ఒంటినిండా, ఇంటినిండా ఎన్నో వస్తువులు ప్రోగేసుకోవటం కన్నా...

 

ఈ రోజుల్లో చాలా మంది ఎలాగోలా డబ్బు  సంపాదించి, వస్తువులను కొనటం కోసం విపరీతంగా ఖర్చు పెడుతున్నారు.

దుస్తుల కోసం, ఫర్నిచర్ మరియు  కార్లు..వంటి వాటి విషయంలో అవసరానికి మించి ఖర్చుపెడుతున్నారు.

ఈ రోజుల్లో చాలామందికి నెలకే వేలు లేక కొన్ని లక్షల వరకు  ఆదాయం వస్తోంది. ఈ డబ్బుతో విపరీతంగా వస్తువులను కొనిపడేస్తున్నారు.

మనిషి  సౌకర్యంగా జీవించాలంటే కొన్ని వస్తువులు చాలు.
 ఉదాహరణకు దుస్తుల విషయంలో చూస్తే..

 ఒక మనిషి ఒక సంవత్సరానికి.. రోజువారీ ధరించే దుస్తులు అరడజను( సుమారు 1000  రూపాయల లోపు ), వారాంతాల్లో ఎక్కడికైనా బయటకు వెళ్ళినప్పుడు ధరించటానికి  నాలుగు దుస్తులు ( సుమారు 1000 నుంచి 2000 ధరలో ) ఫంక్షన్స్లో  ధరించటానికి (2000 నుంచి 5000 ధరలో)  రెండు ఖరీదైన డ్రస్సులు కొనుక్కోవచ్చు.

ఈ విధంగా ఒక  మహిళకు  సంవత్సరానికి సుమారు  సుమారు  10,000 లేక  25,000 ఖర్చు చేస్తే 12 చీరలు లేక డ్రస్సులు వస్తాయి.. వచ్చే సంవత్సరం మళ్లీ కొత్తవి కొనుక్కోవచ్చు.

  అయితే, ఈ రోజుల్లో చాలామంది ఒక్కో డ్రస్సుకే 20 వేలు, 50 వేలు, ఒక లక్ష..ఆపైన కూడా ఖర్చు చేసి కొంటున్నారు.

 ( సొంత ఫంక్షన్స్ కొరకు అయితే కొంచెం ఎక్కువ ఖరీదు పెట్టి  దుస్తులు కొనుక్కోవచ్చు. )

డబ్బు ఎక్కువఉన్న వారు కూడా  పరిమితమైన ధరలో వస్తువులు కొనుక్కోవచ్చు.

కోటి రూపాయల కారు కన్నా 10 లక్షల లేక 20 లక్షల  కారును కొనుక్కోవచ్చు.

 (పైన వ్రాసిన ధరలను కొంచెం ఎక్కువ తక్కువగా మార్చుకోవచ్చు.)

మార్కెట్లో కుప్పలుతెప్పలుగా వచ్చి పడుతున్నవన్నీ కొనాలని ఆశపడకుండా , ఏది అవసరమో అవే కొనుక్కుంటే బాగుంటుంది.

 బాగా డబ్బున్న వాళ్ళు ఎక్కువ ధరలు పెట్టి బోలెడు వస్తువులను కొనటం కన్నా, తగుమాత్రం వస్తువులను కొనుక్కుని,  తమ ఉద్ద ఉన్న డబ్బుతో.. డబ్బు బాగా అవసరం ఉన్నవారికి సహాయం చేస్తే ఎంతో మనశ్శాంతి లభిస్తుంది.

 ఉదా.. డబ్బు లేక  వైద్యాన్ని చేయించుకోలేకపోతున్నవారికి, డబ్బు లేక చదువుకు దూరమవుతున్నవారికి..ఇలా సహాయం చేయవచ్చు.

ఊళ్ళలో నీటిశుద్ధి కేంద్రాలను  ఏర్పాటుచేయవచ్చు. ఉచిత అన్నదానం, వైద్యకేంద్రాలను ఏర్పాటుచేయవచ్చు. ఇలా ఎన్నో చేయవచ్చు. 

 

పర్యావరణాన్ని రక్షించే సంస్థలకు ధనసహాయం చేయవచ్చు. 

 

పశుపక్ష్యాదులను కాపాడే వారికి సాయం చేయవచ్చు. ఇందువల్ల పుణ్యం వస్తుంది. 

 

  అదేపనిగా అతిగా దానాలు చేసేసి తాము అడుక్కునే పరిస్థితి తెచ్చుకోకూడదు.

 

జీవితంలో ఎప్పుడైనా కష్టం వస్తే, మనం చేసుకున్న పుణ్యం వల్ల కష్టాలు తగ్గే అవకాశం ఉంటుంది.

 

 పొదుపుగా జీవించలంటారు.. వస్తువులపైన వ్యామోహాన్ని తగ్గించుకుంటే, వాటికోసం  అతిగా డబ్బు సంపాదించవలసిన అవసరం కూడా తగ్గుతుంది.

 

 ఐశ్వర్యాన్ని అతి ఆడంబరంగా ప్రదర్శించేవారికి ఇతరుల నుండి దృష్టి ( నెగటివ్ శక్తి..) తగిలి కష్టాలు వచ్చే పరిస్థితి కూడా ఏర్పడవచ్చు. 

 

 ఒంటినిండా, ఇంటినిండా ఎన్నో వస్తువులు  ప్రోగేసుకోవటం కన్నా, మనతో పాటు ఇతరుల జీవితాలు బాగుపడటంలో  సహాయపడటం ఎంతో మంచిది.

 .....................

 

 జీవితంలో ఎంతోకొంత సంతోషంగా ఉండాలంటే, అతిగా ఆలోచించకూడదు, అతిగా మాట్లాడకూడదు( అనవసరంగా వాగ్వివాదాలు చేయకూడదు..), అతిగా తినకూడదు, అతిగా కోరికలను పెంచుకోకూడదు, అతిగా సెల్ఫోన్ చూడటం వంటివి చేయకూడదు..అనిపిస్తుంది.

 

 

పాలు, తేనె వంటివి శాకాహారం ఎలా అవుతాయి?..హింస..అహింస..

 

వీగన్ అనే వారు పాలు, నేయి, పెరుగు..వంటివి కూడా తినరు. ఇవి కూడా జంతువుల నుంచి వచ్చినవే అని వారు తినరు. పాలు జంతువుల రక్తం నుంచి తయారయ్యే పదార్ధమే అని వైజ్ఞానిక పరిశోధనలో తేలిందని, అందువల్ల అవి శాకాహారం ఎలా అవుతుందని అంటారు. 

  శాకాహారం అంటే కూరగాయలు,పండ్లు,ఆకుకూరలు, కొన్నిరకాల దుంపలు..ఇలా మొక్కలు, చెట్లనుంచివచ్చేవి.

మరి.. పాలు, తేనె వంటివి శాకాహారం ఎలా అవుతాయి? తేనెను పిండే సమయంలో కొన్నిసార్లు  ఆ తేనెటీగలు చనిపోయి తేనెలో ఉండే అవకాశం ఉంది. పాల ఉత్పత్తులు, తేనె..వంటివి ఆహారంగా తీసుకునేవారిని శాకాహారులని ఎందుకు అనాలి? 

 ************

 కొందరు ఏమంటున్నారంటే, మనుషులు కూడా చిన్నతనంలో తల్లిపాలు త్రాగుతారు, అలాంటప్పుడు తల్లిరక్తం త్రాగినట్లు కాదు కదా..అని వాదిస్తుంటారు. పెద్దవారు పాలు త్రాగటానికీ, చంటిపిల్లలు పాలుత్రాగటానికి పోలిక ఏమిటి? 

 తల్లిపాలు త్రాగే చంటిపిల్లలు కొద్దిగా త్రాగుతారు. చంటిపిల్లలు పాలు తప్ప వేరే ఆహారం తినలేరు కాబట్టి పాలు త్రాగుతారు. బడితల్లాగా పెద్దయిన వారుకూడా కాఫీలు, టీలు, పాలతో చేసిన స్వీట్స్ రుచికి అలవాటు పడి పాలపదార్ధాలు వాడుతున్నారు. 

 ఇక ప్రసాదాల్లో పాలు, నెయ్యి, పెరుగు..వాడమని గ్రంధాలలో చెప్పారు ..అంటారు. నిజమే చెప్పారు, ఆ కాలంలో పశువులు ధారాళంగా పాలను ఇచ్చిన రోజుల్లో వాటిదూడలు త్రాగగా ఇంకా పాలు మిగిలిఉండేవి. వాటిని పిండుకుని పాలు, నెయ్యి, పెరుగు చేసుకుని ప్రసాదం తయారుచేసి దైవానికి నివేదించి ప్రసాదం స్వీకరించేవారు. 

 *********

ఈ రోజుల్లో మనుషుల రుచులు పెరిగి, పాలను విరిచి పన్నీరులు, కాఫీలు, టీలు తయారీకి ఎన్ని పాలు కూడా సరిపోక పశువులకు హార్మోన్స్ ఇచ్చి కొన్నిచోట్ల వాటి దూడలను చంపి, మిషన్ల ద్వారా పాలను పిండుతున్నారు. ఇదేమి న్యాయమో ఆలోచించండి. 

 నువ్వులు వంటివాటిలో పాలకంటే ఎక్కువ కాల్షియం ఉంటుందని ఎందరో చెబుతున్నారు.

 ప్రసాదం అంటే తగుమాత్రం పుచ్చుకున్నా చాలు. అప్పుడు అందరికీ కొద్దిగా పాలు, నేయి, పెరుగు..సరిపోతాయి. అంతేకానీ భారీఎత్తున ప్రసాదాలు తయారుచేసి బోలెడంత  తినమని  వారి అభిప్రాయమని నాకు అనిపించటం లేదు .  మనం రోజూ తినే భోజనాన్ని కూడా తినేముందు దైవానికి నివేదించి తినవచ్చు. ఇది ఇంకోరకం ప్రసాదం.దీనిని కడుపునిండా తినవచ్చు. 

అయినా మనకోసం ఇతర జీవులను ఇంతలా ఎందుకు బాధపెట్టాలి? 

  శాకాహారం కాని పాల ఉత్పత్తులు, తేనె వంటి వాటిని ఆహారంగా తీసుకుంటున్నప్పుడు,    శాకాహారులని ఎందుకు అంటారని సందేహం.

 శాకాహారాన్ని కూడా ఎంతవరకో అంతవరకే తినాలి. రుచికొరకు అదేపనిగా తినటం కూడా తప్పే. అదేపనిగా తినటం వల్ల అనారోగ్యం కూడా వస్తుంది. పిల్లలు, యుక్తవయస్సు వారు సరిపడినంత పుష్టికరమైన ఆహారాన్ని తీసుకోవాలి. పెద్దవయస్సు వచ్చినతరువాత రుచికొరకు బోలెడు ఆహారాన్ని తినటం మంచిదికాదు.

******************

సాత్వికాహారం,రాజసాహారం, తామసాహారం..అని కూడా ఉన్నాయి. సాత్వికాహార నియమాలు పాటించటం చాలా  కష్టం. చద్దివి, నిల్వ ఉన్నవి,  ఎక్కువగా వేయించిన వేపుళ్లు..వంటివి తినటం కూడా తామసాహారం కోవలోకే  వస్తుందంటారు. ... ఇంకా చాలా ఉన్నాయి.  అన్యాయార్జిత సొమ్ముతో సంపాదించిన ఆహారం కూడా తామసాహారమే.

