కొన్ని ఆహార విషయాలు... రెండవ భాగం...

ఇక స్నాక్స్ విషయానికొస్తే , 

పకోడి...  సెనగపిండిలో   చాలా  కొద్దిగా  బియ్యపు పిండి, ఉల్లి, పచ్చిమిర్చి ముక్కలు కలిపి పకోడీ వేయటం కూడా తేలికే. ఉల్లిముక్కలు తిననివారు సన్నగా తరిగిన క్యాబేజ్ ముక్కలు, పచ్చిమిర్చి   వేసి పకోడి వేసుకోవచ్చు.

పకోడి కోసం కలిపే పిండిలో ఎక్కువ నీరు పోయకూడదు. ఎక్కువ నీరు పోస్తే నూనె బాగా పీల్చుకుంటుంది.  తక్కువ నీటితోనే  పిండి కలపాలి.  

.........................................

 మసాలా వడ...పచ్చిశనగపప్పు నానబెట్టి..నీరు అసలు పోయకుండా  పప్పును కచ్చపచ్చగా (coarse) రుబ్బుకుని , కొత్తిమీర, పుదీనా, ధనియాలపొడి, అర  టీ  స్పూన్   అల్లంవెల్లుల్లి ముద్ద , కొంచెం గరం మసాలాపొడి వేసి కలిపి మసాలా వడలు వేసుకోవచ్చు.  ఈ మసాలా వడలు  నూనె ఎక్కువగా పీల్చవు.

 

బైండింగ్ కొరకు రెండు టీ స్పూన్ లు బియ్యంపిండి కాని, శనగపిండికాని, జొన్నపిండి కాని కలుపుకోవచ్చు.  
..................................

 మిర్చిబజ్జీ...  రెండుకప్పుల శనగపిండి మరియు ఒకటీ స్పూన్ బియ్యంపిండి తీసుకుని, సుమారు  ముప్పావుకప్పు లేక ఒక కప్పు నీరు పోసి కలపాలి. 

బజ్జీ పైన పిండి ఎక్కువ ఉండాలంటే ముప్పావు కప్పు నీరు, పిండి తక్కువ ఉండాలంటే ఒకకప్పు నీరు పోయవచ్చు.

 

 ఒక టేబుల్ స్పూన్ వేడి నూనె కూడా కలపాలి. చిటికెడు వాము, ఒక టీస్పూన్ ఉప్పు, పావు టీస్పూన్ బేకింగ్ సోడా వేసి బాగా కలపాలి.
 

 పిండిని రెండు నిమిషాలు చేతితో బాగా గిలకొడితే బజ్జీలు బాగా పొంగుతాయి. రెండు కప్పుల శనగపిండికి పెద్ద మిరపకాయలతో సుమారు 12 నుండి 14 బజ్జీలు వేయొచ్చు.
 
మిరపకాయలు చివర కొద్దిగా కట్ చేసుకోవాలి. బజ్జీని పిండిలో ముంచి నూనెలో వేసేటప్పుడు గిన్నెకు రాస్తూ మిరపకాయ బయటకు కనపడేలా నూనెలో వేయాలి. మిరపకాయ మొత్తం పిండి ఉంటే మిరపకాయ వేగక కారంగా ఉంటుంది. 

 

సోడావేసాక బజ్జీలపిండిని రెండునిమిషాలు చేతితో బాగా గిలకొట్టాలి. ఇలా చేస్తే పిండిపొంగి, బజ్జీలు గుల్లగా వస్తాయి. బజ్జీలలో సోడా కలిపాక 15 నిమిషాల లోపు బజ్జీలు వేస్తే మంచిదట.

 

బజ్జీ లో నిలువుగా  చాకుతో  గాటుపెట్టి, అందులో ఉల్లిపాయ, కొత్తిమీర..సన్నగా తరిగి నిమ్మకాయ పిండి వేసుకోవచ్చు. లేకపోతే ఉడికించిన ఆలుముక్కలు కూడా పెట్టవచ్చు....గింజలు వద్దనుకుంటే తీసి, ఉల్లితరుగు లేక ఆలు పెట్టవచ్చు.

