షిర్డి సాయి అంటే మాకు ఎంతో ఇష్టం. మరియు కొన్ని విషయములు..

ఓం,
ఈ  రోజు   ఆషాఢ  ఏకాదశి  ఉత్సవాలు  జరుగుతున్నాయి.

దైవం సర్వాంతర్యామి. దైవాన్ని ఏ రూపంతోనయినా, ఏ నామంతోనయినా ఆరాధించుకోవచ్చు.
( నిరాకారంగా కూడా ఆరాధించుకోవచ్చు.)
నేను  దైవాన్ని  తోచిన  విధంగా  ఆరాధిస్తాను.  
 
వినాయకుడు,   అమ్మవారుఅయ్యవారు,   షిర్డిసాయి. .ఇలా   ఏ పేరుతో ,  ఏ  రూపంతో   ఆరాధించుకున్నా మన ఆరాధనలు చేరేది సర్వాంతర్యామి అయిన దైవానికే.

నాకు వీలుకుదిరినప్పుడు సాయిసాయి అని అనుకుంటూ ఉంటాను.

 షిర్డి సాయి   మహిమలు  ఎన్నో  నా  జీవితంలో  అనుభవానికొచ్చాయి.    మమ్మల్ని  ఎన్నో సార్లు  కష్టాల  నుండి  కాపాడారు.

బీజాక్షరాలతో కూడిన నామములను శుచిగా లేనప్పుడు, ఎప్పుడుపడితే అప్పుడు స్మరించుకోవాలంటే కొంచెం బెరుకుగా ఉంటుంది.

సాయి నామాన్ని ఎప్పుడైనా బెరుకు లేకుండా స్మరించుకోవచ్చు కదా ! అని నాకు తెలిసినంతలో అనిపించింది.

శ్రీపాద శ్రీవల్లభస్వామి సంపూర్ణ చరితామృతము… గ్రంధములో షిర్డి సాయి గురించిన ఎన్నో వివరములు ఉన్నాయి. ఆ వివరాలు చదివితే షిర్డి సాయి గురించి ఎన్నో విషయాలు తెలుస్తాయి.

శిరిడి  సాయి  ఎవరో ? ఏమిటో ? సాయికి   సంబంధించిన   ఎన్నో వివరములు  ...  శ్రీపాద శ్రీవల్లభస్వామి సంపూర్ణ చరితామృతము… గ్రంధములో  ఉన్నవి.

9 వ  అధ్యాయము,  మరియు  45  వ  అధ్యాయములో  ఈ  వివరములు  ఉన్నాయి. 

 ఈ  విషయాలను  తెలుసుకుంటే  షిర్డిసాయిని  గురించి  అనేక  సందేహాలకు ,  ప్రశ్నలకు  సమాధానాలు  లభిస్తాయి. 


 షిరిడి  సాయి  వద్దకు  సందేహంతో  వచ్చిన  కొందరు  వ్యక్తులు , సాయిలో  తాము  ఆరాధించే  దైవరూపాలను  దర్శించి  సాయికి  భక్తులవటం  జరిగింది.

 సాయిని  కొందరు  భక్తులు   పరబ్రహ్మగా  భావించి  ఆరాధించారు,   కొందరు  భక్తులు  ఆదిపరాశక్తి గా  భావించి  ఆరాధించారు, కొందరు  భక్తులు  శివునిగా  భావించి  ఆరాధించారు,  కొందరు భక్తులు కృష్ణుని గా   భావించి  ఆరాధించారు.

 
పాపవిమోచన పొందుట….
మనుష్యుడు దుర్మార్గ మార్గమునుండి బుద్ధిని మరలించనప్పుడు , తప్పులు చేయుట మాననప్పుడు, మనస్సును చలింపకుండ నిలబెట్టలేనప్పుడు జ్ఞానము ద్వార కూడ ఆత్మ సాక్షాత్కారమును పొందలేడు………షిర్డి సాయిబాబా వారు ఇలాంటి ఎన్నో అపురూపమైన విషయాలను తెలియజేశారు.