 ******************

 పశువులు ఏమైనా చనిపోతే వాటి శరీరాలను పూడ్చవచ్చు, దహనం చేయవచ్చు. లేదంటే ఇతర పశుపక్ష్యాదులకు ఆహారంగా అలా బయట వదిలేయవచ్చు..వాటిని మనుషులు తినవలసిన అవసరం లేదు.

**********************

కొంతమంది ఏమనుకుంటారంటే, సాటి జీవులను ఎక్కువగా చంపితే వీరత్వం అనుకుంటారు. ఎవరైనా తమ మనస్సును అదుపులో ఉంచుకున్న వారే వీరులు. అంతేకానీ, మూగజీవులను చంపటం వీరత్వం కాదు.

*****************

  ప్రాచీనకాలంలో రాజులు, సైనికులు యుద్ధాలలో శత్రువులను చంపవలసి వచ్చేది.   శత్రువులను చంపే విషయంలో కొంత కఠినత్వం రావటానికి..వేటకు వెళ్ళటం, జంతువులను చంపటం.. జరిగిందేమో? అని అనిపిస్తుంది....ఇలా వ్రాసిన తరువాత నాకు కొన్ని ఆలోచనలు కలిగాయి....

( యుద్ధాలు చేసుకోవటం మనుషుల తప్పు. తమపై దండెత్తి వచ్చిన క్రూరులైన శత్రువులను చూస్తే ఆవేశం దానికదే ఉప్పొంగి శత్రుసంహారం చేయాలి. అంతేకానీ, తమకు..ఆవేశం, కఠినత్వం..రావటం కొరకు మూగజీవులను చంపవలసిన అవసరం లేదు..అనిపించింది.)


యుద్ధసమయంలో కొన్నిసార్లు ఆహారం సరిగ్గా దొరకని సందర్భాలలో..దొరికిన జంతువులను చంపి తినటం .. అలా కూడా వారు మాంసాహారాన్ని అలవాటు చేసుకున్నారేమో? అనిపిస్తుంది....ఇలా వ్రాసిన తరువాత నాకు కొన్ని ఆలోచనలు కలిగాయి....


(ఇక్కడ ఒక విషయం ఏమిటంటే, ఆహారం కొరకు ప్రపంచంలో బోలెడు మొక్కలున్నాయి. బోలెడు మొక్కలు, చెట్ల నుండి బోలెడు ఆహారం లభిస్తుంది. ఆకలి వేస్తే.. ఆకులు, కూరలు, కాయలు, పండ్లు..వంటివి తిని కడుపు నింపుకోవచ్చు. పశుపక్ష్యాదుల ప్రాణాలు అంటే మనుషులకు లెక్కలేదు కాబట్టి, వాటిని చంపి తింటారు. ఆహారం కొరకు పశుపక్ష్యాదులను  చంపకూడదు..అనిపించింది.) 

***********

మొక్కలకు కూడా జంతువులకు లానే జీవం ఉంది, మొక్కలను తింటున్నట్లే జంతువులను చంపి తింటే తప్పేంటి? అని కొందరు మాట్లాడుతున్నారు. 

మొక్కలు, చెట్ల యొక్క ఆకులను, కొమ్మలను  తీస్తే కొత్త ఆకులు, కొమ్మలు పెరుగుతాయి. మరి చాలా జంతువుల విషయంలో అలా అవయవాలు పెరగవు కదా..

 మనుషులు, మొక్కలు, జంతువులు అన్నింటికి జీవం ఉంది.. అన్నీ సమానమే కాబట్టి, జంతువులను చంపి తిన్నట్లే మనుషులనూ చంపి తింటే తప్పేంటి? అని కూడా అంటారా?

మనుషులు తమకు చిన్న దెబ్బ తగిలినా కూడా గిలగిలలాడుతూ గాయం, అనారోగ్యం తగ్గాలని దైవాన్ని ప్రార్ధిస్తారు. జంతువులను చంపి తింటే మాత్రం తప్పేమిటని ప్రశ్నిస్తారు.

................................

 వేదముల ప్రకారం ఎవరైనా కూడా..వారు క్షత్రియులైనా, మరెవరైనా కూడా  మాంసాహారాన్ని భుజించకూడదని తెలుస్తుందని.. వేదముల గురించి  రీసర్చ్..చేస్తున్న వారు తెలియజేసారు.

వేదముల గురించి రీసెర్చ్ చేస్తున్నవారు ఎన్నో విషయముల గురించి తెలియచేయటం ఎంతో మంచి విషయము. 

************

నేను చదివిన, విన్న.. కొన్ని విషయాలను బట్టి క్షత్రియులు, మరికొందరు.. మాంసాహారాన్ని భుజించవచ్చేమో?..అనుకున్నాను. ..అలా భావించటం తప్పని  ఇప్పుడు తెలుస్తోంది.

***********

సంస్కృతంలో ఒకే పదానికి ఎన్నో అర్ధాలుంటాయట. ప్రతి విషయానికి ఎన్నో అంతరార్ధాలూ ఉంటాయంటారు.

 గ్రంధాలలో ఎప్పటినుంచో ఎన్నో మార్పులుచేర్పులు జరిగాయని కూడా తెలుస్తుంది.కొందరు స్వార్ధపరులు, కొందరు తెలిసితెలియనివాళ్లవల్ల ఎన్నో ప్రక్షిప్తాలు (మార్పులుచేర్పులు)జరిగాయంటారు. 

**************

వేట అలవాటు వల్ల  దశరధ మహారాజు , పాండుమహారాజు.. కష్టాల పాలయ్యారు.

**************

 సృష్టిలో పర్యావరణ సమతౌల్యం కొరకు  మొక్కలను జంతువులు తినటం, చిన్న జంతువులను పెద్ద జంతువులు తినటం ఉంది. ఎందుకంటే, మొక్కలు అన్నీ బ్రతికి పెరిగి పెద్దవయితే దగ్గరదగ్గరగా ఉండి బలంగా పెరగవు. భూసారం సరిపోదు. జంతువులు అన్నీ బ్రతికి, పెరిగితే వాటికి ఆహారం సరిపోదు. అందుకే జంతువులు ఒకదానిని మరొకటి తింటాయి.

సమతౌల్యం కొరకు మనుషులు జంతువులను తినే అవసరం లేదు.అయితే రుచి కొరకు తింటారు. మనుషులు పశుపక్ష్యాదులను పెంచి,  మరీ తింటున్నారు.

ఈ రోజుల్లో చాలామంది పర్యావరణాన్ని పాడుచేస్తున్నారు. ఇందువల్ల, కొన్ని జీవజాతులు అంతరించే పరిస్థితి వచ్చిందంటున్నారు. పర్యావరణంలో సమతౌల్యత ఉండాలంటే మానవుల జనాభా తగ్గాలి...

 హింస చేయకూడదనుకుని కొందరు.. క్రిందరాలిపడిన ఆకులను, పండ్లను తిని జీవిస్తారట. వారు  మాత్రమే గొప్పవారని, మామూలుగా జీవించేవారు తక్కువవారని చెప్పలేం. ఎన్నో నియమాలతతో ఎంతో తపస్సు చేసినా కూడా, కొందరు కొన్నిసార్లు కామక్రోధాలకు లొంగి పొరపాట్లు చేయటం జరుగుతుంది. మనస్సును నిగ్రహించుకోవటం అత్యంత కష్టం. దైవసహాయం తప్పనిసరి.

 ***********************

హింస అంటే చంపటం, తినటం ఒక్కటే కాదు. మనుషులను, పశుపక్ష్యాదులను.. మాటలతో, చేతలతో బాధించటం కూడా హింసే.

  జంతువులను ఒకదగ్గరనుంచి ఇంకొకదగ్గరికి పంపేటప్పుడు సరిగ్గా నీరు, మేత ఇవ్వకుండా చిన్న వాన్ లో కుక్కి పంపటం, జంతువులపైన విపరీతంగా బరువులను వేసి మోయించటం.. ఇవన్నీ హింసే.

 మొక్కలకు, మనుషులకు..  నెప్పి విషయంలో బాధపడే స్థాయిలో తేడాలుంటాయని అంటారు...ఈ విషయాలు సరిగ్గా అర్ధం కావట్లేదు.

 పశువులకు  ఎప్పుడైనా దెబ్బలు తగిలితే,  మనుషులలానే బాధపడటం, పెద్దగా గాయాలు తగిలితే గిలగిలా కొట్టుకోవటం మనకు కనిపిస్తుంది.మొక్కలలో అలా కనిపించదు.

 అయితే.. జుత్తు, గోర్లను కత్తిరిస్తే బాధ  ఉండదు. మత్తు ఇచ్చి ఆపరేషన్ చేసినా ఎక్కువ బాధ ఉండదు. అలా మొక్కలకు ఎక్కువ బాధ ఉండదేమో? అని కొందరి అభిప్రాయం. 

ఇవన్నీ సరిగ్గా అర్ధంకాని విషయాలు.... ఆధునిక వైజ్ఞానిక పరికరాలకు కూడా  సరిగ్గా అంతుబట్టని  విషయాలు ఎన్నో ఉన్నాయి. 

 నడిచేటప్పుడు కాళ్ళక్రింద ఎన్ని చీమలు చనిపోతాయో? అతి ఆలోచనలకు పోకుండా కొంతవరకే పాటించటం మంచిది.

మొక్కలు, పశుపక్ష్యాదులు మూగజీవులు. వాటి భావాలు మనకు సరిగ్గా అర్ధం తెలియవు,
 సృష్టిలో..ఎన్నో విషయములు..రహస్యములు..

***********

భూమి ఒక పరీక్షా లోకం.ఇక్కడ కష్టాలు, సుఖాలు రెండూ ఉండే విధంగా సృష్టి ఉంది. ఇది ఒక ఆటస్థలం, నాటకరంగం వంటిది కూడా కావచ్చు.  లౌకిక జీవితంలో ఒక గొప్ప స్థాయికి రావాలంటే ఎంతో కష్టపడాలి. మరి ఏ కష్టాలు లేని అత్యంత ప్రశాంతమైన, అత్యంత గొప్పదైన పరమపదాన్ని పొందాలంటే కొంతైనా కష్టాలు ఉంటాయి కదా. ఇక్కడ మంచిగా జీవించి దైవకృపకుపాత్రులైనవారు పైలోకాలకు చేరుకుంటారు.. పరమపదాన్ని పొందుతారు.

మనకు అర్ధం కాని విషయాలు సృష్టిలో ఎన్నో ఉన్నాయి. అవన్నీ దైవానికే తెలుస్తాయి.

*****************

 ఇక్కడ బోలెడు విషయాలు వ్రాయటం వల్ల గజిబిజిగా ఉండవచ్చు. మరికొన్ని కొన్ని విషయాలను ఈ లింక్ వద్ద చూడగలరు.

links...*  .అందరికి.. ఆంగ్ల నూతన సంవత్సర శుభాకాంక్షలండి...mari...

 *  జంతువులను చంపటం...