 

బయట బజ్జీలు వంటివి న్యూస్ పేపర్లో పెట్టి ఇస్తారు. అలా పేపర్లో తింటే అక్షరాలలో ఉండే ఇంక్ ఆహారంలో కలిసే ప్రమాదముంది. అలా న్యూస్ పేపర్లో ఆహారాన్ని పెట్టి ఇవ్వకూడదు.

.............

 స్త్రీలు వంటలకు పచ్చిమిర్చి కోసి చేతులు బాగా కడుక్కున్నా కూడా, మంట పోదు. ఆ చేతులతో చంటిపిల్లలకు నలుగుపెట్టి స్నానం చేయిస్తే, కళ్ళు, వళ్ళు రుద్దినప్పుడు పిల్లలు మంటపుట్టి ఏడుస్తారు. 

 

వాళ్ళు మంట అని చెప్పలేరు, ఎందుకు ఏడుస్తున్నారో తెలియదు కాబట్టి, చిన్నపిల్లలకు స్నానం చేయించే స్త్రీలు మిర్చి తరగాలంటే చేతులకు గ్లవ్స్ వేసుకోవటం మంచిది.

........................

ఉప్మాకు.. ఒకకప్పు సన్నగోధుమరవ్వకు సుమారు మూడున్నర గ్లాసుల నీరు పడుతుంది. పల్చగా రావాలంటే  నాలుగున్నర  లేక అయిదు గ్లాసుల నీరు కూడా పోసి, సుమారు పది నిముషాలు ఉడికించుకుని మూతపెట్టి 10 నిముషాల తరువాత వడ్దించుకోవాలి. 

 

వేయించిన గోధుమ రవ్వ వేయవచ్చు లేదంటే,   గోధుమరవ్వను ముందే కొద్దిగా నీరు పోసి నానబెట్టుకుంటే ఉప్మా త్వరగా అవుతుంది.
......................................

   అంబలి...ఒకగ్లాసు నీటిలో ఒక టేబుల్ స్పూన్ రాగి పిండి కాని, జొన్న పిండి కాని వేసి బాగా కలిపి సుమారు అర్ధగంట అయినా నానబెట్టాలి. తరువాత పొయ్యిమీద కలుపుతూ గడ్డకట్టకుండా, సుమారు పది లేక పదిహేను నిమిషాలు ఉడికించాలి. పొయ్యి ఆఫ్ చేసి బెల్లం కలపాలి. 

 

ఈ అంబలి రాత్రంతా ఉంచి ఉదయం తాగితే చాలా మంచిది.  ఉదయం తయారుచేసి రాత్రి కూడా తాగవచ్చు.

.........................

 మామూలుగా అరకప్పు బియ్యం ఒక మనిషికి సరిపోతుందట. 

ఉప్మా కు కూడా అరకప్పు రవ్వ ఒక మనిషికి లెక్క.

అంటే, నలుగురు మనుషులుంటే నాలుగు అరకప్పులు అంటే రెండు కప్పుల రవ్వ   సరిపోతుంది. అయితే,  తినే వారి అలవాటును బట్టి కొంచెం ఎక్కువ, తక్కువా తీసుకోవచ్చు.

*********************

* అర్ధ కిలో మినపప్పుకు సుమారు 30 గారెలు వేయొచ్చు .
* ఒక కప్పు శనగపప్పుకు సుమారు 15 మసాలా వడలు వేయొచ్చు. 
* రెండు కప్పుల గోధుమపిండితో మధ్య(medium) సైజువి  సుమారు 15 పూరీలు చేయవచ్చు.
* రెండు కప్పుల గోధుమపిండితో సుమారు 10 చపాతీలు చేయొచ్చు.

 .......................................

