ఆంధ్రప్రదేశ్..తెలంగాణా..

ఆంధ్రా వాళ్లు విదేశాల్లో చాలామంది  ఉన్నారు. అక్కడ ఎంతో కష్టపడి అభివృద్ధి లోకి వస్తారు..ఆ దేశాల అభివృద్ధిలో భాగస్వామ్యులవుతారు.

ఆంధ్రా వాళ్లు పరాయి రాష్ట్రాల్లో కూడా ఉన్నారు. అక్కడి అభివృద్ధి పనులలో ఆంధ్రుల పాత్ర ఎక్కువగానే ఉందట.  ఉదా.. గుజరాత్ లో సోలార్ విద్యుత్ అభివృద్ధి చెందటంలో ఆంధ్ర వాళ్ల పాత్ర ముఖ్యమైనదని వార్తలు వచ్చాయి.

 నిజమే, ఆంధ్ర వాళ్ళు ఇతర ప్రాంతాల అభివృద్ధిలో ఎంతో కృషి చేయటం బాగానే ఉంది. మరి సొంత ప్రాంతాన్ని అభివృద్ధి చేసుకోవటంలో ఎందుకు కృషి చేయరో అర్ధం కావటం లేదు.

 ఇక్కడ సౌకర్యాలు లేవంటారు. వేరొక దగ్గరకు వెళ్లి అష్టకష్టాలు పడి పైకి  రావటానికి ఇష్టపడతారు కానీ, సొంత రాష్ట్రం అభివృద్ధి చెందటానికి వాళ్లకు ఉత్సాహం లేకపోవటం చాలా బాధాకరం.

 ఆంధ్రప్రదేశ్లో ఎన్నో వనరులు ఉన్నాయి. డెల్టా భూములున్నాయి. సముద్రప్రాంతం ఉంది. పోర్టులు అభివృద్ధి చేసుకోవచ్చు. ఇవన్నీ అభివృద్ధి చేసుకుంటే ఎంత బాగుంటుంది.

ఆంధ్రుల కష్టంతో  తమ ప్రాంతాలను అభివృద్ధి చేసుకున్న వాళ్లు కొందరు  ఆంధ్రులను తిడుతుంటే బాధగా అనిపించటం లేదా ? మన ప్రాంతాన్ని చక్కగా అభివృద్ధి చేసుకోవాలనే ఆరాటం కలగటం లేదా? ఆత్మాభిమానం అనిపించటం లేదా? 

వీటన్నింటికీ ముఖ్యకారణం..ఆంధ్రులకు తమ ప్రాంతం అంటే చిన్నచూపు ఎక్కువ అనిపిస్తుంది. మాతృభాష అంటే మమకారం అంతగా ఉండదు, ఐకమత్యం కూడా తక్కువే.అనిపిస్తుంది.
................

ఉమ్మడిరాష్ట్రంలో ఆంధ్రప్రాంతము నిరాదరణకు గురయ్యింది.

 డెల్టాభూములు, ఎన్నోవనరులు, సముద్రతీరం, అరకు వంటి శీతల ప్రదేశాలు, ఉండి కూడా  ఏ అభివృద్ధి జరగలేదు. ఆంధ్రప్రాంతం వాళ్లు చాలామంది  తమ పెట్టుబడులను హైదరాబాద్ ప్రాంతం వద్ద పెట్టడం జరిగింది. 

గత ప్రభుత్వాలు  ఆంధ్రప్రాంతాన్ని పట్టించుకోకుండా హైదరాబాద్నే అభివృద్ధి చేస్తూ ఉంటే చూస్తూ ఊరుకున్నారు.  మన రాజధానే కదా అనుకున్నారు. ఇప్పుడు ఏం జరిగింది...ఇదంతా మా ప్రాంతం, మీ రాజధాని కాదు పొమ్మన్నారు.
......................

ఇప్పుడు రాజధాని లేక లోటు రెవెన్యూతో నడిరోడ్దు మీద ఉన్నాము. విభజన సందర్భంగా పార్టీలు  పార్లమెంట్ సాక్షిగా ఎన్నో హామీలు ఇచ్చారు. 

ప్రత్యేక హోదానూ ఇస్తాము, రాయలసీమ, ఉత్తరాంధ్రా అభివృద్ధి చేస్తాము, రాజధాని కట్టిస్తాము..అంటూ ఎన్నో హామీలు ఇచ్చారు.

రాష్ట్రాన్ని విడదీసి ఆంధ్రులకు అన్యాయం చేసాయి.. అని జాతీయపార్టీలను తిడుతున్నాము కానీ, 

  విభజనకు ముఖ్య కారకులు సాటి తెలుగువాళ్ళే కదా!
..................