 *  ఈమధ్య కాలంలో వెగన్ గా

 * ఓం , కొన్ని విషయాలు ..ఇతరజీవులను చంపిన పాపానికి మర...

 

బలవంతులు బలహీనులను పీడించకూడదని మాట్లాడే హక్కు వీరికి ఉందా?

 

చాలామంది ఏమంటారంటే, సమాజంలో బలవంతులు బలహీనులను అణచివేస్తున్నారు. ఇది అన్యాయం కదా..బలహీనులకు జీవించే హక్కులేదా? అని ప్రశ్నిస్తారు. నిజమే బలవంతులు బలహీనులను అణచివేయటం ఘోరమైన తప్పే. 

 మరి ప్రపంచంలో అన్ని జీవులకూ జీవించే హక్కు ఉంది. చాలామంది మనుషులు జంతువులను ఎందుకు చంపి తింటున్నారు? 

 

 మనుషులు బలవంతులు కాబట్టి, బలహీనులైన పశుపక్ష్యాదులను బంధించటం, చంపి తినటం చేస్తున్నారు. మనుషులకు తెలివి ఉంది. రకరకాల విధాలుగా ఆలోచించి జంతువులను శాసిస్తున్నారు.

 

 ఇలా పశుపక్ష్యాదులను బాధపెట్టేవారికి, చంపి తినేవారికి ..బలహీనులను బలవంతులు శాసించకూడదని మాట్లాడే హక్కులేదు. 

 

 మనకు బుద్ధి బలం ఉంది కదా ..అని జంతువులను ఎన్నో విధాలుగా వాడుకుంటున్నాము. వాటిని తాళ్లతో కట్టి, పొలాలలో బండ్లకు కట్టి వ్యవసాయం చేస్తాము. అవి ఎదురుతిరగలేవు కాబట్టి అలా బాధను అనుభవిస్తున్నాయి. 

బండిలాగకుంటే చర్నాకోలతో కొట్టి నడిపిస్తారు. అదే మనుషులతో బండిలాగిస్తే అన్యాయం.. అంటూ గుండెలు బాదుకుంటారు. 

 

నొప్పి,బాధ.. మనిషికైనా, జంతువుకైనా ఒకటే. మనుషులు నీతులు చెప్పటం కాదు, నీతులను ఆచరించాలి. ఉదా.. మూగ జీవులపట్ల దయతో ఉండాలి. వాటిని చంపి తినకూడదు..అలా తింటున్నవారికి ..బలహీనులను బలవంతులు పీడించకూడదని మాట్లాడే హక్కులేదు. 

 ..............

  ఎవరికైనా.. గతజన్మలోనో, ఇప్పుడో చెడుకర్మలు చేసినప్పుడు ఆ చెడుకర్మల ఫలితంగా కష్టాలు వస్తాయి. మూఢనమ్మకాలు ఉండి.. వాటితో కుటుంబసభ్యులను, ఇతరులను ఇబ్బంది పెట్టినా కూడా కష్టాలు వచ్చే అవకాశముంది.

 కష్టాలను పోగొట్టుకోవటానికి పరిహారాలపేరిట ఇతరజీవులను బాధకుగురిచేసి జీవహింస వంటివి చేస్తే తాత్కాలింగా కొందరికి కష్టం తగ్గినట్లు అనిపించినా..జీవహింస చేసినందుకు  భవిష్యత్తులో ఇంకా కష్టాలు వచ్చే అవకాశముంది..గతంలో పాపాలు చేసినందుకు వచ్చిన కష్టాలను పోగొట్టుకోవటానికి , జీవహింస చేయటం అనే కొత్త పాపం చేసి కొత్త కష్టాలు తెచ్చుకోవటం ఎందుకు? 

ఒక విషయమేమిటంటే,  వేదాలలో జంతుబలులు..వంటివి లేవని, తరువాతకాలంలో కొందరి వల్ల జంతుబలులు వంటివి మొదలయ్యాయని.. వేదాలగురించి పరిశోధనలు చేస్తున్న వేంకట చాగంటి గారు తెలియజేసారు.

 

 మనుషులు చెడును బలి చేయటానికి (వదిలివేయటానికి) ప్రయత్నించవచ్చు..
చెడ్డపనులు చేయకుండా.. ఇతరజీవులను బాధపెట్టకుండా ఉండటానికి ప్రయత్నిస్తూ.. దైవప్రార్ధన చేస్తూ మంచిపనులు చేస్తూ ఉంటే..  కష్టాలు తగ్గే అవకాశముంటుంది.

*************

 కొందరు కొన్ని జీవులను ఉదా..పీతలు..వంటివాటిని పట్టుకుని అవి బ్రతికుండగానే వాటి కాళ్ళు, చేతులు విరిచి వేడినీటిలో వేయటం చేస్తారు. ఆ ప్రాణులకు బాధ, భయం, నొప్పి ఉంటాయి. కొన్ని దేశాల వారు ఆ జీవులు బ్రతికుండగానే  వాటిపై ఉప్పు, కారం..వంటివి వేసి ప్లేటులో పెట్టి వాటిని తుంపి తినటం చేస్తారని, అలా తినటం ఫేషన్ గా ఉందని వార్తల ద్వారా తెలుస్తోంది.

 ఇలాంటి రాక్షస ప్రవృత్తి కలవారికి, తోటి జీవులను హింసించిన పాపానికి తాము కూడా ఇతరజీవుల ద్వారా హింసించబడే పరిస్థితి ఉండవచ్చు. తాము చేసిందే తిరిగి తాము అనుభవించే పరిస్థితి వస్తే మాత్రం బాధ తట్టుకోలేక అందరిని నిందిస్తారు. దైవాన్ని కూడా నిందిస్తారు కొందరు.

బాధలు లేకుండా ఉండాలంటే ఎవరూ ఇతర జీవులను హింసించకూడదు. 

 

 కష్టాలలో ఉన్నవారికి సాయం చేయాలి. కష్టాలలో ఉన్నవారికి సాయం చేస్తే, సాయం చేసినవారికి పుణ్యం లభిస్తుంది. అంతేకాని, వారు చేసిన పాపాలను అనుభవించనీ..అనుకోకూడదు.అలా అనుకోవటం తప్పు.

 

**********

 మనం నడిచేటప్పుడు మన కాళ్ల క్రింద కొన్ని జీవులు మరణించే అవకాశముంది. అందుకు మనం ఏమి చేయలేము. మనల్ని ఏదైనా జీవి హింసించటానికి ప్రయత్నించినప్పుడు మనం ఆ జీవులను ఎదుర్కుని మనల్ని కాపాడుకోవాలి. అలాంటప్పుడు పాపం ఉండదు.

 మనం పనికట్టుకుని ఇతరజీవులను హింసిస్తే మాత్రం పాపం వచ్చే అవకాశముంది.ఏది పాపం ? ఏది పాపం కాదు? ఏది ఎంత పాపం? అనేవి ఆ సందర్భాన్ని బట్టి ఉంటుంది.

ఈ రోజుల్లో చాలామందిలో అత్యాశ, అహంకారం, పాపప్రవృత్తి పెరిగింది. వాళ్ళ కోరికలు కూడా చెడ్డగా ఉంటున్నాయి. ఉదా..చాలామంది అభిప్రాయాలు ఎలా ఉంటున్నాయంటే, ఇతరులను హింసించి అయినా తాము డబ్బు సంపాదించాలని, ఎన్ని పాపాలు చేసి అయినా తాము విలాసాలు అనుభవించాలని కోరుకుంటున్నారు. ఇలా ఎక్కువమంది చెడ్డకోరికలు కోరుకోవటం వల్ల ప్రపంచంలో చెడు ఎక్కువగా జరుగుతోందేమోనని నాకు అనిపిస్తోంది..

 మనం ఏది భావిస్తే అది జరిగే అవకాశముందని అంటారు కదా..ప్రపంచంలో మనుషుల భావనలు మంచిగా ఉంటే ప్రపంచంలో మంచే జరుగుతుంది. అలా కాకుండా ఎక్కువమంది అత్యాశ, స్వార్ధం ..వంటి వాటితో జీవిస్తున్నపుడు చెడే జరిగే అవకాశముంది.

 ప్రపంచంలో మంచి జరగాలంటే, అందరూ మంచి భావనలతో ఉండాలి.కోపతాపాలు తగ్గించుకోవాలి.

********************

oka link...

  మొక్కులు తీర్చగలమో ? లేదో? ..మరికొన్ని విషయాలు..

 

 

చూసినవారు ఏమైంది? అన్నారు..

 

నేను కొంతకాలం క్రిందట ఏమనుకున్నానంటే, కుదిరినంతలో.. బెండకాయ, పనసపండు తినకూడదనుకున్నాను.అయితే ఆ విషయంలో చిత్రమైన విషయాలను ఫేస్ చేస్తున్నాను.

 నాకు చాలా పదార్ధాలు ఇష్టమే కానీ, బెండకాయ అయితే అన్ని కూరల్లో కలపరు కదాని.. బెండకాయను తినకూడదనుకున్నాను. అయితే భోజనాలకు వెళ్లినప్పుడు సాంబారులో, పులుసులో బెండకాయ వేసారేమో తెలియదు. అవి వద్దంటే ప్రక్కన కూర్చున్నవారు మీరు అన్నీ వద్దంటారేమిటి? అని ఆరాలు అడుగుతారు.

 తెల్లటి పంచదారలో ఎముకలపొడి కలుపుతారని ఎక్కడో చదివి స్వీట్స్ తినటం తగ్గించాను.అయితే, దేవుని ప్రసాదాలను తింటాను. 

ఒకసారి భోజనాలలో స్వీట్స్ వద్దంటే నా ప్రక్కనకూర్చున్న వారు నీకు సుగర్ ఉందా? అని అడిగారు. సుగర్ లేదన్నాను. మరి ఎందుకు స్వీట్స్ వద్దంటున్నావు అని అడిగారు. నేను పంచదార.. ఎముకలపొడి ..అన్నీ చెప్పవలసి వచ్చింది. బెల్లంతో చేసిన స్వీట్స్ తింటానన్నాను.

 బెల్లం తయారీ ఎప్పుడైనా చూసావా? తయారీలో బోలెడు చీమలు, ఈగలు చస్తాయి అన్నారు.

 ఆర్గానిక్ బెల్లం మొదలుపెట్టి కొంత సంతోషంగా ఉండగా పేపర్లో ఒక న్యూస్ చదివాను. వాళ్లెవరో కెమికల్స్ కలపని ఆరోగ్యకరమైన బెల్లం తయారీ విధానం గురించి వ్రాస్తూ ..బెండకాయజిగురు కలపటం వల్ల ఇలా సాధించగలిగామని ఆనందంగా వ్రాసారు. 

అది చదివి నాకు నీరసం వచ్చింది..నేనేదో సుగర్ తిందామనుకుంటే ఇలా జరుగుతోంది, బెల్లం బెండకాయను కలపటమేమిటి? ఎప్పుడైనా ఊహించామా? అయినా నేను తినకూడదనుకున్న బెండకాయ ఈ బెండకాయ వేరే జాతివి లా ఉన్నాయి. బెండకాయ అంటే అన్ని బెండకాయ జాతులూ తినకూడదా? ఇలా ఎన్నో సందేహాలు కలిగాయి. 