 చపాతి ....కలపటానికి ఒక కప్ గోధుమ పిండి అయితే, సుమారు సగం కప్ లేక ఇంకా కొద్దిగా తక్కువ నీరు సరిపోతుంది.  గోరువెచ్చటి నీటిలో ఒక టేబుల్ స్పూన్  నూనె వేసి పిండిని కలపాలి.

 

చపాతి కాల్చిన వెంటనే ఒక బాక్స్ లో వేసి, వెంటనే  పైన మూత పెడితే గట్టిపడకుండా మెత్తగా ఉంటాయి.
.....................................

 

1.  ఇడ్లీలోకి, దోసెలకు పచ్చడి... ఈ పచ్చడి 5 నిమిషాల్లో చేయవచ్చు.  

 

  మిక్సీలో మూడుపచ్చిమిర్చి, చిన్నగా తరిగిన పచ్చికొబ్బరి ముక్కలు,  వేయించిన శనగపప్పు (పుట్నాల పప్పు) , చాలాకొద్దిగా చింతపండు, ఉప్పు..నీళ్ళు వేసి రుబ్బి కావాలంటే తిరగమోత వేసుకోవాలి. పచ్చడిలో కొద్దిగా వేయించిన వేరుశనగపప్పు కూడా వేసుకోవచ్చు. (నేను పచ్చిమిర్చి వేయించను. ) 

 

  చట్నీలో చింతపండు వేయకపోయినా ఫరవాలేదు. కొబ్బరి లేకుండా పుట్నాల పప్పు, వేయించిన వేరుశనగపప్పు వేసి కూడా చట్నీ చేయవచ్చు. 

 

వేరుశనగపప్పు అరకిలో అలా ముందే బాణలిలో వేయించి డబ్బాలో పెట్టుకుంటే, చట్నీ కోసం ఉదయాన్నే పల్లీలు వేయించే పని ఉండదు. కడాయిలో అసలు నూనె వేయకుండా వేయించవచ్చు. లేదంటే, కడాయిలో పావుటీస్పూన్ నూనె మాత్రం వేసి వేయించినా త్వరగా వేగుతాయి.

 

* వేరుశనగపప్పు వేయించి డబ్బాలో పెట్టుకుంటే, బూజు రాకుండా ఉంటుంది.  బూజు వచ్చిన వేరుశనగపప్పు
(ground nuts)  ప్రమాదం,  వాడకూడదు.  

  ................. ..........................

 

 2.  ఇడ్లీలోకి, దోసెలకు పచ్చడి... బాణలిలో నూనె వేసి, అందులో   సొరకాయముక్కలు, టమేటో ముక్కలు, పచ్చిమిర్చి, కొద్దిగా చింతపండు, కొద్దిగా కరివేపాకు,  పసుపు, ఉప్పు..కొద్దిగా నూనెలో వేయించి రుబ్బి,  పచ్చడి చేసి ఈ పచ్చడి కూడా ఇడ్లీ, దోసెలతో తినవచ్చు. బీరకాయపచ్చడి  లేక దోసకాయ పచ్చడి కూడా చేయవచ్చు.

 

కూరగాయలతో చేసే ఈ పచ్చళ్లు సులభంగా అరుగుతాయి.

**********************

 సొరకాయ గింజల పచ్చడి ... సొరకాయ{ ఆనపకాయ } లేత  గింజలు ఉంటే  గింజలు తీసి పచ్చడి చేసుకోవచ్చు.  సొరకాయ  గింజలు, మిర్చి, చింతపపండు, ఉప్పు, పసుపు, టమేటో , కరివేపాకు, కొత్తిమీర..అన్నీ బాణలిలో వేయించి , మిక్సీలో మెత్తగా రుబ్బి పోపు పెట్టుకుంటే సొరకాయ గింజల పచ్చడి. తయారవుతుంది. సొరకాయలో మిగతా భాగం కూర వండుకోవచ్చు.

