లాక్ డౌన్ వల్ల.. ప్రజలకు తక్కువ డబ్బు ఖర్చు అవుతోంది. ..

బయటకు ఎక్కువదూరం వెళ్లట్లేదు కాబట్టి పెట్రోల్ ఖర్చు తగ్గుతుంది. 

విందులు, వినోదాలు లేవు కాబట్టి ఆ ఖర్చు తగ్గింది.

 షాపింగ్ తగ్గింది కాబట్టి విపరీతంగా దుస్తులు, ఫాన్సీ వస్తువులు.. కొనేవారికి ఆ డబ్బు మిగిలింది.

 బయటకు వెళ్లి తినటం లేదు కాబట్టి హోటల్ బిల్లు తగ్గింది.  

ఆడవాళ్లు బ్యూటీపార్లర్లకు వెళ్లటం లేదు కాబట్టి ఆ విధంగా ఖర్చు తగ్గింది. 

మగవాళ్ళకేమో మందుపార్టీల వంటివి లేవు..

సినిమాలు, షికార్లు లేవు కాబట్టి  అలా ఖర్చు తగ్గింది.
ఇంకా చాలా ఖర్చులు తగ్గాయి.

************
ప్రజలకు విశ్రాంతి, వినోదం వంటివి కూడా అవసరమే.

 అయితే కొందరు ప్రజలు...  జీవితంలో నైతికవిలువలు, డబ్బు విషయంలో  పొదుపు వంటి విషయాలను వదిలి,  వీలున్నంతలో డబ్బు ఖర్చు పెట్టి జీవితాన్ని ఎంజాయ్ చేయాలనే అభిప్రాయానికి వచ్చారు.

అవినీతికి పాల్పడైనా సరే డబ్బు సంపాదించి , ఖర్చుపెట్టడం చేస్తున్నారు.

దేనికైనా ఒక పద్ధతి ఉంటుంది కదా! పద్ధతిగా ఉన్నంతవరకు అంతా బాగుంటుంది. పద్ధతి తప్పితే కష్టాలు తప్పవు.

**********
గత 50 సంవత్సరాలలో ప్రజల జీవితవిధానంలో విపరీతమైన మార్పులు వచ్చాయి. 

అప్పట్లో ఒక వ్యక్తి జీతం సుమారు 50 రూపాయలు కానీ 500 రూపాయలు గానీ ఉంటే ...కిలో బియ్యం 5 రూపాయలు ఉండేవి.

ఇప్పుడు జీతాలు 5,000 వేలు గానీ 50,000 వేలు గానీ ఉంటే కిలో బియ్యం 50 రూపాయలు ఉన్నాయి. 

డబ్బు విలువ తగ్గిపోతోంది. జీతాలు పెరిగితే ధరలు పెరుగుతున్నాయి.

 జీతాలు పెరగటానికి అవకాశం లేని వాళ్లు నిత్యావసరాలు కొనలేక ఇబ్బందులు పడే పరిస్థితి వచ్చింది. 

జీతాలు తగ్గాలి, ధరలు కూడా తగ్గాలి.

ప్రజలు జనాభా నియంత్రణ విధానాలు కూడా పాటించాలి.

చాలామంది ప్రజలు విలాసాలనే నిత్యావసరాలుగ మార్చుకుని బ్రతకటానికి అలవాటుపడ్దారు.

***********
యంత్రాలు వచ్చాక వస్తు వినియోగం బాగా పెరిగింది. 

ఇన్ని వస్తువులను తయారుచేయటానికి ఎన్నో ఖనిజాలు అవసరమవుతాయి. 

ఖనిజాలు భూమిలో తయారుకావటానికి వేల సంవత్సరాలు పడుతుందట. అందువల్ల ఖనిజసంపదను పొదుపుగా వాడుకోవాలి. 

పాతకాలంలో ఇప్పుడు వాడినంత ఎక్కువగా వస్తువుల వాడకం లేదు. ...  అయినా, అప్పటివాళ్ళు చక్కగా జీవించారు. 

ఇప్పుడు వస్తువినియోగం విపరీతంగా పెరిగింది...ఉపాధి కోసం అనీ, ఆర్ధిక వృద్ధిరేటు అనీ కర్మాగారాలలో ఎక్కువగా వస్తువులను తయారుచేస్తున్నారు. 

 విపరీతంగా ఖనిజాలను త్రవ్వేసి వస్తువులను తయారుచేసి వాడటం, వాతావరణ కాలుష్యం వంటి చర్యలు సరైనవి కావు. 

నైతికవిలువలతో జీవించటం, తక్కువ వస్తువులతో సరిపెట్టుకుని తృప్తిగా జీవించటం, పొదుపు వంటివి పాటించటం మంచిది.

అధర్మం చేసైనా సరే, డబ్బు సంపాదించి విలాసంగా జీవించాలనే పద్ధతి సరైనది కాదు.

*************
 ఒక్క వైరస్ తో ప్రపంచమంతా స్థంభించిపోయింది.

భవిష్యత్తులో మనుషులు తమ జీవనసరళిని సరైన విధంగా మార్చుకోవాలి. లేకుంటే ప్రకృతి చూస్తూ ఊరుకోవటం ఉండదు.