ఇక చెరుకురసం తెచ్చి పంచదార చేసుకుని వాడాలేమో..చెరుకుగడ పైన శుభ్రంగా కడగాలి,లోపల పుచ్చులు లేకుండా చూడాలి..అతిగా ఆలోచిస్తే అన్నీ కష్టాలే అని తెలుస్తోంది. 

(నా సంగతి అలా ఉంచితే, కెమికల్స్ కలపకుండా బెండకాయ జిగురు కలిపి మంచిగా బెల్లాన్ని తయారుచేయడం మంచి విషయం.) 

......

శాస్త్రప్రకారం గుడాన్నం తయారీకి కొన్ని నియమాలున్నాయి. ఎలా తయారుచేయాలో పదార్ధాల వివరాలు కూడా ఉన్నాయని పండితులు తెలియజేసారు. అయితే ఈ రోజులలో కొన్నిరకాల బెల్లం లో  కొన్ని రసాయనాలు, బెండకాయ జిగురు వంటివి కూడా కలుపుతున్నారు.  ఇలాంటి పదార్ధాలను వాడితే మరి, శాస్త్రప్రకారం సరైనదేనా? కాదో? తెలియదు.

.......

ఇక పనసపండు సంగతి..

ఒక ఫంక్షన్ లో భోజనాలకు వెళ్తే స్పీడుగా వడ్దించుకుంటూ నా విస్తరాకులో పులావ్ వడ్దించారు. తినబోతుంటే అందులో నుంచి ఒక్స ముక్క బైటపడింది. ఇదేమిటని చూస్తే పనసముక్క, అది పనసబిర్యానీ.

 ఒక్క ఉదుటున తేరుకుని ప్రక్కన పెట్టేసాను. చూసినవారు ఏమైంది? అన్నారు. నేను పనసపండు తినను అన్నాను. వివరాలు తెలుసుకుని, పనసపండు తినకూడదనుకున్నప్పుడు పనసకాయ తినవచ్చని సలహా ఇచ్చారు. అయోమయంతో చిరాకు కలిగి, నేను తిననన్నాను.

విస్తరాకును మార్చుకుంటే బాగుంటుందనిపించింది కానీ, విస్తరాకులో అప్పటికే కొన్ని పదార్ధాలను వడ్దించారు. ఇక చేసేదేమీ లేక పులావును ప్రక్కకు జరిపి జాగ్రత్తగా తిన్నాను. 

ఎవరైనా విస్తరిలో పదార్ధాలు వదిలేస్తే, అలా పదార్ధాలు వేస్ట్ చేయటమెందుకు ? ముందే వేయించుకోకుండా ఉండవచ్చు కదా.. అని విమర్శించే నేను అలా పనస పులావు ప్రక్కన వదిలేయవలసి వచ్చింది.

 ఈమధ్య ఇంకో న్యూస్ ఏమిటంటే, పనసగింజలు ఎంతో బలవర్ధకమైన ఆహారం కాబట్టి, వాటిని పొడి చేసి అన్నింట్లో కలిపి తింటే మంచిదని వ్రాసారు. ఇదెక్కడ ఖర్మ.. అందరూ నేను తినకూడదనుకున్న వాటిపైనే రీసెర్చులు చేస్తున్నారేమిటి..ఇక పనసపొడిని అన్నిటిలో కలుపుతారో ఏమిటో? అని సందేహాలు కలిగాయి. 

కలిపితే కనీసం ప్యాకెట్ పైన వివరాలను వ్రాయాలి. నేను ఎప్పుడైనా కేరళ వెళ్తే జాగ్రత్తగా ఉండాలి. అక్కడ పనసపండు ఎక్కువగా వాడుతారు కదా.. 

ఇవన్నీ పాటించలేక,  నేను ఇప్పుడు మామూలు బెల్లం,పంచదార కూడా కొంతవరకూ తింటున్నాను.అయితే, ఇప్పుడు ఆర్గానిక్ పంచదార అని కూడా అమ్ముతున్నారు. 

బయట భోజనాలలో వంకాయలలో పుచ్చులు సరిగ్గా తీయరేమోననే భయంతో వంకాయ కూర అంతగా తినను. ఇంట్లో తింటాను. ఇలా నా బాధలు నాకు ఉన్నాయి. అయితే  కొందరు ఊరుకోకుండా, అలా వద్దంటావేమిటి? అని ప్రశ్నలు అడుగుతారు.

..................................

 ఫలాపేక్ష, కాయాపేక్ష వదిలేయాలని అంటే..కాయం అంటే శరీరం. కాయాపేక్ష అంటే శరీరంపై ఉండే అతి మోహం. ఫలాపేక్ష అంటే మనం చేసే పనుల వల్ల లభించే ఫలం (ఫలితం) పట్ల అత్యాశ, అతిమోహం. వీటిని వదిలేయాలని అసలైన అర్ధం అని చదివాను.

కష్టాలు తీరటం..

 

కొందరు ఏమంటారంటే, ఎంతో డబ్బు ఖర్చుపెట్టి ఎన్నో పూజలు చేసాము. అయినా మాకు కష్టాలు తీరటం లేదు అంటారు.

 ఇలాంటప్పుడు కొంతకాలం మామూలుగా పూజ చేసుకోవచ్చు,  నిత్యపూజ చక్కగా చేసుకోండి. ఎవరేది చెబితే అవి అన్నీ చేయనవసరం లేదు... దైవనామస్మరణ, దైవాన్ని స్మరించుకోవటం సులభం.

ఎందుకంటే, పూజలు చేసినా కష్టాలు తీరటంలేదు అనటం తప్పు. ...కష్టాలు తీరకపోవడానికి ఎన్నో కారణాలుంటాయి.

 ఎవరికైనా గతంలో చేసిన పాపాల వల్ల కష్టాలు వస్తాయి. గతజన్మలోనో, ఈ జన్మలోనో వారు చేసిన తప్పులు వారికి గుర్తు ఉండకపోవచ్చు. 

ఇప్పుడు పాపాలు చేయటం మాని, పుణ్యకార్యాలు చేస్తుంటే కష్టాలు తగ్గే అవకాశముంది. అందుకు కొంత సమయం పట్టవచ్చు. 

 కొందరికి తాము తప్పులు చేసినా కూడా అవి తప్పులుగా అనిపించవు. మేము ఎప్పుడూ పాపాలు చేయలేదు. అయినా కష్టాలు వచ్చాయని వాపోతారు. 

ప్రత్యేకమైన పెద్ద పూజలు చేయటం కొంత మాని, పేదవారికి, ఆపదలో ఉన్నవారికి సాయం చేయవచ్చు. గోవులకు, మూగజీవులకు చక్కటి ఆహారాన్ని అందిస్తే పుణ్యం వస్తుంది. 

అలాగని గోవులకు, ఇతరమూగజీవులకు ఏదిపడితే అది తినిపించకూడదు. అలా తినిపిస్తే పుణ్యానికి బదులు పాపం వస్తుంది. వాటి ఆహారం ఏమిటో సరిగ్గా తెలిసినవారిని అడిగి తినిపించాలి.

 కొన్ని ప్రత్యేకంగా చేసే పూజలు ఎన్నో నియమాలతో చేయాలి. పూజలో తప్పులు వస్తే ప్రాయశ్చితం చేసుకోవాలట. పూజలకు వాడే ద్రవ్యాలు కల్తీ కానివి వాడాలి. అన్యాయంగా ఆర్జించిన సొమ్ముతో పూజలు చేయకూడదంటారు.

 కష్టాలు వచ్చాక బాధలు పడేకన్నా, ముందే దైవభక్తి కలిగి, మనస్సును చెడు వైపుకు వెళ్ళకుండా నియంత్రించుకోవటానికి ప్రయత్నించాలి. శక్తి చాలకుంటే దైవాన్ని ప్రార్ధించుకోవాలి. 

................ 

ప్రతిపనికి కొన్ని నియమాలు ఉంటాయి.
ఉదా..పెట్రోల్ బంక్ కు వెళ్తే పరిసరాల్లో అగ్గిపుల్ల వెలిగించకూడదని, సెల్ఫోన్లు మాట్లాడకూడదని  జాగ్రత్తలు చెబుతారు. కారణాలు మనకు తెలుసు.

 ప్రాచీనకాలంలో ఏ నియమాలను ఎందుకు పెట్టారో మనకు ఇప్పుడు తెలియదు. వాటి అంతరార్ధాలు మనకు తెలియకపోయినా , కొన్ని నియమాలను పాటించితే  మంచిది.  అయితే, గ్రంధాలలో మార్పులు చేర్పులు జరిగాయని..అంటే ప్రక్షిప్తాలు కూడా ఉన్నాయని అంటారు. 

లౌకికజీవితంలో మంచి ఉద్యోగం రావాలన్నా చిన్నతనం నుంచి కష్టపడి చదవాలి. మరి, మోక్షాన్ని పొందాలంటే కొన్ని నియమాలను కష్టమైనా పాటించాలి.

 .................................

సమాజం సవ్యంగా నడవాలంటే ఎన్నో వృత్తుల వారు ఉండాలి. కొన్ని వృత్తుల వారికి  ఎక్కువగా నియమాలను పాటిస్తూ... చాలా సమయం  ఒక దగ్గర కూర్చుని పూజలు చేయటానికి కుదరదు.

 అలాంటి వారు బోలెడు పూజలు చేయకపోయినాకూడా, నిత్యపూజలు, కొన్ని పండుగలు, కొన్ని పూజలు చేసుకున్నా కూడా బోలెడు పూజలు చేసిన ఫలితం వస్తుందని ప్రాచీనులు తెలియజేసారు. సులభమైన సడలింపులు ఉండగా,  పెద్ద ఎత్తున పూజలు చేస్తామని ఉబలాటం ఎందుకో తెలియటం లేదు.

............

కొందరు ఎంతో కష్టపడి ఎన్నో సంవత్సరాలు కఠిన నియమాలను పాటిస్తూ వేదములను, మంత్రాలను ..నేర్చుకుంటారు. 

బోలెడు సంవత్సరాలు అలా నియమాలను పాటిస్తూ అవన్నీ నేర్చుకుని ప్రత్యేకమైన పూజలు చేయటం అందరూ చేయలేరు. 

 

అలా ప్రత్యేకమైన పూజలు చేసే వారిని పిలచి, వారితో  ప్రత్యేకమైన పూజలను చేయించుకోవచ్చు.

..................................

 కొన్ని పూజలకు ఎన్నో నియమాలను పాటించవలసి ఉంటుంది. ఎలాపడితే అలా చేస్తే మంచిదికాదు. కొందరు  ఎవరు ఏది చెబితే అది చేస్తుంటారు. అలాకాకుండా కొన్ని జాగ్రత్తలు తీసుకోవాలి.

సంస్కృతంలో పలికేటప్పుడు కొన్నిసార్లు  కొద్దిగా తేడా వచ్చినా , అర్ధం మారిపోయే అవకాశం ఉంది.  దైవాన్ని తిట్టినట్లు అర్ధం మారిపోయే అవకాశముంది. ఇలా తప్పులు చదివితే పుణ్యానికి బదులు పాపం వచ్చే అవకాశముంది.