*************************

పెసరట్టు...   ఒక కప్పు పొట్టుతో ఉన్నగుండు పెసలను రెండు కప్పుల నీరు పోసి రాత్రంతా నానబెట్టాలి.పెసలను ముందే శుభ్రంగా కడుక్కుని, మంచినీరుపోసి నానబెట్టి మూతవేసుకుంటే....... 

 

ఉదయం ఆ నానిన నీటిని వడకట్టి ఒకగిన్నెలో పోసుకుని, పెసలను మిక్సీలో వేసి రుబ్బటానికి,  నానగా వచ్చిన నీటిని పోసి, ఇంకా కావాలంటే మరికొన్ని నీరు పోయాలి. 

 పెసలను మిక్సీలో రుబ్బటానికి సుమారు ఒకకప్పు + అర కప్పు..నీరు పోయాలి. రెండు టేబుల్ స్పూన్ల బియ్యపు పిండిని పెసలలో వేసి రుబ్బుకోవచ్చు.

అల్లం, పచ్చిమిర్చి వేసి కూడా రుబ్బుకోవచ్చు. 

 

 రుబ్బిన పిండిలో కొద్దిగా జీలకర్ర కలపాలి, లేదంటే అట్టు పైన జీలకర్ర వేయవచ్చు.

 పెసరట్టు పిండిని.. మినపట్టు పిండిలా పులవబెట్టకూడదు.  పెసరట్టు పిండిని రుబ్బిన వెంటనే దోసెలు వేసుకోవాలి. 

 పిండి మిగిలితే వెంటనే ఫ్రిజ్లో పెట్టుకోవాలి. 

 
 ఊల్లిముక్కలు, పచ్చిమిర్చి, కొత్తిమీర....దోస పైన వేసి కాల్చుకోవాలి. 

 

(అయితే, పొట్టులేని పెసరపప్పు నానటానికి అరగంట చాలు. ఉదయమే నానబెట్టి పెసరట్టు వేయవచ్చు,  పొట్టులేని పెసరపప్పు రుబ్బి పెసరట్లు వేయటానికి తక్కువనీరు సరిపోతుంది.)

..........................
మినప్పప్పు+ బియ్యంతో చేసే దోసెపిండిని, పెసరట్టు పిండిని కలిపి కూడా దోసెలు వేయవచ్చు. 

...................................

  పిల్లలకు.... పెసలు, వేరుశనగపప్పు, శనగలు, రాగులు, బొబ్బర్లు.. ..వంటి రకరకాల గింజలను  తెచ్చి   రాత్రి పూట నానబెట్టి   ఉదయాన్నే అల్పాహారంలా తినవచ్చు. 

అందులో కొంచెం కొత్తిమీర, పుదీనా, కీరదోసముక్కలు, నిమ్మరసం, ఉల్లిముక్కలు వేసుకోవచ్చు.

లేకుంటే,  నానబెట్టిన  గింజలను  కుక్కర్లో ఉడికించి , గుగ్గిళ్లలా తినవచ్చు. ఇందులో  కొంచెం కొత్తిమీర, పుదీనా, కీరదోసముక్కలు, నిమ్మరసం, ఉల్లిముక్కలు వేసుకోవచ్చు.

పాతకాలంలో  నూనెవంటలు ఎప్పుడో పండుగల్లో వండుకునేవారట. 

పాతకాలంలో  గుగ్గిళ్లను ఎక్కువగా తినేవారట.   ఈ కాలంలో శారీరికశ్రమ తగ్గి, తిన్నది   అరగటం లేదు కాబట్టి,  గుగ్గిళ్ళ్ను  కొద్ది మొత్తంలో తినవచ్చు.

  

పెసలు, శనగలు అన్నీ నానబెట్టినవి అమ్ముతున్నారు . అయితే, బయటవాళ్ళు నానబెట్టటం కాకుండా,   రకరకాల గింజలను కలిపి చిన్నప్యాకెట్లలో అమ్మితే, ఇంటికి తెచ్చి నానబెట్టుకోవచ్చు.  

