ఇలాంటి గొప్ప తల్లులు అభినందనీయులు...

చిన్నపిల్లలు వాళ్ళకువాళ్ళు చేత్తో తీసుకుని సరిగ్గా తినలేరు. చిన్నపిల్లలు పెద్దవారిలా గబగబా నమిలి తినలేరు. నిదానంగా తింటారు. అలాగని పిల్లలకు ఆహారాన్ని కుక్కి అదేపనిగా బోలెడు తినిపించకూడదు. 

 

వాళ్ళకు ఎంతకావాలో అలాగ తల్లి దగ్గరుండి  ఓపికగా తినిపించాలి. అందుకు ఎక్కువ సమయమే పడుతుంది.

అయితే, ఈ రోజుల్లో చాలామంది తల్లులు ఉద్యోగాల కొరకు వెళ్ళటం వల్ల పిల్లలకు చక్కగా తినిపించటానికి కూడా సమయం ఉండటం లేదు. 

 

పిల్లలను డేకేర్ సెంటర్లలో వేస్తున్నారు. లేదంటే చిన్నప్పుడే స్కూల్లో వేస్తున్నారు. పిల్లలను త్వరగా అక్కడ దింపాలని ఉదయాన్నే వాళ్లకు హడావిడిగా ఏదో కుక్కి తినిపిస్తారు.

 ఇంట్లో ఉండే తల్లులు కూడా కొందరు ఈ విషయంలో ఓపికగా చేయటం లేదు. చిన్నపిల్లలు ఏమీ చేయలేరు కదా..

 

కొందరు పిల్లలు ఉదా..3 సంవత్సరాల చిన్నపిల్లలు నాకు తినిపించమని పెద్దవాళ్ళను అడిగినా, నువ్వే తినాలంటూ తినిపించకుండా ఉండే పెద్దవాళ్ళను నేను చూసాను.. 

 

పాపం చిన్నపిల్లలు తమకు తాము సరిగ్గా తినలేని వయస్సు వాళ్ళది...అలా అర్ధాకలితో ఉంటే  బాధ అనిపిస్తుంది. ఈ సమస్యలకు పరిష్కారం ఎప్పుడో?

చాలామంది పిల్లలు తినటం విషయంలో విసిగిస్తారు. ఆ వయస్సు పిల్లలు చాలామంది అలాగే ఉంటారు. 

 

కొందరు తల్లులు మాత్రం ఓపికగా మాటలు చెబుతూ తినిపిస్తారు. ఇలాంటి గొప్ప తల్లులు అభినందనీయులు.

 ......................................

 

చంటిపిల్లల్ని క్రెచ్లలో వేసి పెద్దవాళ్లు ఉద్యోగం కోసం వెళ్తున్నారు. పిల్లల కొరకు డబ్బు సంపాదించటం కోసమే అలా చేస్తున్నామంటున్నారు కొందరు. 

 

తల్లి వద్ద ఆప్యాయంగా పెరగవలసిన ....మాటలు కూడా సరిగ్గారాని చంటి పిల్లల్ని  పగలు ఎక్కడో బయట ఉంచుతున్నారు. అక్కడ వారిని మంచిగా చూస్తున్నారో ? లేదో? తెలియదు. చంటి పిల్లలు ఏమీ చెప్పలేరు. 

 

పిల్లల్ని కొట్టిన కొన్ని సంఘటనల గురించి వార్తల ద్వారా తెలిసింది. కనీసం పిల్లలకు బాగా మాటలు వచ్చి తమ గురించి చెప్పేవరకయినా వారిని తల్లి దగ్గరుండి చూసుకోవాలి. 

 

పిల్లలు కొంచెం పెద్దయ్యాక ఉద్యోగం రాకుంటే, సొంతంగా ఏదైనా చిన్న వ్యాపారం చేస్తూ అయినా ఉపాధి పొందవచ్చు. 

 

పిల్లల క్షేమం ముఖ్యం కదా.
.....................................