ఇలాంటప్పుడు, అనేక నామాలను చదవటం కన్నా తేలికగా తప్పులు రాని నామాలను చదువుకోవటం మంచిది.   ఈ రోజుల్లో కొన్ని పుస్తకాలలో తప్పులుంటున్నాయి. మాతృభాషలో దైవాన్ని పూజించుకోవటం కూడా మంచిదే.

దేవాలయాల వద్ద మైకులలో కూడా, కొన్ని తప్పుగా పాడిన కొన్ని కేసెట్లు వేస్తున్నారు.

 ........................

మంత్రాల గురించి సరిగ్గా నేర్చుకోకుండా ఎలా పడితే అలా చదవటం, కొత్తకొత్త పూజలను తోచినట్లు చేసి కొత్త కష్టాలను కొనితెచ్చుకునే కన్నా, చేతనైనంతలో నిత్యపూజలు,పండుగలు..చేసుకోవటం, చక్కగా దైవాన్ని స్మరించుకోవటం, భక్తిగీతాలను పాడుకోవటం, భజనలు చేయటం..వంటివి మంచిదనిపిస్తుంది.

 

   కలికాలంలో బోలెడు నియమాలను సరిగ్గా పాటించటం అందరికి సాధ్యం కాదు.  కలికాలంలో  ఎవరైనా దైవనామస్మరణ చేసి కూడా తరించవచ్చని  ప్రాచీనులు  తెలియజేసారు.  

 ....................................... 

  ఆచారం అని, తమకోరికలు, కష్టాలు తీరటానికి అని, కొందరు జీవహింస చేస్తారు. చాలా మతాల్లో కోరికలు, కష్టాలు తీరటానికి జీవహింస చేస్తారు.

 కష్టాలు, కోరికలు తీరాలంటే, దైవస్మరణ, చేతనైనంతలో ఇతరులకు, ఇతరజీవులకు సాయం చేయటం..వంటివి చేస్తే క్రమంగా మన కష్టాలు, కోరికలు తీరే అవకాశం వస్తుంది... 

అంతేకాని, కష్టాలు, కోరికలు తీరటానికి జీవహింస చేయటం వల్ల మంచి జరగకపోగా, కొత్త కష్టాలు వస్తాయి. దైవం పేరుచెప్పికూడా జీవహింస చేయటం ఎంతో పాపం.

...............................

 ఇప్పుడు అందరికీ అందుబాటులోకి ఫోన్లు వచ్చాక తేలికగా ఒక కామెంట్ పెట్టేస్తున్నారు..ఈ విషయంలో ఏం చెయ్యాలి? అని.  అవన్నీ చదివిన వారికి మరిన్ని సందేహాలు, అనుమానాలు వస్తుంటాయి..

 సందేహాలను అడగటంలో తప్పులేదు గానీ, అదేపనిగా సందేహాలతోనే జీవితమంతా సతమతమయితే, సందేహాలతోనే సమయం గడిచిపోతుంది.

ఇలా అనేక సందేహాలను అడుగుతున్న వారు జీవితంలో ఇతరులను బాధపెట్టకుండా, పాపాలు చేయకుండా ఉంటున్నారా? అన్ని పనులను సత్ప్రవర్తనతో ఉంటూ సవ్యంగా చేస్తున్నారా?

ఇవన్నీ పాటించటం కూడా ముఖ్యమే. ఇది కూడా పూజలో భాగమే.

అంటుముట్టు....

 

ఇక నెలసరి విషయంలో ఎన్నో చెబుతున్నారు. 4 రోజుల వరకూ కొన్ని నియమాలను పాటించటం ఫరవాలేదు.

 ఈ రోజుల్లో కొందరికి ఎక్కువరోజులు రక్తస్రావం కనిపిస్తోంది.
అలా జరిగినప్పుడు వారిని, వారింట్లో వారిని కూడా పూజలు చేసేవారు ముట్టుకోకూడదని కొందరు అంటున్నారు. లేదంటే వారు ముట్టులో ఉన్నామని చెప్పాలంటున్నారు. ఆడవాళ్ల నెలసరి పరిస్థితి గురించి ఎప్పటికప్పుడు అందరికీ చెప్పుకోవటం ఇబ్బందిగా ఉంటుంది. 

  

నాకు ఏమనిపించిందంటే,ఊళ్లో ఉన్న దేవాలయానికి వెళ్ళాలంటే ఇంట్లో స్నానం చేసి బస్సులు,లోకల్ రైళ్లు ఎక్కుతారు. అలాంటప్పుడు ప్రక్కన ఉండేవారిలో అంటు ఉన్నవారు ఉండవచ్చు. అందరికీ కార్లు ఉండవు కదా..కార్లు ఉన్నా కూడా కారును కూడా శుద్ధిచేయాలి మరి, ఇంతకుముందు ముట్టు ఉన్నప్పుడు కార్ ఎక్కిఉండవచ్చు కదా.. 

 

  అంతెందుకు ఈ రోజుల్లో చాలామంది అపార్ట్మెంట్స్లో ఉంటున్నారు. ఎక్కడికి వెళ్లాలన్నా లిఫ్ట్ ఎక్కిదిగాలి.లిఫ్ట్లో మైల ఉన్నవారు ఎక్కవచ్చు. వారు ముట్టుకున్న లిఫ్ట్ తలుపే అందరూ ముట్టుకుంటారు.మెట్లు ఎక్కిదిగినా వారు నడిచిన దారే కదా నడవాలి.ఈ రోజుల్లో అతిగా చెపితే అసలుకే మోసం వచ్చే ప్రమాదముంది. 

 దైవస్మరణకు అంటుముట్టు ఉండదు ..చక్కగా దైవస్మరణ చేసుకోవచ్చు . 

  అయితే, శరీరం సున్నితంగా ఉండే నెలసరి సమయంలో ఎక్కువపనులు చేయకూడదు. విశ్రాంతి తీసుకోవాలి. ఎక్కువగా పనిచేస్తే అనారోగ్యం కలిగే అవకాశాలున్నాయి. అందువల్ల 4రోజుల విశ్రాంతి మంచిదే. అయితే నియమాల పేరుతో అతిగా చేయకూడదు.

 

కొన్నిసార్లు ఏదైనా ఫంక్షన్ అనుకుని అందరినీ పిలిచి ఫంక్షన్ జరుగుతున్నప్పుడు సందేహాస్పదంగా తెలుపుఎరుపూ కానీ రంగులో అతికొద్దిగా స్రావం కనిపించవచ్చు.కొద్దిగా కనిపించి తరువాత ఆగిపోవచ్చు. అనారోగ్యకారణాల వల్ల టెన్షన్ తో ఇలా జరగొచ్చు.

 అప్పుడు ఏం చేయాలో తెలియదు. బోలెడు ఖర్చుపెట్టి ఫంక్షన్ జరుగుతుంటే విషయం చెప్పి ఫంక్షన్ ఆపేయమని చెప్పలేరు. భయంతో నిజంగా రక్తస్రావం కనిపించినా చెప్పకుండా ఊరుకుంటారు . 

 మాకు ఇద్దరు పిల్లలు. అబ్బాయి ఇంజనీరు.అమ్మాయి డాక్టర్. అబ్బాయి దైవపూజ చేస్తాడు. అమ్మాయి డాక్టర్. అమ్మాయి దైవపూజ  చేస్తుంది  కానీ.. ఇన్నిరకాల ఆచారవ్యవహారాలను పాటించటం నావల్లకాదంటుంది.

 కొన్నిసార్లు..ఎవరైనా కష్టంలో ఉన్నప్పుడు అంటుముట్టు అనే భావనతో  వారికి సాయం చేయకపోవటం తప్పు.

 నూటికినూరుశాతం  అంటుముట్టు నియమాలను పాటించాలంటే చాలా కష్టం. మనం ఎంత ఇంట్లో కూర్చున్నా కూడా ఏదో విధంగా మనకు చేరే అవకాశముంది.  ఉదా..కూరగాయలు, పువ్వులు, పండ్లు, దుకాణాలలో సరుకులు..ఇవన్నీ కొనక తప్పదు. కూరగాయలను  అమ్మే వారు నెలసరిలో ఉండవచ్చు.వారు ఆ వస్తువులను తాకి మనకు ఇస్తారు కదా..

    పాతకాలంలో పాటించే పద్ధతులను చాలావాటిని ఇప్పుడు పాటించలేకపోతున్నాం.  ఉదా..పాతకాలంలో స్త్రీలు..  బయటకు వెళ్లేవారు కాదు. ఈ రోజుల్లో అలా వెళ్ళొద్దని చెప్పగలమా? చెప్పినా వినేవాళ్ళెందరు?

  నెలసరి  ఆచారం  సరిగ్గా పాటించాలంటే, నెలసరి రోజుల్లో స్త్రీలు బయటకు వెళ్ళకూడదు. అలా ఎందరు పాటిస్తున్నారు?  కాలానుగుణంగా ఆచారాలను మార్చుకుంటున్నారు. ఉదా..ఈరోజుల్లో కాలేజీలకు, ఆఫీసుకు వెళ్ళే ఆడవాళ్లు నెలసరిరోజుల్లో బయటకెళ్ళి అంటుముట్టు  కలిపేస్తున్నారు..

ఈ విషయంలో ఆచారం గురించి ఏమంటారంటే, ఈరోజుల్లో స్త్రీలు బయటకు వెళ్ళకతప్పదు కాబట్టి, వెళ్ళవచ్చంటారు. బయటకెళ్ళి అంటుముట్టును అందరికి కలిపేసినా, ఇంటికొచ్చి దుస్తులు మార్చుకుంటే సరిపోతుందంటారు..కానీ, నెలసరిలో ఉన్న స్త్రీలు తప్పనిసరి పరిస్థితిలో ఇంట్లో వంటచేస్తే మాత్రం దోషం అంటారు.

అంటుముట్టును ఇంట్లో కలిపితే దోషం ఇంట్లో వారికే ఉంటుంది. బయటకలిపితే అందరికీ దోషం తగులుతుంది ..ఇంకా, అలా అందరికీ కలిపిన దోషం.. కలిపినవారికి ఇంకా ఎక్కువ ఉంటుంది..

ఎన్నో విషయాలను ఎవరికి అనుగుణంగా వారు మార్పులుచేర్పులు చేస్తూఉన్నారు.  వంటచేయకూడదని చెబుతున్నప్పుడు.. బయటకు వెళ్ళకూడదని కూడా స్త్రీలకు గట్టిగా చెప్పగలరా?

ఇలా రాయటం ఎవర్నీ తప్పుపట్టాలని కాదు. నెలసరిలో పూజలు చేయవచ్చని నా అభిప్రాయం కాదు.  తప్పనిసరి పరిస్థితిలో ఇంట్లో వంట చేసుకోవచ్చు..అని నా అభిప్రాయం. అలా చేయటం తప్పో..ఒప్పో ఏం చేయగలం?  

అయినా, నెలసరిలో పక్కన కూర్చునే అలవాటులేని కుటుంబాలలో ఈరోజుల్లో ఇవన్నీ పాటించాలంటే కష్టం.  అర్ధం చేసుకోనప్పుడు,  మనుషులకు పదేపదే  చెప్పుకునే కన్నా, దైవానికి చెప్పుకోవటం మంచిది.