**********************
ఉలవలను నానబెట్టి, కుక్కర్లో ఎక్కువసేపు ఉడికించాలి. తరువాత  చారులా చేయవచ్చు. 

లేదంటే ఉలవచారు బయట అమ్మేవి తెచ్చుకోవచ్చు. ఉలవలు ఆహారంలో తీసుకోవటం మంచిది. 
*********************

ఇక డ్రైఫ్రూట్స్ సంగతి తెలిసిందే. రోజూ కొద్దిగా తినవచ్చు. ఏదైనా,  ఎవరి అరుగుదలను బట్టి వారు తీసుకోవాలి. 

.............................

పప్పుల పొడి..... బాణలిలో కొంచెం మినప్పప్పు, కొంచెం కందిపప్పు, కొంచెం నువ్వులు, కొంచెం జీలకర్ర  విడివిడిగా వేయించుకుని తీసి   ప్రక్కన పెట్టుకోవాలి. 

బాణలిలో  కొద్దిగా  నూనె వేసి, అందులో  ఎండుమిరపకాయలు, కరివేపాకు  వేసి వేయించుకోవాలి. 

 

 పైన వేయించుకున్న పప్పులు, ఎండుమిరపకాయలు, కరివేపాకు,  వేయించిన శనగపప్పు ( పుట్నాల పప్పు ) ,  ఉప్పు, వెల్లుల్లి ....ఇవన్నీ పొడి కొట్టి పిల్లలకు పంపిస్తే వేడి అన్నంలో నేయి వేసుకుని తినవచ్చు. ఇడ్లీలో , దోసెల్లో తినవచ్చు. 

ఈ పొడిని వేపుడు కూరల్లో కూడా వేసుకోవచ్చు. కూరల్లో వేసి కొన్ని నీరు పోసుకుంటే గ్రేవీ కూర  కూడా తయారవుతుంది.  ఇష్టమున్నవారు   పొడిలో  ఎండుకొబ్బరి కూడా వేసుకోవచ్చు.  

..............................

  ఒక కప్పు మినప్పప్పు, ఒకకప్పు బియ్యం సుమారు నాలుగు గంటలు నానబెట్టి మెత్తగా రుబ్బి, అరకప్పు సన్నటి ఇడ్లిరవ్వ కలిపి రాత్రంతా ఫ్రిజ్లో పెట్టి, లేక బైట పెట్టి ఉదయాన నూనెలో బోండాల్లా వేసుకుంటే బాగుంటాయి. పిండిలో తరిగిన పచ్చిమిర్చి, ఉల్లిముక్కలు, కొత్తిమీర..వేసుకోవచ్చు.పిండి పల్చగా అయ్యేట్లు ఎక్కువనీరు కలపకూడదు.  పిండి మరి గట్టిగా ఉండకూడదు.

..........................

 

ఇడ్లీ..ఒక కప్పు మినప్పప్పు రెండుగంటలు నానబెట్టి, రెండు కప్పులు  సన్న  ఇడ్లీరవ్వలో రెండుకప్పులు నీరుపోసి పక్కన పెట్టుకోవాలి.

 మిక్సీలో పిండి రుబ్బటానికి, రవ్వలో పోయటానికి మొత్తం మూడుకప్పులు నీరు పడుతుంది...కప్పు బాగా పైకి రవ్వ తీసుకుంటే, ఇంకో పావుకప్పు నీరు కూడా పోయవచ్చు.
ఇడ్లీరవ్వ నీటిలో నాని, కొంతసేపటికి చిక్కగా అవుతుంది.

 

( కొందరు, ముందే ఇడ్లీరవ్వను కడిగి, నానబెట్టి,  రుబ్బిన మినప్పప్పులో వేస్తారు.  )

  .

  మినపప్పు  రుబ్బి, రవ్వలో కలిపి ఒక టీస్పూన్ ఉప్పువేసి, ఇడ్లీపిండిని కిందనుండి పిండి, రవ్వ అంతా బాగా కలిసేలా  చేత్తో కానీ,  గరిటతో కానీ,  రెండునిమిషాలు బాగా కలిపితే, పిండి బాగా పొంగుతుంది.