ఎలాగైతేనేమి రాష్ట్రం విడిపోయింది. తెలంగాణ  వాళ్ళు మిగులు ఆదాయంతో ఉన్నారు. ధనిక రాష్ట్రంగా చెప్పుకుంటున్నారు.

 మరి ఇంతకాలమూ..ఆంధ్రాదోపిడీ వల్ల తెలంగాణా వెనుకబడిపోయింది..అన్నారు. విభజన జరిగిన వెంటనే ధనిక రాష్ట్రంగా మారిపోయింది కాబోలు. 

 తెలంగాణా సంపదను ఆంధ్రావాళ్లు దోచుకోవటమే నిజమయితే, ఆంధ్రప్రదేశ్ లోటు బడ్జెట్తో పేద రాష్ట్రంగా ఎందుకు ఉంటుంది. దోచుకున్న సొమ్ముతో మిగులు రాష్ట్రంగానే ఉండేది కదా !
....................

 విభజన తరువాతైనా మనశ్సాంతి ఉంటుందిలే అనుకుంటే,  విభజన తరువాత కూడా ఎప్పుడూ గొడవే. నీళ్లు, విద్యుత్.. ఆంధ్రావాళ్ళు దోచుకుంటున్నారో అని ఇంకా ఒకటే గొడవ.

రాజధానితో సహా రాష్ట్రం వచ్చినా తృప్తి లేదా ? ఇంకా ఏం కావాలి ?

విభజన హామీ అయిన ప్రత్యేక హోదా ఇవ్వమని ఆంధ్రా వాళ్లు కేంద్రాన్ని అడగటం మొదలుపెట్టగనే,  వెంటనే తెలంగాణా వాళ్లు రంగంలోకి దిగి తెలంగాణా కూడా వెనకబడి ఉంది. మాకూ ప్రత్యేక్ హోదా ఇవ్వాల్సిందే అంటారు.

 ఒక ప్రక్క ధనిక రాష్ట్రం అని చెబుతూనే.. ఆంధ్రకు ప్రత్యేక హోదా ఇస్తే మాత్రం తెలంగాణా కూడా పేద రాష్ట్రం అని చెప్పేస్తారు. 

ఇదంతా ఎంత ఘోరం అంటే, ఆంధ్రవాళ్ళు అభివృద్ధి చెందకూడదని కొందరు తెలంగాణా వాళ్ల అభిప్రాయంగా అనిపిస్తోంది.

మిగులు రాష్ట్రం తెలంగాణాకు ఆర్ధికంగా లోటు లేదు. హైదరాబాద్ ఆదాయంతో వాళ్లు మిగిలిన తెలంగాణా అభివృద్ధి చేసుకోవచ్చు.  ప్రత్యేక హోదా ఎందుకు?
..............

ఆంధ్రావాళ్లు ప్రత్యేక హోదా ఇవ్వాలంటే మిగతా రాష్ట్రాల వాళ్లుకూడా అడుగుతారు కాబట్టి  ఇవ్వలేమేమో..అంటూ సన్నాయి నొక్కులు నొక్కుతున్నారు కేంద్ర ప్రభుత్వంలో కొందరు. ఎప్పటికైనా ఇస్తాము...అంటూ మభ్యపెడుతున్నారు కొందరు.

ఆంధ్రవాళ్లు మెతకమనుషులు , వాళ్లకు ఐకమత్యం ఉండదు,  రోడ్దెక్కి గొడవలు చేయరులే  అని వాళ్ల అభిప్రాయమేమో? 

అయితే, ఆంధ్రవాళ్లకు అన్యాయం చేసిన  కాంగ్రెస్ పని ఏమయిందో అందరికీ తెలుసు.

కేంద్రం వాళ్లు ఎప్పుడు ఏం నిర్ణయాలు తీసుకుంటారో తెలియదు. 

 మంచిగా అడిగితే పనులు కానప్పుడు, ఇక అప్పుడు మన హక్కుల కోసం పోరాటం చేయవలసివస్తుంది.

ప్రస్తుతానికి ఆంధ్ర వాళ్లు  ప్రత్యేక హోదా సంగతి పక్కన పెట్టి అందుకు ప్రతిఫలంగా  ఎన్నో రాయితీలను , మరెన్నో సౌకర్యాలను రాబట్టుకోవటం ప్రస్తుత పరిస్థితిలో తెలివైన పని అనిపిస్తోంది.. 
..............