 రజస్వల ఉన్నవారు ఒక మూలన కూర్చోకుంటే, వారి ఇంట్లో వారిని కూడా పూజలు చేసే వారు ముట్టుకోకూడదంటున్నారు. మరి, వైద్యులు రోజూ హాస్పిటల్ కు వెళ్తారు.  ఎందరో  ఇతర సిబ్బంది..ఉంటారు. నెలసరి ఉన్నవారుంటారు. కొన్నిసార్లు రోగులు చనిపోతారు. ఇక వైద్యులు , హాస్పిటల్స్ లో ఇతర సిబ్బంది,  వారి కుటుంబసభ్యులు   పూజలు చేసుకోకూడదా? వారిని ఎవ్వరూ  తాకకూడదా? ఇవన్నీ పాటించటం . ఇవన్నీ చాలా కష్టం.  కొంతవరకే పాటించగలరు. 

 ..................................

నేను ఒకసారి సూపర్ బజార్ కు వెళ్లినప్పుడు, సరుకులు తీసుకుని బిల్ పే చేసి సర్దుకుంటుంటే,  బిల్ చేసి నాకు ఇచ్చిన అమ్మాయి పక్కన ఉన్న ఇంకో అమ్మాయితో.. తనకు నెలసరి వల్ల నీరసంగా ఉందని చెబుతోంది.  నేను ఇంటికి వచ్చాక,  కొన్ని పసుపు నీటిని సరుకులపై చల్లాను.

షాప్స్ లో పనిచేసేవారికి కూర్చోవటానికి కూడా ఎక్కువవీలు కుదరదు.  స్త్రీలకు  నెలసరి, గర్భధారణ సమయంలో మరికొంత విశ్రాంతి అవసరం. మగవాళ్లకు కూడా కాళ్లనొప్పులుంటాయి.

......................
బస్సులో గుడికి వెళ్తే బస్సులో కాలేజీలకు, ఉద్యోగానికి వెళ్లే స్త్రీలుంటారు. వాళ్ల మధ్య బస్సులో కూర్చోవాలి. మరి అలాగే గుడికి వెళ్ళవలసి వస్తుంది.

 స్త్రీలు బయటకు తిరుగుతున్న ఈ రోజుల్లో నెలసరి వాళ్ళు తగలకుండా ఎలా ఉండాలో అర్ధం కావటం లేదు. 

................................ 

 నేను ఎవరినీ బాధపెట్టాలని  ఈ విషయాలను వ్రాయలేదు. ఇంట్లో ఉండే స్త్రీల విషయంలో కూడా నెలసరి సమయంలో పక్కన కూర్చుంటే చిన్న పిల్లలకు కష్టం.ఈ రోజుల్లో చిన్న కుటుంబాల్లో భర్త ఆఫీసుకు వెళ్తే, పిల్లలు స్కూల్ నుంచి వస్తే పిల్లల్ని చూసుకోవాలి. ఇలా ఎన్నో పనులు ఉంటాయి.

    మనలో కూడా  దైవం ఉంటారని అంటారు.  దైవం సర్వాంతర్యామి. అయితే, సూర్యకాంతి.. మురికి నీటిపైన పడినా కూడా సూర్యునికి మురికి అంటదు.  మన లో దైవం ఉన్నా కూడా , మనుషులు చేసే పాపాలతో దైవానికి  సంబంధం ఉండదు. మనుషులు చేసే పుణ్యాలు, పాపాలను బట్టి మనుషులకు  కర్మఫలితం ఉంటుంది.

  మలమూత్రాలతో కూడిన శరీరంతోనే పూజలను చేస్తాము. ఉమ్మి ఉన్న నోటితోనే స్తోత్రాలను చదువుతాము. మానవశరీరాలు ఇలాగే సృష్టించబడ్దాయి. అలాగని మురికిగా ఉండకూడదు. 

  ఆచారవ్యవహారాలను అసలే వదిలేయమని కాదు. ఆచారవ్యవహారాలను పాటించాలి. పూర్వీకులు తెలియజేసిన ఆచారవ్యవహారాలలో ఎన్నో చక్కటి విషయాలు ఉన్నాయి. విచక్షణతో పాటించాలి.

 ***************

నెలసరి దోషాల గురించి విన్నప్పుడు ఎన్నో సందేహాలు వస్తాయి. నెలసరి ముట్టు.. మహా దోషం అయినప్పుడు, నెలసరిలో స్త్రీలు బయటకెళ్ళి..  కలిపేసి రావటం మహాపాపం. ఇలా బయట కలిసిన దోషాల వల్ల కూడా సమాజంలో ఎన్నో కష్టాలు వస్తున్నాయేమో?

  కొందరు బయట కలిపి, ఇంటికొచ్చి పక్కన కూర్చుంటారు.  అంటే, ఇంట్లో కలుపుకోకుండా బయటమాత్రం కలుపుతారు. అలా బయట తిరిగి నెలసరి దోషాన్ని కలిపిన వారికి.. ఆ పాపం తగులుతుందా? తగలదా? 

కొందరు ఏం చేస్తారంటే, నెలసరిలో ఇంట్లో ఏమీ ముట్టుకోకుండా స్ట్రిక్టుగా ఉంటారు. బయటకొచ్చి అందరి మధ్య తిరుగుతారు.ఇంట్లో కలపకూడదని, ఇంటికొచ్చి పక్కన కూర్చుంటారు. మరి, వాళ్లలానే అందరికి పట్టింపు ఉంటుంది కదా..బయటకొచ్చి అంతా కలిపితే అందరికి ఆ దోషం తగలదా?

***********

 ఈ రోజుల్లో కొందరు స్త్రీలు.. వంట మేమే చేయాలా? ఎప్పుడూ వంటింట్లో పడిఉండాలా? అని కొందరు, సమయం సరిపోవటం లేదంటూ కొందరు.. ఇంట్లో సరిగ్గా వంట చేయకుండా బయట తింటున్నారు.

కుటుంబం కొరకు కొందరు స్త్రీలు శ్రద్ధగా వంట చేస్తారు. వంటచేయడానికి ఇంట్లో ఎవరూ సహాయం చేసే పరిస్థితి లేనప్పుడు, నెలసరిలో ఉన్నా, కొన్ని జాగ్రత్తలు తీసుకుని వంటచేయకతప్పదు. బయట ఆహారం తింటే మంచిదికాదని అలా చేస్తారు.

 అగ్నికి అంటుముట్టు ఉంటుందా? నిర్జీవశరీరాలను కూడా దహనం చేస్తారు. అగ్నిలో రకాలుంటాయనుకుంటే,  నెలసరిలో తప్పనిసరిలో వంట చేయవలసివస్తే, ఇండక్షన్ పొయ్యి  వాడవచ్చనిపిస్తుంది.

నెలసరిలో ఉన్నప్పుడు, అగ్ని వెలుగుతున్న పొయ్యి పైన వంట చేయటం ఇష్టంలేకపోతే, ఆ నాలుగురోజులు.. కరెంట్ తో పనిచేసే ఇండక్షన్ పొయ్యి పైన వండవచ్చు. వాటికి అగ్ని పైకి కనిపించదు. మైక్రో ఒవెన్ కాకుండా కరెంట్ తో పనిచేసే పొయ్యిలు..2000.. ధరలో లభిస్తాయి. మైక్రోవెవ్ మంచిది కాదంటున్నారు. నెలసరిలో ఉన్న నాలుగు రోజులు వంట చేయటం తప్పనప్పుడు, గాస్ పొయ్యి కాకుండా, ఇండక్షన్ పొయ్యి పైన వండుకోవచ్చనిపిస్తుంది.

  ***************

 నెలసరి నియమాలు పాతకాలంలాగ పాటించాలంటే, నెలసరిలో ఉన్నప్పుడు స్త్రీలు వంటచేయకూడదు, బయటకు కూడా వెళ్లకూడదు.  

పాతకాలంలోలా నెలసరి నియమాలు సరిగ్గా పాటించాలంటే, నెలసరిలో ఎక్కడకు వెళ్ళకుండా ఇంట్లో పక్కన కూర్చోవాలి. స్త్రీలు నెలసరిలో బయటకువెళ్ళి కలిపేసి, ఇంటికొచ్చి పక్కన కూర్చుంటే అది సరైన పద్ధతి కాదు. నెలసరి ముట్టు ఖచ్చితంగా పాటించాలి ..అని  చెప్పేవారు ఈ విషయం కూడా చెప్పాలి..

  చదువులు, ఉద్యోగాలకు బయటకు వెళ్ళొచ్చు అంటారు. మన అవసరాలకు తగ్గట్లు నియమాలను మార్చుకుని, ఇంకా నియమాలను చెప్పటం ఎందుకు? అప్పుడు ఎవరి అవసరాలకు తగ్గట్లు వారు నియమాలను మార్చుకోవాలని అనుకుంటారు.

బయటకు వెళ్లేవారు కనీసం నెలసరి సమయంలోనైనా బయటకెళ్ళకూడదు.. కొందరికి నెల మధ్యలో కూడా నెలసరిలా ఉండవచ్చు. ఇలా ఎప్పుడంటే అప్పుడు సెలవులు ఇవ్వరు కదా.. పాతకాలంలో స్త్రీలు బయటకు అంతగా వెళ్లేవారు కాదు. ఉమ్మడి కుటుంబాలు ఉండేవి. ఆ రోజుల్లో నెలసరి పాటించటానికి వీలుండేది.

 ఈ రోజుల్లో చాలామందికి సరిగ్గా పాటించటం కుదరటం లేదు. ఒక వైపు , ఈ రోజుల్లో  చాలామంది స్త్రీలు బయటకు వెళ్ళకుండా కుదరదంటున్నారు.... ఇంకో వైపు, నెలసరిలో  పక్కన కూర్చోకపోతే మహాదోషం అంటారు. ఇలాంటప్పుడు ఏం చేయాలో తెలియదు. 

ఇవన్నీ గమనిస్తే ఏమనిపిస్తుందంటే, పాతకాలంలా స్త్రీలు ఎక్కువగా బయటకు వెళ్ళకుండా ఉండేరోజులు వస్తే తప్ప, నెలసరిని సరిగ్గా పాటించలేరు.

..............................................

నెలసరి పాటించకపోతే వచ్చే పాపం సంగతి అలా ఉంచితే, చాలామంది ఎన్నో పాపాలు చేస్తున్నారు. తద్వారా ఎంతో పాపం మూటకట్టుకుంటున్నారు. అందరూ నైతికవిలువలు పాటించాలి.

.....................

konni  links.. 

*స్త్రీలు నెలసరి వాయిదా మందులు వేసుకుని, ఆరోగ్యం పా... 

*ఈ ఆచారం ఎక్కడవరకు వెళ్ళిందంటే..

 .....................
వ్రాసినవాటిలో ఏమైనా తప్పులుంటే, దయచేసి క్షమించమని దైవాన్ని ప్రార్ధిస్తున్నాను. 

 

కొన్ని విషయాలు..ఆచారవ్యవహారాలు..

 

మీడియా ద్వారా ఎన్నో మంచివిషయాలను తెలియజేస్తున్న గొప్పవారు  ఎందరో ఉన్నారు. 

