నేను...ధ్యానం....

ఈ మధ్యన ఒకరు నన్ను ధ్యానం గురించి అడిగారు. నాకు ధ్యానం గురించి అంతగా తెలియదండి.

అయితే నేను వ్రాసిన పాతటపాలో కొంత భాగాన్ని + మరి కొన్ని విషయాలను ఇస్తున్నానండి.


నేను పూజ చేసుకొనేటప్పుడు .. మా ఇంట్లో టివీలో వచ్చే సంభాషణలు నాకు చక్కగా వినిపిస్తూనే ఉంటాయి.

వాటి గురించి పూజ తరువాత ఇంట్లో వాళ్ళని నేను అడిగినప్పుడు వాళ్ళు ఏమంటారంటే .. నువ్వు పూజ చేస్తున్నావు కదా ! అన్నీ ఎలా వినిపిస్తున్నాయి ? అంటారు.

చుట్టుప్రక్కల జరిగేవి తెలియనంత గాఢంగా పూజచేసే అంత దృశ్యం నాకు లేదు మరి. . అలాంటి మహానుభావులు ఎక్కడో ఉంటారు.


ధ్యానం చేద్దామని నేనూ ప్రయత్నించాను. అలా కూర్చుని ధ్యానం చేస్తుంటే దృష్టి ఎటో వెళ్ళిపోతుంది. ఎంత ప్రయత్నించినా నా వల్ల కాలేదు. ఏకాగ్రత నాకు రాలేదు. అయితే అలా పట్టుదలగా ప్రయత్నిస్తే ధ్యానం చేయటం క్రమంగా అలవాటు అవుతుందట.


ఇప్పుడు నేను సంగీతం నేర్చుకుంటున్నాను. సంగీతంలో ఏకాగ్రత చాలా అవసరం. లేకపోతే అన్నీ తప్పులే వస్తాయి.


నా అభిప్రాయంలో ధ్యానం అంటే దైవాన్ని స్మరించటం.


నేను రోజువారీ పనులు చేస్తూనే బ్లాగులో వ్రాసే విషయాల గురించి ఆలోచిస్తూ ఉంటాను. ఆ విధంగా బ్లాగుల్లో దైవానికి సంబంధించిన విషయాలు వ్రాసేటప్పుడు దైవసంబంధమైన విషయాలను గురించి ఆలోచించటం కూడా ఒక రకమైన ధ్యానమే అని నాకు అనిపిస్తుందండి.

.........................

కొంతమంది టెన్షన్ గా ఉన్నప్పుడు 1 నుంచి 100 వరకు అంకెలు లెక్కబెట్టుకోమని అంటుంటారు. నాకయితే దానికిబదులు దైవనామ స్మరణ మంచిదనిపిస్తుంది.


సాయి నవవిధ భక్తులు గురించి తెలియజేసారు. భక్తి లేని సాధనములన్ని నిష్ప్రయోజనములని చెబుతూ కావలసినది ప్రేమాస్పదమయిన భక్తి మాత్రమే అని తెలియజేసారు.... .. నాకు వీలు కుదిరినప్పుడల్లా దైవనామ స్మరణ చేస్తానండి. అయితే ప్రారంభములో యధాప్రకారం కొన్ని సందేహములు వచ్చాయి.


అసలు ఏ దేవుని నామము ? నెమ్మదిగా అనుకోవాలా ? లేక త్వరత్వరగానా ? కష్టం లేకుండా సుఖంగా ఎలా స్మరించుకోవాలి ? ఇలాంటి విషయములన్నీ ఎవరి వీలునుబట్టి కాలక్రమేణా వారికే తెలుస్తుందండి.

మొదట్లో ఎన్నో దేవుని నామములు ప్రయత్నించానండి. ఆఖరికి ఏ పేరు కాకుండా అమ్మా అమ్మా .. అని కూడా అమ్మవారిని స్మరించుకోవచ్చు కదా ! అని అలా కూడా చేసాను. కానీ అలా అనుకోవటం కొంచెము కష్టముగా అనిపించిందండి.


