స్వదేశం..విదేశం..

ఈ మధ్య కాలంలో విదేశాలలో స్థిరపడుతున్నభారతీయుల సంఖ్య పెరిగింది.

చదువుకోసమో లేక ఉద్యోగరిత్యానో కొంతకాలం విదేశాలకు వెళ్లటం అన్నది ఫరవాలేదు. అయితే అక్కడే స్థిరపడిపోవటం అంటే ఎన్నో విషయాలను ఆలోచించుకోవలసి ఉంటుంది.
........................

ఇప్పుడు తెలుగువాళ్ల మధ్య జరుగుతున్న గొడవలు చూస్తున్నాము  కదా!  ఉమ్మడి ఆంధ్రప్రదేశ్  ఇప్పుడు రెండు రాష్ట్రాలుగా విడిపోయింది కానీ, ఒకప్పుడు  తరతరాలుగా తెలుగువాళ్లు అందరికీ చెందిన ప్రాంతం.

తెలుగువాళ్ళు  సాటి తెలుగువాళ్ళనే భరించలేకపోతున్నారు. మా ప్రాంతంలోకి  వచ్చి మా  ఉద్యోగావకాశాలను తీసుకోవద్దు .. అంటున్నారు.

 ఒకే భాష మాట్లాడే ప్రజల మధ్యే ఇన్ని గొడవలు ఉన్నప్పుడు, మరి భారతదేశం నుంచి  విదేశాలకు  వెళ్లి  అక్కడ  స్థిరపడే వాళ్ళ పరిస్థితి భవిష్యత్తులో ఎలా ఉంటుందో ఎవరు చెప్పగలరు?
........................

విదేశాల్లో స్థానికులకు, వలసవాదుల వల్ల  తమకు ఉపాధీ అవకాశాలు తగ్గుతున్నాయనే  ఆలోచనలు బలపడినప్పుడు అక్కడకు వెళ్లిన స్థిరపడిన భారతీయుల పరిస్థితి ఏమిటి ?

 ( బహుశా వాళ్లు  అక్కడ రెండవతరగతి పౌరులుగా రాజీపడిపోయి బ్రతకవలసి ఉంటుందేమో.)

ఒకే భాష మాట్లాడే ప్రజలే తమలో తాము  సర్దుకుపోలేక  రాష్ట్ర విభజన వరకు పరిస్థితి వెళ్ళినప్పుడు,  విదేశాల వాళ్ళు పరాయి దేశాల వాళ్ళతో ఎందుకు సర్దుకుంటారు ?
...............

  విదేశాల్లో ప్రస్తుతం  అంతా బాగానే ఉన్నట్లు అనిపించవచ్చు.  అయితే, భవిష్యత్తులో పరిస్థితి ఎలా మారుతుందో చెప్పలేం. 

విదేశాల్లో కొన్నిసార్లు  అంతర్యుద్ధాలు సంభవించినప్పుడు...  అక్కడి భారతీయులను భారత ప్రభుత్వం స్వదేశానికి తీసుకురావటం జరిగింది . 
......................

ఇంకో విషయం ఏమిటంటే, ఒక దేశానికి ఇంకో దేశానికీ మధ్య ఏమైనా సంఘటన జరిగి స్నేహం చెడిపోయి శత్రుత్వం పెరిగినప్పుడు, అక్కడ స్థిరపడ్ద వలసవాదులను అడ్దుపెట్టుకుని వలసవాదుల మాతృ దేశాన్ని బ్లాక్మెయిల్ చేసే అవకాశాలూ ఉన్నాయి.

అలాగని చెప్పి విదేశాల్లో స్థిరపడ్ద కొద్దిమంది కోసం స్వదేశ ప్రయోజనాలను తాకట్టుపెట్టలేరు . 
.............

విదేశాల వారు తమకు  పనిచేసే వ్యక్తులు అవసరం అయినప్పుడు వలసలను వారే ప్రోత్సహిస్తారు. వలస వచ్చిన వారిని బాగానే ఆదరిస్తారు.

 కాలం గడిచేకొద్దీ  అక్కడి  స్థానికులలో వలసవాదుల పట్ల అసహనం పెరగనూ వచ్చు. ఎక్కడి నుంచో   మా ప్రాంతం వచ్చి , ఆస్తులు కొనుక్కుని సుఖపడుతున్నారని స్థానికులలో అక్కసు పెరిగే అవకాశమూ ఉంది. 
........................

 పరాయి ప్రాంతానికి వెళ్లినప్పుడు  చిన్నపాటి ఉపాధి చూసుకుని బ్రతికితే ఎక్కువ సమస్యలు రాకపోవచ్చు.

 అక్కడ స్థిరపడి, ఆర్ధికంగా పుంజుకుని ఆస్తిపాస్తులు కూడబెట్టుకోవటం మొదలుపెడితే మాత్రం స్థానికులలో వలసవాదుల పట్ల నిరసన మొదలయ్యే అవకాశం ఉంది.

ఇలాంటప్పుడు..వలసవాదుల సంతతి వాళ్లు తమ పెద్దవాళ్ల మాతృ దేశానికి తిరిగివెళ్లలేక , తాము పుట్టి, పెరిగిన దేశంలో రెండవ తరగతి పౌరులుగా జీవించలేక నలిగిపోతుంటారు. 
 ............

మాతృదేశంలో సౌకర్యాలు లేవని చెప్పి పరాయి దేశం  వెళ్లి అక్కడే స్థిరపడటం కన్నా, ఎవరి దేశాన్ని వాళ్లు చక్కదిద్దుకోవటం సరైన పని.
ఈ నిర్ణయం ..  మన ఇల్లు బాగోలేదని చెప్పి , పొరుగు ఇల్లు చక్కటి సౌకర్యాలతో ఉందని చెప్పి అక్కడే ఉండిపోవాలి...  అనుకోవటం లాంటిది .    
...................

పొరుగువాళ్లకు మనతో అవసరం ఉన్నంతవరకూ మనతో మంచిగా ఉంటారు. 
ఇంకో దేశం నుంచి వచ్చి మా ఉపాధులను లాక్కుంటున్నారు ..అనే అభిప్రాయం పెరిగినప్పుడు వలసవెళ్లిన వాళ్లు అక్కడి సంపాదించుకున్న ఆస్తిపాస్తులను కూడా వదిలి  కట్టుబట్టలతో స్వదేశానికి తిరిగివచ్చే పరిస్థితి కూడా రావచ్చు.
.........

విదేశాల్లో స్థిరపడిన భారతీయులు భారతదేశంలో తమకున్న సంబంధాలను కొనసాగిస్తూ ఇక్కడ కూడా ఆస్తిపాస్తులను ఏర్పరుచుకుంటే మంచిది. 

 ఎప్పుడయినా భవిష్యత్తులో విదేశాల్లో  పరిస్థితి తారుమారైతే స్వదేశంలో మన కంటూ ఒక  స్థానం ఉంటుంది కదా!