 అయితే, కొందరేమో ప్రజలలో  మూఢనమ్మకాలు పెరిగేవిధంగా చెబుతున్నారు. మీరు అలా చేయకూడదు, ఇలానే చేయాలి..లేకపోతే మీబ్రతుకులు అధోగతే..అంటూ చెపుతారు.ఇక వినేవారికి ఏంచేస్తే ఏం తప్పో? అనే పరిస్థితి వస్తుంది. ప్రజలు ఇలా నిరాసక్తంగా తయారయితే సమాజం ఏమవుతుంది? వేరేవారు ఆక్రమించుకుంటారు..దయచేసి ఆ పరిస్థితి రాకూడదంటే అందరూ విచక్షణతో ప్రవర్తించాలి. .

 దైవభక్తి, సత్ప్రవర్తన..వంటి వాటి కన్నా, మూఢనమ్మకాలు బాగా పెరిగిపోయాయి.  రోజూ ఏదో పండుగ అన్నట్లు చెబుతారు కొందరు. రోజూ ఉపవాసాలు, తలస్నానాలు, బ్రహ్మచర్యం.. అయితే ఇక గృహస్థాశ్రమం అనేది ఎందుకు? సన్యాసాశ్రమం ఒక్కటే హిందువులకు మిగులుతుంది. 

సనాతనధర్మంలో నాలుగురకాల వ్యవస్థలు ఉన్నాయి. బ్రహ్మచర్యం, గృహస్థాశ్రమం, వానప్రస్తం, సన్యాసాశ్రమం ఉండేవి. దానికి తగ్గట్లు ఆచరణ ఉండేది.  

**************

 భగవద్గీతలో శ్రీకృష్ణపరమాత్మ స్వధర్మాన్ని పాటించాలని అర్జునునికి తెలియజేసారు. ఇంకా ఎన్నో విషయాలను తెలియజేసారు.

 విరక్తితో యుద్ధం చేయనని అన్న అర్జునునికి.. నీ స్వధర్మాన్ని నీవు పాటించాలని తెలియజేసారు. అంతేకానీ, ఈ యుద్ధాలు అవీ  అన్నీ వ్యర్ధం .. అని చెప్పలేదు. స్వధర్మం యొక్క ప్రాముఖ్యతను బోధించి, యుద్ధానికి సిద్ధం చేసారు. 

వైరాగ్యం అని చెప్పి యుద్ధం చేయకుంటే, రాజ్యం చెడ్దవాడైన దుర్యోధనుని చేతికి వెళ్ళిపోతుంది, అప్పుడు సమాజం అతలాకుతలమవుతుంది. సమాజం బాగుండాలంటే, ఎవరి స్వధర్మాన్ని వారు చక్కగా ఆచరించాలి. 

 గృహస్థాశ్రమంలో ఉంటూ రోజూ తలస్నానాలు, ఉపవాసాలు, బ్రహ్మచర్యం.. పాటించటం సరైనది కాదు. అతిగా ఉపవాసాలు , తలస్నానాలు చేస్తే ఆరోగ్యం దెబ్బతింటుంది. రోజూ బ్రహ్మచర్యం అంటే  కుటుంబంలో భార్యాభర్త మధ్య కలహాలు వచ్చే అవకాశముంది. 

దగ్గరకు పిలిస్తే రోజూ ఏదో ఒక పూజ అంటావు మరి పెళ్ళెందుకు చేసుకున్నావు?.. అని భర్త విసుక్కుంటే భర్తతో ఏం చెప్పాలో తెలియక, అలాగని పూజ చేసిన రోజున భర్తకు చేరువయితే  దోషమేమో? అని ఏం చేయాలో తెలియక ఆలోచిస్తూ భార్య పూజ కూడా సరిగ్గా చేయలేదు. ఇలాగే పరిస్థితి ఉంటే అక్రమసంబంధాలు కూడా పెరిగే అవకాశముంది.

  ప్రతిరోజు పూజ చేయకూడదని నా అభిప్రాయం కానేకాదు.  నిత్యపూజ చేసుకుని,  పండుగలప్పుడు , ప్రత్యేకమైనపూజలప్పుడు..  ..ఉపవాసం, బ్రహ్మచర్యం..పాటించవచ్చు... అని  నా అభిప్రాయం.

 ఎవరి స్వధర్మాన్ని వారు సరిగ్గా పాటించటం కూడా పూజయే. తమపని తాము చేసుకుంటూ కూడా దైవాన్ని స్మరించుకోవచ్చు.

 స్త్రీపురుషులకు విచ్చలవిడి శృంగారం లేకుండా, పద్ధతిగా  ఉండటం కొరకు కుటుంబవ్యవస్థ ఏర్పడింది. కుటుంబవ్యవస్థ  పాడయితే సమాజమూ విఛ్చిన్నమవుతుంది.   రోజూ  దైవ పూజ చేసుకోవాలి. అయితే, తలస్నానాలు, ఉపవాసాలు, బ్రహ్మచర్యం..వంటి నియమాలను కొన్ని ప్రత్యేకమైన పూజలు, పండుగలు అప్పుడు ఆచరిస్తే సరిపోతుంది.

అంతేకానీ, అతిగా ఆచారవ్యవహారాలను పెంచేసుకుని ..ఏ పని చెయ్యాలన్నా యూట్యూబ్ చూసి, వారి సలహాలతో గానీ చెయ్యలేమేమో? అనుకుంటూ సందేహాలతో  బ్రతికితే హిందువులు శారీరికంగా, మానసికంగా బలహీనమైపోతారు. కుటుంబవ్యవస్థ బలహీనమవుతుంది. సమాజం కూడా అస్త వ్యస్థమయి, ఇతరుల చేతిలోకి వెళ్ళే అవకాశముంది.  

 మరి ఎప్పుడూ లౌకికమైన విషయాలేనా.. జీవితానికి అంతిమలక్ష్యం దైవసన్నిధిని పొందటం కదా.. అని సందేహాలు కలుగవచ్చు. ఏం చేయాలని భయపడనక్కరలేదు.  అందుకు సనాతనులు చక్కటి పద్ధతులను తెలియజేసారు.  

చతురాశ్రమధర్మాలను చక్కగా పాటిస్తూ బ్రహ్మచర్యంలో చక్కగా విద్యను అభ్యసించి, గృహస్థాశ్రమంలో  ధర్మాలను చక్కగా పాటిస్తూ..ధర్మబద్ధమైన సుఖాలను పొంది, వానప్రస్థంలో అడవులకు వెళ్లకపోయినా ఉన్న చోటే ఉండి కూడా.. క్రమంగా కోరికలను తగ్గించుకుంటూ, ఇంట్లో ఉండి కూడా మనస్సును సన్యాసాశ్రమానికి తగ్గట్లు మార్చుకుని దైవభక్తితో నిండి దైవంలో లీనమవ్వచ్చు. అంతేకానీ, అంతులేని కోరికలతో పాపాలు చేస్తూ, ఎన్ని ఆచారాలను పాటించినా వ్యర్ధమే.  

 జీవితంలో దైవమే దిక్కు, జీవితపరమార్ధం దైవమే ..అనే సత్యం తెలుసుకునే పరిస్థితి చాలాసార్లు ఉంటుంది. ఆ విషయాన్ని మర్చిపోకుండా గుర్తుకు తెచ్చుకుంటూ ఉండాలి.

 సినిమాలు, సీరియల్స్ వల్ల కూడా మూఢనమ్మకాలు పెరిగాయి. అతిచేష్టలను తగ్గించుకోమని  ఎవరైనా చెబితే వారిని తిడుతూ, హిందూత్వం మంటకలిపేస్తున్నారు..అంటూ గగ్గోలు పెడతారు.. హిందువులు ఎప్పుడూ మూఢత్వంలోనే ఉండాలని కోరుకునే కొందరు ఇలా గగ్గోలు పెడతారు.  

 సనాతనులు ఎంతో విజ్ఞానవంతులు. ఎన్నో విషయాలను గ్రంధాల ద్వారా తెలియజేసారు. 

అయితే, కాలక్రమేణా కొందరు తెలిసీతెలియనివారు, కొందరు అవకాశవాదులు గ్రంధాలలో ప్రక్షిప్తాలను చేర్చటం జరిగింది.గ్రంధాలలో ఉన్న విషయాలను మార్చటం, క్రొత్తవి చేర్చటం చేస్తే ప్రక్షిప్తాలు అంటారు. నాకు చాలాసార్లు అనిపించింది. నియమాల పేరుతో ఇన్ని ఆంక్షలు ఎందుకున్నాయి? 

అతి ఆంక్షల వల్ల అనర్ధమే. నాకు తెలిసిన ఒక  తమిళ   బ్రాహ్మణ కుటుంబం పండుగ రోజు 21 ప్రసాదాలు చేయాలని చేసేవారు. ఆ తరువాత ఎందుకో  ?  వారు మతం  మారటం జరిగింది.  ఈ విషయాలను ఇంతకు ముందే బ్లాగులో వ్రాసాను. 

  శుక్రవారం, మంగళవారం ఎవరికి డబ్బులు ఇవ్వకూడదు అంటే ఆ రోజుల్లో ఏమి కొనటానికి షాపుకు వెళ్ళకూడదా? పూజలలో ఇతరులకు ఇచ్చే అరటిపండ్లను బొడిప వైపు ఇటువైపు ఇవ్వాలి.. అటువైపు ఉంచి ఇవ్వకూడదు, తమలపాకులు ఇటువైపు ఇవ్వాలి అటువైపు ఉంచి ఇవ్వకూడదు, ఇన్ని మాత్రమే లెక్కపెట్టి ఇవ్వాలి..

ఇలా వందలు, వేలు రూల్స్ చెబుతున్నారు..ఇవన్నీ గుర్తు పెట్టుకుని పాటించటానికే సమయం సరిపోదు ఇక దైవంపట్ల ధ్యాస ఎలా? ఏమిటో ఇవన్నీ..

  పండుగ వస్తోందంటే ఎంతో పని ఉంటుంది. పని అంటే, ఇవన్నీ టెన్షన్  తో  కూడిన పనులు కదా.. పూజ సరిగ్గా చేయగలమో లేదో? పనులన్నీ ఎలా అవుతాయో? అని భయంగా ఉంటుంది.

పండుగ అంటే ప్రశాంతంగా ఉండాలి . అంతేకానీ, కనీసం రోజూ మామూలుగా దైవాన్ని ప్రార్ధించుకునేలా కూడా పరిస్థితి ఉండదు. రకరకాల సామానులను  సమకూర్చుకోవాలి. 

పూజలలో ఎన్నో నియమాలు. వాటిని సరిచూసుకోవటానికే ధ్యాస ఉంటుంది. ఉపవాసాల వల్ల నీరసమూ ఉంటుంది. ప్రతిపూజకూ బంధుమిత్రులను పిలిస్తే వారికి అల్పాహారం, భోజనాలు కూడా చూడాలి.

 ఇవన్నీ కాకుండా, సులభంగా  ప్రశాంతంగా దైవస్మరణ చేసుకుంటే ఎంతో బాగుంటుంది. పనులు చేసుకుంటూనే వీలైనంతలో దైవస్మరణ చేసుకోవాలి. 