తరువాత సాయిసాయి ....అన్న నామము సౌకర్యముగా, సులువుగా అనిపించిందండి.


యోగాసనములు సరిగ్గా వెయ్యకపోతే ఒళ్ళు నెప్పులు వస్తాయి. అలాగే మనకు సులువు అలవాటు అవటానికి కొంచెం సమయము పడుతుంది.


శ్రీ మాత్రే నమః, ఓం నమఃశివాయః, ఓం నమో భగవతే వాసుదేవాయ .....ఇలాంటి  నామములు చెయ్యాలంటే కొన్ని నియమములు పాటించాలేమోనని నాకు అనిపించిందండి.

{ నియమములు పాటించాలో అవసరం లేదో నాకు తెలియదు. }

అలా పాటించటం నావల్ల అవుతుందో ? లేదో  ?  ఎందుకులే  అనుకుని   ప్రస్తుతం  వీలు  కుదిరినప్పుడల్లా   ఓంకారం లేకుండా ..సాయిసాయి అనుకుంటున్నాను. ( కొన్నిసార్లు పనులు చేస్తూ కూడా.)


నేను కొంతకాలం క్రితం ఒక నామాన్ని.. తీసుకున్నాను.( ఈ నామాన్ని మాత్రం  పూజ  వద్ద   వీలు కుదిరినప్పుడు అనుకుంటాను. )

ప్రస్తుతం  వీలు  కుదిరినప్పుడు, ఓంకారం లేకుండా ..సాయిసాయి అనుకుంటున్నాను.


 శుచి మరియు అశుచి .. ఇలా అన్ని సమయములలోను సాయినామమునకు ఎటువంటి పట్టింపులు లేవు కదా ..అని ఇలా చేస్తున్నాను.

( అన్ని వేళలా శుచిగా ఉండటం ఎలా కుదురుతుంది?).

ఏ దేవుని పేరు అయినా అంతా పరమాత్మయే కదండి.

నాకు అయితే ఏమని అనిపిస్తుందంటేనండి , కలియుగమున దైవనామస్మరణం తరుణోపాయమని పెద్దలే తెలిపారు కాబట్టి,  ఎవరైనా ఎటువంటి సమయములోనైనా ,ఏ దేవుని నామమునైనా నిరభ్యంతరముగా స్మరించుకోవచ్చు అని.


సమస్యలు వచ్చినప్పుడు దైవ నామస్మరణ   వల్ల   ఎంతో ధైర్యముగా అండగా అనిపిస్తోంది.

నాకు దైవ నామస్మరణం పధ్ధతిప్రకారం ఎలా చెయ్యాలో తెలియదండి. నేను చేస్తున్న పధ్ధతి నాకు ఇప్పటికి బాగానే ఉంది.


భోజనం చేసేటప్పుడు, టి.వి. చూసేటప్పుడు , ప్రయాణములు చేసేటప్పుడు కూడా నామస్మరణకు మంచి అవకాశం కుదురుతుంది.


ఒక్కొక్క నామము ఒక్కొక్క మందు బిళ్ళలాగ పనిచేస్తూ ఎప్పటికయినా మన పురాతన పాపకర్మలన్నీ నశిస్తాయి .మరియు క్రొత్తగా మనము పాపకర్మలు చేయకుండా ఆ నామములు అడ్డుకుంటాయి.


నా కయితే నామస్మరణ శ్రధ్ధగా చేసినప్పుడు నా తెలివితేటలకు మించిన ఆలోచనలు రావటాన్ని గమనించాను.

బ్లాగ్ లో దైవానికి సంబంధించిన విషయములు వ్రాసినప్పుడు ....ఆ ఆలోచనలు ఇలా వచ్చినవే.