 ఈ రోజుల్లో ఎందరో భక్తులు విపరీతమైన కోరికలతో భక్తిమార్గాన్ని ఆశ్రయిస్తున్నారు.  కష్టాలలో ఉన్నప్పుడు లేక కొన్నిసార్లు కోరికలు కోరుకోవటం మానవనైజం.

అయితే  తమ   పిల్లలు   అదేపనిగా స్వార్ధపరమైన   కోరికలతో   విసిగిస్తే   తల్లితండ్రులకైనా   విసుగు వస్తుంది  కదా  !

కోరికలు కోరేముందు అందుకు తగ్గ అర్హతను సంపాదించుకోవాలని ఒక బోధకులు   తెలియజేశారు. 

అర్హత ఏమీ లేకుండానే   తేరగా   పెద్దపెద్ద   కోరికలు   కోరే స్వార్ధపరులైన భక్తుల సంఖ్య   ఈ  రోజుల్లో  బాగా  పెరిగిన మాట వాస్తవం.

అయితే మొదట కోరికల కోసం భక్తి మార్గాన్ని ఆశ్రయించినా క్రమంగా కోరికలను తగ్గించుకునే స్థాయికి వచ్చే అవకాశమూ ఉంది.

అంతా  దైవం  దయ.

ఈ  బ్లాగ్  ను  ప్రోత్సహిస్తున్న  అందరికి  అనేక  ధన్యవాదాలండి. 

వ్రాసిన  విషయాలలో  ఏమైనా  పొరపాట్లు  ఉంటే  దయచేసి  క్షమించమని  దైవాన్ని  ప్రార్ధిస్తున్నాను.

..............................................

 

సాయిబాబా పుట్టుకతో ఏ మతస్తులో ఎవరికీ తెలియదు. సాయిబాబాను గత కొన్ని సంవత్సరాలుగా ఎందరో పూజిస్తున్నారు. కొందరు హిందువులు కూడా బాబా వారి గురించి ప్రజలలో ప్రచారం చేసారు. బాబావారి విధానాలు తేలికగా ఉండి హిందువులను ఆకర్షించాయి.

 చాలామంది హిందువులు తమ దేవతలతోపాటు బాబావారినీ ప్రార్ధించుకోవటం జరిగింది. అలాంటప్పుడు బాబాను పూజించకూడదు.. అంటే చాలామందికి ఏంచేయాలో తెలియక ఇబ్బందిగా  ఉంటుంది. ఎందుకంటే జీవితంలో ఎన్నో కష్టసుఖాలలో హిందూ దేవతలతోపాటే బాబాకు కూడా తమ కష్టసుఖాలను చెప్పుకునేవారు.

కొందరు హిందువులలో కూడా చాలా గొడవలున్నాయి. శైవులు, వైష్ణవుల మధ్య అనేక గొడవలు జరిగాయి. శివుడు గొప్ప అంటే కొందరు వైష్ణవులు ఒప్పుకోరు. విష్ణువు గొప్ప అంటే కొందరు శైవులు ఒప్పుకోరు. అమ్మవారు గొప్ప అంటే కొందరు ఒప్పుకోరు. కొందరు హిందువులు మాత్రం ..అమ్మవారు శివుడు విష్ణువు..అని తేడాలు లేకుండా చక్కగా దైవాన్ని ఆరాధించుకుంటారు.

అయితే, సాయిబాబా విగ్రహం పాదాల వద్ద శివుడు, విష్ణువు వంటి దేవతల విగ్రహాలను పెట్టకూడదు. పక్కన పెట్టుకోవచ్చు. హిందూ దేవాలయాల్లో కూడా ఏ దేవత పాదాల వద్ద కూడా ఇంకో దేవతల విగ్రహాలను పెట్టకూడదు.