 

కొందరు తల్లితండ్రి , తమ పిల్లలను సరిగ్గ చూసుకోవటానికి కూడా సమయం లేదంటూ  బిజి అంటారు. 

 

తాము పెద్దయ్యాక  మాత్రం,  ఏమీ తోచక ఫోన్ పుచ్చుకుని అస్తమాను పిల్లల జీవితాల్లో కల్పించుకుంటూ.. అదేపనిగా వాళ్లకు సలహాలిస్తూ పిల్లల విడాకులకు కారణమవుతున్న పెద్దవాళ్ళూ ఉన్నారు.

............................

ఈ రోజుల్లో చాలామంది స్త్రీలు ఉద్యోగాలని బయటకు వెళ్లటం వల్ల సమయం సరిపోక హడావిడిగా వండుకుని తింటున్నారు. పిల్లలు చదువులని బయట ఉండటం, ఇంకా అనేక కారణాల వల్ల చాలామంది బయట ఆహారాన్ని ఎక్కువగా తింటున్నారు. బయట ఆహారం పరిస్థితి ఎలా ఉందో.. ఈ లింక్ వద్ద గమనించవచ్చు.

  REALITY OF INDIAN FOOD 😷🍲 | GOVERNMENT FAILED US? | By Naresh Bukya
NB Show Telugu

................
 ఇంట్లో ఉండే స్త్రీలు కూడా కొందరు బయట ఆహారాన్ని ఎక్కువగా తెప్పించుకుంటున్నారు.

ఇంట్లో సరైన ఆహారం లేక బయట ఎక్కువగా తింటే, పిల్లలకు, పెద్దవాళ్లకు అనారోగ్యం వచ్చే అవకాశముంది. ఆరోగ్య సమస్యలు వచ్చాక ఎంత డబ్బున్నా కూడా కొందరికి కొన్నిసార్లు అనారోగ్యం తగ్గటం కష్టమవుతుంది. అందువల్ల, అందరూ జాగ్రత్తగా ఉంటే మంచిది.

............

ఈ మధ్య కొందరు యువతులు తాము ఇంజనీరింగ్ వంటివి చదువుకుని ఉద్యోగాలు చేయకుండా ఇంటిపనులు చేయటాన్ని తక్కువగా భావిస్తూ ..తామెంతో చిన్నపనులు చేస్తున్నట్లుగా పోస్టులు పెడుతున్నారు...

 

 స్త్రీలు కుటుంబబాధ్యతలను చక్కగా  నిర్వహించటం, పిల్లల్ని చక్కగా పెంచి శారీరికంగా, మానసికంగా ఉత్తమ పౌరులుగా చేయటం చాలా గొప్ప పనులు. 

 

 తమకు తమ కుటుంబసభ్యులకు ఇంత ఆహారాన్ని చక్కగా వండుకుని తినటం, ఇంటిని చక్కదిద్దుకోవటం తక్కువ పనులనుకుంటే ఎలా?
..................................

 కష్టాలున్నా కూడా , కుటుంబాన్ని చక్కగా చూసుకునే స్త్రీలు చాలామందే ఉంటారు.  అలాంటి వారు ఎంతో గొప్పవారు....అభినందనీయులు...

..............................

   యూట్యూబ్లో కొందరు అమ్మాయిలు తాము అత్తగార్లను ఎలా కంట్రోల్ లో పెడుతున్నది చూపిస్తున్నారు. పాతకాలంలో అత్తగార్లు కోడళ్లను కంట్రోల్లో పెట్టారు కాబట్టి, ఇప్పుడు కోడళ్ళు అత్తగార్లను కంట్రోలో పెట్టి మురిసిపోతున్నారు.

 అత్తగార్లు ఒకప్పటి కోడళ్ళే అని, కోడళ్ళూ కాబోయే అత్తగార్లేనని గుర్తంచుకుంటే అందరికి మంచిది.
............................