కొందరు ఏమంటున్నారంటే, విభజన అనేది మాప్ మీద మాత్రమే జరిగింది. నిజంగా తెలుగు ప్రజలలో విభేదాలు లేవు అంటున్నారు. విభేదాలు లేనప్పుడు విభజన జరిగేదే  కాదు. 

 హైదరాబాద్లో ఉండే ఆంధ్రావాళ్లు కొందరు , అక్కడ తమకు ఇబ్బందులు రాకుండా ఇలాంటి మాటలు  చెబుతుంటారు.

 ఇలాంటి  వారికీ  ఒక విజ్ఞప్తి ఏమంటే.. మీ స్వంత ప్రయోజనాల కోసం ఆంధ్రరాష్ట్ర  ప్రయోజనాలను బలిచేయకండి.అని. 
.................

మరికొందరు తెలంగాణా వాళ్ళు,  ఆంధ్ర ప్రజల పట్ల మాకు కోపం లేదు. అంటారు. మీరు వేరు.. మేము వేరు అంటూ అన్యాయంగా విభజించి ఇప్పుడిలా కబుర్లు చెప్పటం ఆశ్చర్యం కదా ! 
.................... 
అయితే, తెలంగాణాలో.. డబ్బే సర్వస్వం అనుకోకుండా న్యాయానికి విలువ ఇచ్చే వ్యక్తులూ ఉన్నారు.   
.............

ఇక నీటి సంగతి. ఆంధ్రప్రదేశ్ కైనా తెలంగాణాకైనా మరే రాష్ట్రానికైనా  నీరు ప్రకృతి ప్రసాదించిన వరం. అది ఎవరి దయాదాక్షిణ్యాల మీదా ఆధారపడి వచ్చినవి కాదు.

 నదుల పరీవాహక ప్రాంతాల వారికి ఆ నీటిపై హక్కు ఉంటుంది. ఎవరి వాటాను వారు వాడుకోవటంలో తప్పు లేదు.

అయితే, ఎగువ ప్రాంతాల వాళ్లు  అన్నీ మేమే వాడుకుంటాము అంటే ఎవరూ ఒప్పుకోరు. తీర్పు చెప్పటానికి న్యాయస్థానాలున్నాయి. ప్రజలు ఎవరైనా ఈ విషయంలో న్యాయస్థానానికి వెళ్లవచ్చు.
............

తెరాసా పార్టీ వాళ్లు ఆంధ్రా వాళ్లను దొంగలు, దోపిడీదార్లు, ఇంకా చాలా రకాలుగా తిట్తారు. వాళ్లకు అభివృద్ధిపనులలో వాడుకోవటానికి ఆంధ్ర వాళ్ళ సహాయం కావాలి.అవసరం తీరిన తరువాత మళ్లీ తిట్టిపోస్తారు.

 ఉమ్మడి రాష్ట్ర విభజనకు అనుకూలంగా లేఖ ఇవ్వటానికి తెలుగుదేశం పార్టీ ని వాడుకున్నారు. విభజన జరిగిన తరువాత ఆంధ్రపార్టీ ఇక్కడ ఉండటానికి వీల్లేదు ..అంటున్నారు.

 ఆంధ్రప్రజలకు  రాష్ట్ర విభజన జరగటం ఇష్టం లేకపోయినా, తెలుగుదేశం పార్టీ వాళ్లు రాష్ట్ర విభజనకు అనుకూలంగా లెటర్ ఇచ్చారు. అయినా ఆంధ్రప్రజలు తెలుగుదేశాన్ని గెలిపించారు.

 ఇప్పుడు ఆంధ్రప్రదేశ్ కష్టంలో ఉంది. కొంతకాలం వరకు ..తెలుగుదేశం పార్టీ చాలా ఎక్కువ సమయాన్ని ఆంధ్రప్రదేశ్ కు కేటాయించవలసి ఉంది. ఆంధ్రను అశ్రద్ధ చేస్తే తెలుగుదేశం పార్టీ ఆంధ్రప్రజల నమ్మకాన్ని కోల్పోయే అవకాశం ఉంది.ఇక తరువాత మీ ఇష్టం.
............

 గత కొన్ని సంవత్సరాలుగా తెలుగు ప్రాంతాలలో పరిస్థితి గందరగోళంగా ఉంది. 
తమిళనాడు వంటి పొరుగురాష్ట్రాలు తెలివిగా జీవిస్తున్నారు. తెలుగువాళ్లే ఇలా తయారయ్యారు.
 భవిష్యత్తులో ఏం జరుగుతుందో కాలమే నిర్ణయిస్తుంది.