 మా చిన్నప్పుడు శ్రావణమాసం పేరంటాలు అయితే స్త్రీలు ఇరుగుపొరుగు ఇళ్లకు పేరంటానికి వెళ్ళి పూజచూసి కొద్దిసేపు కబుర్లు చెప్పుకుని కొద్దిగా శనగలు, తాంబూలం పుచ్చుకుని వచ్చేవారు. అప్పట్లో అలా సింపుల్ గా ఉండేది.  

 జీవితంలో ఎన్నో సందర్భాలలో అతి ఆచారవ్యవహారాల వల్ల ఎన్నో సమస్యలు వస్తున్నాయి. 

 నాకు చాలాసార్లు అనిపిస్తుంది..మతం అనేది లేకుండా నాకు నచ్చినట్లుగా స్వేచ్చగా దైవస్మరణ చేసుకుంటే ఎంత బాగుంటుంది..అని, లేకపోతే ఉన్నమతంలోనే ఉంటూ మనకు నచ్చినట్లు, మన శక్తి కొలది  దైవాన్ని పూజించుకుంటే బాగుంటుంది కదా..అనిపిస్తుంది.  

 టీవీలు, యూట్యూబ్ వచ్చిన క్రొత్తలో అందులో చెప్పినవి  చాలామంది పాటించడానికి ప్రయత్నిస్తారు. క్రొత్తలో ఉత్సాహంగానే ఉండవచ్చు.

 ఆచారవ్యవహారాలలో అతి ఎక్కువయితే క్రమంగా విసుగు అనిపిస్తుంది.అప్పుడు మొదటికే మోసం వస్తుంది. ఇవన్నీ చూసి, విసుగొచ్చి  చాలా కుటుంబాలలో  కొందరు  మేము ఇవన్నీ చేయం .. అని అంటున్నారు. 

అందరూ అన్ని పూజలూ చేయాలని ప్రాచీనులు చెప్పలేదు. కొందరికి, పెద్దగా పూజలు చేయకపోయినా ఫరవాలేదు. కొద్దిగా పూజచేసుకుని, మీ స్వధర్మాన్ని మీరు చక్కగా పాటించితే చాలు చక్కటి ఫలితం వస్తుందన్నారు.

 ఆచారవ్యవహారాల విషయంలో కూడా అందరికీ ఒకే విధంగా చెప్పలేదు. అలాంటప్పుడు,  అందరికీ అన్నట్లుగా ఇన్ని ఆచారవ్యవహారాలను, విధివిధానాలను చెప్పటం ఎందుకో అర్ధం కావటం లేదు.

కొన్ని కుటుంబాలలో ఇన్ని ఆచారవ్యవహారాలను పాటించరు. అలాంటప్పుడు యూట్యూబ్ లో ఇవన్నీ చూసి, ఇవన్నీ అందరూ చేయాలి కాబోలు అనుకుని ఎవరైనా మొదలుపెడితే కొన్ని కుటుంబాలలో  కుదరకపోవచ్చు.కుటుంబసభ్యుల మధ్య గొడవలు కూడా వస్తాయి.

మాంసాహారాన్ని తినే వారింట్లో ఎక్కువ నియమాలను పాటించాలంటే కష్టం. మాంసాహారం తిని పూజ చేయవచ్చా? అని  అడుగుతారు కొందరు. తలస్నానం చేసి చేయవచ్చని చెబుతారు కొందరు. 

ఇక చిన్నపిల్లలకు కూడా అదేపనిగా చన్నీటితో తలస్నానాలు చేయించి పూజలు చేస్తుంటారు. పిల్లలకు తల తడి బాగా ఆరాలి. లేకపోతే, జలుబు చేసే అవకాశముంది.  

  కలియుగంలో బ్రాహ్మణులకు కూడా కొంత సులభమైన  విధానాలే ఉంటాయి. కాలపరిస్థితులకు తగ్గట్లుగా కూడా ఉండాలి. అందువల్లే కాబోలు కలియుగంలో  దైవస్మరణ, దైవనామస్మరణ సులభోపాయం ..అని   ప్రాచీనులు తెలియజేసారు. 

 లోకంలో ఎంతో విజ్ఞానం ఉంది. ఎన్నో విద్యలున్నాయి.  అన్ని విద్యలను ప్రతి ఒక్కరు నేర్చుకోనవసరం లేదు. నేర్చుకోలేరు కూడా. ఎవరు నేర్చుకునేవి వారు నేర్చుకోవచ్చు.

  దైవం ఎప్పుడూ అందరికీ ఒక్కరే. దేశాలు, సంస్కృతులు వేరు కాబట్టి  అనేక మతాలు ఏర్పడ్దాయి. ఎవరి మతాన్ని వారు చక్కగా ఆచరించుకోవచ్చు. 

అయితే, కొందరు మనుషుల్లో ఇన్ సెక్యూరిటీ, ఇతరులపైన ఆధిపత్యం చేయాలనే ధోరణుల వల్ల ఎవరి మతాన్ని వారు కాపాడుకోవలసిన పరిస్థితులు ఏర్పడుతున్నాయి. 

ఎవరికి నచ్చినా నచ్చకపోయినా ఒక విషయం మాత్రం నిజం. అతి ఆచార వ్యవహారాలను  తగ్గించుకోకుంటే  హిందూ మతానికి నష్టం జరిగే అవకాశముంది. 

 ఆచారవ్యవహారాలను పూర్తిగా వదిలేయమని నా అభిప్రాయం కాదు.  ఈ రోజుల్లో భక్తులమని చెప్పుకుంటున్నవారిలో ఎంతమంది  పాపాలు చేయకుండా ఉంటున్నారు? 

 దైవభక్తి, సత్ప్రవర్తన..ఉంటే  సమాజంలో చాలావరకు సమస్యలు సమసిపోతాయి. పాపాలు చేయటం వల్ల కష్టాలు వస్తాయి. 

 పాపాలు చేయకపోతే దైవం కూడా కష్టాలను ఇవ్వరు. పాపాలు చేస్తూ ఉంటే ఎన్ని పాటించినా కష్టాలు రాక తప్పదు. 

రావణాసురుడు కైలాసానికే వెళ్ళగలిగిన గొప్ప శివభక్తుడు. అయితే అతడు చేసిన పాపాల వల్ల అతని సంతానంతో సహా నాశనమయ్యాడు. 

సీతాదేవిని శ్రీరామునికి అప్పగించాలని శివాంశసంభూతుడైన ఆంజనేయుల వారు ముందుగా హెచ్చరించినా రావణాసురుడు వినలేదు. అందుకు తగ్గ శిక్ష పడింది. 

ఎవరైనా సరే ఒక ప్రక్కన పాపాలు చేస్తూ ఎన్ని ఆచారాలను పాటించినా మంచి ఫలితం ఉండదు.

 ఎవరైనా తరించటానికి దైవభక్తి, సత్ప్రవర్తన..ఎంతో అవసరం. ఆచారవ్యవహారాలను అతి  క్లిష్టంగా చేసుకోనవసరం లేదు. సులభంగా ఉంటే మంచిది. ఆధునిక కాల పరిస్థితులకు ఇది చాలా అవసరం. 

నిజమైన భక్తులు దైవము పట్ల ప్రేమ భక్తిని కలిగి, దైవానికి ఇష్టమయిన విధంగా ధర్మముగా జీవించటానికి ప్రయత్నించాలి.

 దైవం మెచ్చేటట్లు జీవించితే అది కూడా పూజయే. 

............................. 

పూజలలో నియమాలను పాటించడానికి, పూజకు సామాను శుభ్రం చేసుకోవటానికి, సర్దుకోవటానికి బద్ధకిస్తారు కాని, ఎన్నిగంటలైనా కబుర్లు చెప్పుకుంటారు..అని కొందరంటున్నారు. నిజమే, చాలా పనులు చేస్తాము. పని ఎక్కువయితే వేరే విషయాల్లో అయినా విసుక్కుంటాము.

కబుర్లు చెప్పుకోవటంలో భయంతో కూడిన టెన్షన్ ఉండదు కదా..మన కష్టసుఖాలను మనకు ఆప్తులైన ఫ్రెండ్స్తోనో, బంధువులతోనో చెప్పుకునే కబుర్ల వల్ల టెన్షన్ కొన్నిసార్లు తగ్గుతుంది.

అలాగని అన్నీ అందరికి చెప్పేస్తే తరువాత వాళ్ళతో గొడవలొస్తే కష్టం, అందువల్ల కబుర్లు చెప్పేటప్పుడు కూడా కొంత జాగ్రత్తగానే ఉండాలి.

 పూజలలో కొన్నిసార్లు టెన్షన్ ఎందుకు వస్తుందంటే, పూజ అంటే,ఎన్నో నియమాలను చెబుతూ..సరిగ్గా పాటించకపోతే కష్టాలొస్తాయని భయపెడతారు కాబట్టి, పూజావిషయాలలో టెన్షన్ అధికంగా ఉంటూంది. మామూలుగా ఇంట్లో వంట చేసినప్పుడు కొంత టెన్షన్ ఉన్నాకూడా, భయంతో కూడిన టెన్షన్ పెద్దగా ఉండదు.

దైవానికి సంబంధించిన వంట విషయంలో టెన్షన్ ఎక్కువవుంటుంది. తలస్నానం చెయ్యాలి, వెంట్రుకలు వంటలో పడకుండా జాగ్రత్తగా ఉండాలి, ఉప్పు, పులుపు టేస్ట్ చూడకూడదు, టేస్ట్ చేయకపోతే రుచి తెలియదు, అంతా వండాక నైవేద్యం పెట్టేలోపు స్నానం చేయనివాళ్ళు ముట్టకుండా జాగ్రత్తగా ఉండాలి.ఇలాంటి ఎన్నో నియమాల వల్ల భయంతో కూడిన టెన్షన్.

ఈ భయాలవల్ల పూజలో కూడా దైవము పైన ధ్యాస కన్నా, నియమాల పట్ల ఎక్కువ ధ్యాస ఉంచవలసి వస్తుంది. అందువల్ల, కొన్ని భయాలను తగ్గించుకుంటే టెన్షన్ ఉండదని అంటున్నాము. అంతేకాని, పూజలు వద్దని, అసలు నియమాలే వద్దని అనటం లేదు.

రోజువారి దినచర్యలో కూడా సోషల్మీడియాలో చాలామంది చాలా జాగ్రత్తలను చెబుతున్నారు. కొంతవరకు పాటించగలం కాని, వందలుగా చెబితే ఎంతకని పాటించగలం?

కరోనా సమయంలో మన మంచికోసం ఎన్నో నియమాలను పాటించమన్నారు. జనాల మంచికోసమే అయినా అవన్నీ పాటించలేక సతమతమయ్యారు.

ఎప్పుడూ కరోనాలో లాగ చేతులు, వస్తువులు.. అతిగా శుభ్రం చేసుకుంటూ నియమాలను పాటించాలంటే ఎలాసాధ్యం? తలచుకుంటేనే భయం వేస్తుంది.

................................

  వ్రాసిన వాటిలో ఏమైనా పొరపాట్లు ఉంటే దయచేసి క్షమించమని దైవాన్ని ప్రార్ధిస్తున్నాను.
 వ్రాసిన విషయాలలో ఒప్పులు దైవం దయవల్ల వ్రాసినవి. తప్పులుంటే అవి నేను చేసినవి.