 చంటిపిల్లలు తల్లి దగ్గర ఉండాలనుకుంటారు. ఆ వయస్సులో వారిని  డేకేర్లో వేసి, వారి కొరకు బోలెడు డబ్బు సంపాదిస్తామంటారు. పెద్దవారిని వృద్ధాప్యంలో వృధాశ్రమంలో వేస్తే బాధపడతారు కదా..పిల్లలకు కొంత మాటలు చెప్పే వయస్సు వచ్చేవరకైనా ఇంట్లో వారు చూసుకుంటే మంచిది.

 పిల్లల్ని మంచిగా చూసుకునే సంస్థలు ఉండి, వారు పిల్లల్ని బాగా చూస్తారనే నమ్మకం కలిగితే వీడియో ద్వారా ఎప్పటికప్పుడు పిల్లల్ని చూసుకునే అవకాశం ఉంటే కొంతవరకు ఫరవాలేదు. ఇవన్నీ ఉండాలంటే ఎక్కువ డబ్బు అవుతుంది. 

 పిల్లల పెంపకం తేలిక కాదు. అయితే, చిన్న పిల్లల ముద్దు ముచ్చట్లను  చూస్తే, ఆ కష్టం కష్టంగా అనిపించదు. పిల్లల ముద్దుముచ్చట్లను   చూసుకునే సమయం జీవితంలో మళ్లీ వస్తుందా?

చదువులు, ఉద్యోగాల కొరకు రాత్రింబగళ్లు చదివి ఎంత కష్టమైనా చేస్తున్నారు కదా.. అవన్నీ కూడా ఎంతో కష్టమైన పనులే. కుటుంబబాధ్యతలంటేనే బొర్ అనటం బాధాకరం.
 ....................
 కొందరు తల్లులు తమ పిల్లల్ని చావబాదిన  కేసులను గురించి కూడా విన్నాము. ఇదంతా ఎంతో బాధాకరం. 

..............

చిన్నతనంలో పునాది బాగుంటే జీవితంలో మంచిపౌరులుగా తయారయ్యే అవకాశం ఉంది. తల్లితండ్రి ఎన్ని మంచి విషయాలను నేర్పించినా కూడా, బయటప్రపంచం, సోషల్మీడియా..వాటి ప్రభావం చాలానే ఉంటుంది..

అయితే, తల్లితండ్రి మరీ స్ట్రిక్టుగా చెప్పటం కాకుండా, కొంత ఫ్రెండ్లిగా పిల్లలకు విషయాలను చెప్పటం మంచిది.

తల్లి చెప్పిన మాటలను చాలామంది పిల్లలు వింటారు. అయితే, తల్లులు మంచి విషయాలను నేర్పించాలి. పిల్లల మనస్సులో పంతాలు, పట్టుదలలు, ఆవేశకావేషాలు, పాపాలు చేసైనా డబ్బు సంపాదించాలి..అనే విధంగా చెప్పకూడదు.

అమ్మాయిలు..అబ్బాయిలు ఒకరినొకరు గౌరవించుకోవాలని, జీవితంలో అధర్మంగా ఉండకూడదని, ఇతరులను మోసం చేసి డబ్బు సంపాదించకూడదని చెపుతూ ఉంటే దాని ప్రభావం పిల్లలపై చాలా ఉంటుంది.  వాళ్లు మంచిపౌరులుగా తయారయ్యే అవకాశం ఎంతో ఉంటుంది.

అయితే,  సమాజంలో చెడు ప్రభావం వల్ల, ఎంత చెప్పినా కొందరు త్వరగా మాట వినేటట్లు లేరు. 

 

 ఈ రోజుల్లో తల్లితండ్రికి పిల్లలతో గడపటానికి కూడా సమయం ఉండటం లేదు. 

సరిగ్గా తినటానికి సమయం లేక, కుటుంబసభ్యులు ఒకరితో ఒకరు మాట్లాడుకోవటానికి సమయం లేనప్పుడు ఎందుకొరకు అంత డబ్బు సంపాదించాలి? జీవితంలో డబ్బు ఎంతో ముఖ్యమే. అయితే, జీవితం కూడా ఎంతో ముఖ్యం.
................................

