జంతువులను చంపటం...

 

మాంసాహారాన్ని తినాలంటే..జంతువులను, పశుపక్ష్యాదులను చంపి తినాలి. చంపే సమయంలో అవి ఎంత భయాన్ని, బాధను అనుభవిస్తాయో. మనుషులను ఎవరైనా రాక్షసులు చంపి లొట్టలేసుకుంటూ తింటారంటే మనుషులు గజగజ వణికిపోతారు. మరి నోరులేని పశుపక్ష్యాదులకు భయం ఉంటుంది కదా. 

 

 జీవితంలో కష్టాలు, అనారోగ్యాలు వస్తేనే తట్టుకోలేక మనుషులు రక్షించమని అదేపనిగా దైవానికి పూజలు చేస్తుంటారు.రక్షించటం ఆలస్యమయితే దైవాన్ని నిందించేవారు కూడా ఉంటారు. రుచి కోసం జంతువులను చంపి తినటం పాపం. చనిపోతూ అవి అనుభవించిన బాధ వాటిని చంపిన వారిని పాపకర్మలా చుట్టుకుంటుంది. 

 ప్రాచీనకాలంలో రాజులు, సైనికులు వేటకు వెళ్ళేవారని తెలుస్తోంది. క్రూరమృగాలు ఊళ్ళలోకి వచ్చినప్పుడు వాటిని చంపటంలో తప్పులేదు. రాజ్యంపై దండయాత్ర చేసిన శత్రువులను చంపేటప్పుడు సున్నితమనస్తత్వం కాకుండా కొంత కఠినత్వం అవసరం. అలా కావటానికి కూడా జంతువులను వేటాడటం అవసరమని కొందరి అభిప్రాయం కావచ్చు. అలాగని ఎక్కువగా వేటాడటం అవసరం లేదు. 

.............

 మనదేశంలోనే శాకాహారులు ఎక్కువ, విదేశాల్లో అందరూ మాంసాహారం తింటారని మనలో చాలామందిమి భావిస్తాము. అయితే, అది తప్పు. విదేశాల్లో కూడా శాకాహారులుంటారు. ఈ రోజుల్లో విదేశాల్లో కూడా చాలామంది మాంసాహారం మానివేసి శాకాహారం వైపు మారుతున్నారట. మన దేశంలో, మన రాష్ట్రంలో చాలామంది నేచురోపతి వారు కొన్ని ఆహారపద్ధతులను పాటించటం ద్వారా వ్యాధులు వచ్చినవారికి నయం చేయటం, వ్యాధులు రాకుండా చేయటం గురించి చెబుతున్నారు. ఇలా ఆహారం ద్వారా వ్యాధులు తగ్గించుకోవటం అనేది గొప్ప విషయం. 

విదేశాల్లో కూడా కొందరు శాకాహారం మంచిదని, ఆహారం ద్వారా వ్యాధులు తగ్గించుకోవచ్చని చెబుతున్నారట. వీరిలో వైద్యులు కూడా ఉన్నారు. 

 ఉదా..Dr. Caldwell Esseltyns, Dr. Brook Goldner.. 

ఒక వైద్యురాలు తనకు వచ్చిన వ్యాధిని ఈ పద్ధతిలో తగ్గించుకోవటం జరిగిందట. వీరి గురించి తెలుసుకోవాలంటే ఇంటర్నెట్ లో చూడవచ్చు. 

 *************

 పాతకాలంలో ఆహారధాన్యాలను పండించుకోవటానికి పొలాలను దున్నటానికి పశువులను ఉపయోగించేవారు.  పశువుల పెంపకం పెరిగి, వాటి దూడలు త్రాగగా మిగిలిన పాలను మనుషులు వాడుకోవటం జరిగేది. చాలామంది తాము పెంచుకున్న పశువులను చక్కగా చూసుకునేవారు. వృద్దాప్యంలో కూడా అవి మరణించేవరకూ బాగా చూసుకునేవారు.

 ఈ రోజుల్లో కొందరు పశువులను పెంచేవారు పశువులకు వృద్ధాప్యం వచ్చినప్పుడు వాటిని చూడటానికి డబ్బులేదంటూ వాటిని కబేళాలకు అమ్మేస్తున్నారు. భారతదేశం నుంచి ఎక్కువ పశువులు కబేళాలకు తరలిపోతున్నాయని వార్తల ద్వారా తెలుస్తోంది. ఇది చాలా బాధాకరమైన విషయం. గోవులను దేవతగా భావించే భారతదేశం లో ఇలాంటివి జరగటం ఎంతో బాధాకరం. పశువులను కబేళాకు అమ్ముతున్నది ఎవరో తెలుసుకోవాలి.  అలా కబేళాకు అమ్మకుండా వాటిని చక్కగా చూసుకునేలా మనుషులు మానవత్వం తో ప్రవర్తించాలి.

 

పశువులను మంచిగా చూసుకునేవారు వాటితో పొలం పనులు చేయించవచ్చు. అలా ఆసక్తి లేనివారు ట్రాక్టర్ ఉపయోగించవచ్చు.

ఈ రోజుల్లో వ్యవసాయం చేయటానికి ట్రాక్టర్స్ ఉన్నాయి. ట్రాక్టర్స్ వల్ల భూసారం దెబ్బతింటుందని కొందరు అంటున్నారు. అయితే, ఆధునికకాలంలో మనుషుల వల్ల పర్యావరణానికి ఎన్నో విధాలుగా ఎంతో హాని  జరుగుతోంది. పురుగులమందుల వల్ల కూడా భూసారం పోతుంది. అందువల్ల పశువులను బాధపెట్టకుండా ట్రాక్టర్లను వాడుకోవచ్చు. భూసారం పోకుండా ట్రాక్టర్ల డిజైన్ మార్చవచ్చు.

  దూడలు త్రాగగా మిగిలినపాలను దైవానికి నైవేద్యం కొరకు, మనుషులు తమ వైద్యావసరాల కొరకు, చంటిపిల్లల పాలకొరకు పాలను వాడుకోవచ్చు. అయితే, మనుషులు రుచికొరకు అనేక రకాల పాల స్వీట్స్, టీలు, కాఫీల కొరకు బోలెడు పాలను వాడుతున్నారు. .  పాల ఉత్పత్తులతో చేసే స్వీట్స్  తినటం కొంతవరకు తగ్గిస్తే మనుషులు ఆరోగ్యంగా ఉంటారు. పశువులు కూడా కొంత ఊపిరి పీల్చుకుంటాయి.దూడలకు చాలకుండా మనుషులే పాలను పిండటుకోవటం దారుణం.

  ఎక్కడైనా జంతువులు మనుషులను చంపి తింటే, ఎంత దారుణం జరిగింది.. అంటారు. మరి మనుషులకు ప్రపంచంలో తినడానికి బోలెడు శాకాహారం ఉండగా, ఇంకా జంతువులను చంపి తినటం దారుణం.