్థితి.

 ప్రభుత్వాలు కొన్ని విషయాలను గుర్తుంచుకోవాలి. ప్రజలు  అన్నీ గమనిస్తూనే ఉంటారు. అన్నీ గుర్తుపెట్టుకుని సమయం వచ్చినప్పుడు ఓటు అనే ఆయుధాన్ని ప్రయోగిస్తారు. 
.......................

ధనవంతులు పల్లెలను దత్తత తీసుకోవటం బాగుంది . అయితే, ఆచరణలో చక్కటి ఫలితాలు వచ్చి పల్లెలు అభివద్ధి చెందుతాయని ఆశిద్దాము . 

స్కాములతో కూడిన  గత ప్రభుత్వాలపై విసుగుచెంది ప్రజలు కొత్తప్రభుత్వాన్ని అత్యధికమెజార్టీతో గెలిపించారు. కొత్త ప్రభుత్వాలు  ప్రజల ఆశలను వమ్ముచేయవని ఆశిద్దాము. 
......................... 

దేశంలోని చాలా మంది  ప్రజలు  ఎక్కువ డబ్బున్నవారు కాదు.  ధరల తగ్గుదల, సరైన వైద్య సౌకర్యాలు, నీటికొరత లేకుండా ఉండటం... వంటి నిత్యావసరాలకు సంబంధించిన కోరికలు ముందు తీరటం వారికి ముఖ్యం.

ఎన్నికల తరువాత  కేంద్రంలోని సర్కారు తీరు  కొంచెం  నిరాశను కలిగించగా, 

సామాన్య ప్రజల కనీసావసరాలను తీరుస్తామని వాగ్ధానం చేసి డిల్లీ ఎన్నికలలో నిలబడ్ద  ఆప్ పార్టీని గెలిపించారు ఢిల్లీ  ప్రజలు. అయితే, ఎంతో నమ్మి రెండోసారి గెలిపించినా అంతర్గత కుమ్ములాటలో కూరుకుని ఉంది ఆప్ పార్టీ. 
.... 
అయితే మనుషులకు  ఆశావాదం అవసరం కాబట్టి, పార్టీలు  ప్రజలకు చేసిన వాగ్ధానాలను  నెరవేర్చటానికి ప్రయత్నిస్తాయని  ఆశిద్దాము.