టి.వి చూస్తూ దైవనామస్మరణ అంటే ..ఉదా...ఎప్పుడైనా మన మనస్సు బాగోనప్పుడు దేవుని పూజ చేస్తూ అలవాటయిన సహస్రనామములను అంటూ ఉంటాము. కానీ మనస్సు మాత్రం వేరే సమస్య గురించి ఆలోచిస్తుంటుంది. ఇలా రెండు పనులు చేస్తున్నాము కదా.

ఇక ఆడవాళ్ళు ఉదయం పూట ఒక ప్రక్క వంట, ఒక ప్రక్క ఇంట్లో అందరికి అన్నీ చూస్తూ ఒక రకంగా అష్టావధానమే చేస్తుంటారు.


అలాగే మగవాళ్ళు కొందరు ఒకోసారి భోజనం చేస్తూ, ఫోన్ లో బిజీగా మాట్లాడుతూ ఉండటం చూస్తూంటాము.

ఇలాగే ఏదీ అసాధ్యం కాదండి.

అయితే టి.వి. చూస్తూ దైవనామస్మరణ వల్ల శ్రధ్ధ అంతగా ఉండచ్చు, ఉండకపోవచ్చు.

కానీ పూజ, దైవనామస్మరణ పూర్తిగా మానివేయటం కన్నా అసలంటూ చేయటం వల్ల ఎంతోకొంత పుణ్యం వస్తుంది కదండి.


నెమ్మదిగా దాని యందు శ్రధ్ధ పెరగటానికి కారణమవుతుంది. సాధన చేయగా,చేయగా అదే అలవాటవుతుంది.


సాధనలో ఒక స్థాయికి వెళ్ళిన వారికి తమ పనులు తాము చేసుకుంటూనే , మనస్సుతో, శ్వాసతో దైవనామస్మరణం చేయటం అలవాటవుతుందట. జనమేజయ మహారాజు, జనక మహారాజు వంటి వారికి సంసారములో స్వధర్మాన్ని ఆచరిస్తూ ఉన్నా మనస్సు మాత్రం దైవం యందు ఉంటుందట.

.....................

(ఈ క్రింద  కొన్ని  విషయాలను   కొంతకాలం తరువాత వ్రాసానండి... 

కళ్ళు మూసుకుని ధ్యానం చేయాలనుకున్నప్పుడు  ఆలోచనలు వేరే విధంగా వెళ్ళకుండా ఉండే విషయం గురించి ...క్రొత్త ఆలోచనలు  కలిగాయండి. 

ఉదా...లలితా సహస్ర నామములు పుస్తకం చూసి చదవటం కాకుండా,  నోటికి వచ్చిన వారు.. కళ్లుమూసుకుని లలితా సహస్రనామములను అనుకోవచ్చు. మనస్సులో  వేరే  ఆలోచనలు వస్తే నామములలో  పొరపాట్లు వస్తాయేమోననే భయం వల్ల.. శ్రద్ధ కుదిరే  అవకాశం ఉంటుంది. 

లలితా  సహస్రం  రానప్పుడు, ఎక్కువ సమయం పడుతుందని అనిపించినప్పుడు..లలితా అష్టోత్తరం కూడా అనుకోవచ్చు. లేదా ఇంకో  అష్టోత్తరం అయినా అనుకోవచ్చు.

దైవనామములను  త్వరత్వరగా  కాకుండా...
నిదానంగా  అనుకోవటం మంచిది. 

మంత్రం లేకుండా కూడా ధ్యానం చేయవచ్చు.  నిరాకారంగా కూడా దైవాన్ని స్మరించుకోవచ్చు. 

సుఖంగా కూర్చుని, కళ్ళు మూసుకుని, ఏ విధమైన మంత్రం కూడా లేకుండా ప్రశాంతంగా కొంత సమయం ఉన్నా కూడా ధ్యానమే అని కొందరు తెలియజేస్తున్నారు. 