 కుటుంబసభ్యులకు తీరిక దొరికినా కూడా ఒకరితో ఒకరు ఏం మాట్లాడాలో తెలియక ఫోన్లతో కాలక్షేపం చేస్తున్నారు. కుటుంబసభ్యుల మధ్య అనేక కారణాల వల్ల సఖ్యత లేక గొడవలు పడుతున్నారు. మనుషుల్లో పంతాలు, పట్టుదలలు ఎక్కువయ్యాయి.

కుటుంబం అంటే ఎన్నో సమస్యలుంటాయి. పెద్దవాళ్లతో అభిప్రాయ బేధాలు, భార్యాభర్త మధ్య ఇగోలు, పిల్లల సమస్యలు, డబ్బు సమస్యలు..ఎన్నో ఉంటాయి. ఇలాంటప్పుడు బయట వారితో స్నేహాలు బాగున్నట్లు అనిపిస్తాయి. 

ఈ రోజుల్లో వ్యవస్థ అంతా మారిపోయింది కాబట్టి, ఎంతో ఆలోచించి జాగ్రత్తగా ఉండాలి.

ఒకే ఇంట్లో ఉంటూ  పెద్దవాళ్లతో సరిపడకుంటే , పెళ్లయిన పిల్లలు, పెద్దవాళ్లు..పక్కపక్కన ఇళ్లలో ఉండవచ్చు లేక ఒకే ఊరిలో దూరంగా వేరే ఇళ్ళలో ఉండవచ్చు. అప్పుడు సహాయం అవసరమైనప్పుడు ఒకరికొకరు అందుబాటులో ఉంటారు....ఇంకా కుదరకపోతే వేరే ఊర్లో ఉండవచ్చు.
...............

చాలామంది డబ్బు సరిపోవటం లేదంటారు. 

ఈరోజుల్లో ఒకరిని చూసి ఒకరు పోటీలుపడుతూ డబ్బు ఖర్చు చేసి అనేక వస్తువులను కొనటం ఎక్కువయ్యింది. చూసినవన్నీ కొంటూ పోతే ఇంట్లో అందరూ ఎంత డబ్బు సంపాదించినా కూడా డబ్బు సరిపోదు.

వ్యాపారస్తులు వస్తువుల ధరలు పెంచేస్తున్నారు. ప్రజలు వస్తువులను అదేపనిగా కొనటాన్ని తగ్గిస్తే, వాళ్ళు ధరలు  కూడా తగ్గించక తప్పదు. 

 

 అదేపనిగా వస్తువుల్ని కొని పడేస్తుంటే చెత్త పెరిగి పర్యావరణసమస్యలు కూడా పెరుగుతాయి.
......................................

సరైన ఆహారం, కుటుంబసభ్యుల మద్య ఆప్యాయతలకు సమయం లేనప్పుడు ఎంత డబ్బున్నా ఏం లాభం? సరైన ఆహారం, ఆప్యాయత ఉన్న కుటుంబాలలో వారు ఆరోగ్యంగా, చక్కగా జీవిస్తారు, అలాంటివారు ఉన్న సమాజమూ బాగుంటుంది.
....................

 ఈ రోజుల్లో చాలామంది ఆదరాబాదరాగా ఉదయాన్నే పరుగులు పెడుతున్నారు. చంటిపిల్లల్ని డేకేర్లో వేయటం , పెద్దవాళ్ళు ఉద్యోగాలకు పోవటం..ఇలా ఉంటుంది.

 చిన్నతనంలోనూ టైం అయిపోతోందంటూ టెన్షనే, పెద్దయ్యాక అఫీసుల్లో టార్గెట్లతో టెన్షనే, ఇక వృద్దాప్యం వచ్చాక సంపాదించిన సొమ్ము హాస్పిటల్స్క్ పోస్తూ టెన్షన్లతోనే జీవితం సమాప్తం అవుతుంది. 

 

చివరికి మిగిలేదేమిటి?