ధ్యానం చేసేటప్పుడు రకరకాల ఆలోచనలు వచ్చినా వాటిని పట్టించుకోకుండా మనస్సుకు విశ్రాంతి కలిగేలా ప్రశాంతంగా ఉండాలి. కూర్చోలేకపోతే పడుకుని కూడా ధ్యానం చేయవచ్చు.

 కన్నులు మూసుకొని భక్తిగీతాలను విన్నా కూడా ప్రశాంతంగా  అనిపిస్తుంది.

 ఎవరి శక్తిని  బట్టి వారు  ధ్యానం చేయవచ్చు.

* ధ్యానం విషయంలో ఏమైనా సందేహాలు కలిగితే..  గురువు యొక్క సలహాలను పొందటం మంచిది. 

శ్వాసలు గబగబా తీసుకుంటే ఆయువు త్వరగా ఖర్చయిపోతుందని కొందరు అంటున్నారు.

 దైవనామస్మరణ ..మంత్రం చేసేటప్పుడు దైవంపైన ధ్యాసను చక్కగా నిలుపుకోగలిగితే మంచిది.

 పూజలో తెలిసీతెలియని పొరపాట్లు జరిగితే క్షమించమని దైవాన్ని ప్రార్ధించుకోవాలి.

సరైన విధంగా పూజ చేసేలా అనుగ్రహించమని దైవాన్ని వేడుకోవాలి.

*************

 ధ్యానం(మెడిటేషన్) ఎప్పుడు పడితే అప్పుడు చేయకూడదు. ధ్యానం చేయాలనుకుంటే ఆసన, ప్రాణాయామ, ప్రత్యాహార, ధారణా స్థితులు అభ్యసించి తర్వాత ధ్యానం చేయడం ప్రారంభించాలి. లేకుంటే అనవసరంగా వైద్యులు కూడా గుర్తించలేని అనారోగ్యాలు సంభవించే ప్రమాదం ఉంటుంది...అని అంతర్జాలం  ద్వారా  తెలుస్తున్నది. )

* ప్రాణాయామం, ధ్యానం..వంటివి  గురువుల  ద్వారా నేర్చుకుని ఆచరిస్తే మంచిదని  తెలుస్తున్నది.

***********
గతజన్మల కర్మల  ప్రభావం వల్ల మరియు  వర్తమానంలో చేస్తున్న కర్మల వల్ల జీవితంలో లాభ నష్టాలు, కష్టసుఖాలు కలుగుతాయి. 

మనస్సు చంచలమైనది... జీవితంలో ఎదురయ్యే సంఘటనలు, మరియు  సమాజం యొక్క ప్రభావం వల్ల మనస్సు  ప్రభావితం అయ్యే అవకాశాలున్నాయి. 

అందువల్ల, వీలైనంతలో దైవ స్మరణ, దైవనామ స్మరణ చేయాలి.

మనము జీవితంలో  సరైన విధంగా ప్రవర్తించేలా సహాయం చేయమని దైవాన్ని ప్రార్ధించాలి. 

దైవనామము, మంత్రము ఎక్కువసేపు చేయలేకపోతే... కండ్లు మూసుకొని దైవాన్ని స్మరించుకున్నా చాలు. 

****************...
.
దేవుని పూజ చేస్తూ అలవాటయిన సహస్రనామములను అంటూ ఉంటాము. కానీ మనస్సు మాత్రం వేరే సమస్య గురించి ఆలోచిస్తుంటుంది. ఇలా రెండు పనులు చేస్తున్నాము కదా.

దీన్నే తిరగవేసి .. జీవితంలో స్వధర్మాన్ని పాటిస్తూ అన్ని పనులు చేస్తూనే.. మనసు మాత్రం దైవాన్ని స్మరిస్తూ ఉంటే .. వాళ్ళని నిష్కామకర్మ యోగులు అనవచ్చేమో అనిపిస్తుంది నాకు.