  

పిండి రాత్రంతా ఉంచి, ఉదయం ఇడ్లీ వేసుకోవచ్చు.  ఇడ్లీ 15 నిమిషాలు మీడియం మంటతో ఉడికినతరువాత పొయ్యి తీసి, 10 నిమిషాల తరువాత మూత తీయాలి. 

ఇడ్లీ పిండి పొంగకుంటే, కొంతపిండిని గిన్నెలో తీసుకుని ఆ పిండి లో జీలకర్ర వేసి,  దిబ్బరొట్టి,  గుంతపొంగనాలు కానీ వేసుకోవచ్చు. పిండి పొంగిన తరువాత ఇడ్లీలు వేసుకోవచ్చు.

 ................................

 
ఇడ్లీ పిండిలో కొద్దిగా తక్కువ నీళ్లు పోసి,  నూనెలో  వేయించే  పునుగులు కూడా వేయవచ్చు..

మినప్పప్పు, బియ్యం ఏ కప్పుతో తీసుకున్నామో అదే కప్పుతో కొలతలు తీసుకోవాలి.   పునుగులుకి  సుమారు  2+పావు కప్పు   నీరు పడుతుంది... 

 

పిండి గ్రైండర్లో కాకుండా, మిక్సీలో రుబ్బటం గురించి ఈ లెక్కలు ..

 ఇడ్లిపిండి గట్టిగా ఉంటే ఇడ్లీలు గట్టిగా ఉంటాయి. అలాగని పిండి పల్చగా అవకూడదు. 

 

ఇడ్లీ పిండి చలికాలంలో త్వరగా పులవాలంటే, పిండి గిన్నెను ఇంకో పెద్ద గిన్నెలో పెట్టి పైన మూత పెట్టాలి. ఖాళీగా ఉన్న కుక్కర్ల్ లేక హాట్ కేస్లో పెట్టి మూత పెట్టవచ్చు. గిన్నెను తలుపులు ఉన్న అలమారులో పెడితే చల్లగాలి తగలకుండా త్వరగా పులుస్తుంది.

 

*******************

* ఒక కప్పు మినప్పప్పు నానబెట్టి రుబ్బి, రెండుకప్పుల ఇడ్లీరవ్వ వేసి కలిపి, ఆ పిండిలో అర్ధకప్పు రాగిపిండి లేక అర్ధకప్పు జొన్నపిండి కలుపుకుని సుమారు 7 గంటలు తరువాత ఇడ్లీ వేసుకోవచ్చు.

 

 * జొన్న లేక రాగిపిండిలో రెండు టేబుల్ స్పూన్ల నీరుపోసి కలిపి, రుబ్బిన ఇడ్లీపిండిలో వేసి బాగా కలపాలి. లేదంటే, పప్పు రుబ్బేటప్పుడు రాగి లేక జొన్న పిండిని కూడా వేసి రుబ్బవచ్చు.

 

* కప్పు మినప్పప్పు, కప్పు బియ్యం తో పాటు, కప్పు రాగులను కానీ,కప్పు జొన్నలను కానీ నానబెట్టి రుబ్బి ఇడ్లీలు, దోసెలు వేయవచ్చు..నానబెట్టిన రాగులు, జొన్నలకు బదులు రాగిరవ్వ, జొన్న రవ్వతో కూడా ఇడ్లీలు, దోసెలు చేయవచ్చు. 

 

* బియ్యం  లేకుండా..మినప్పప్పు, రాగులుకానీ, జొన్నలుకానీ వేసి కూడా చేస్తారు.

 

* ఒకకప్పు మినప్పప్పు నానబెట్టి మెత్తగా రుబ్బి, రెండుకప్పుల జొన్నలు నానబెట్టి రవ్వలా బరకగా రుబ్బి..రెండూకలిపి ఇడ్లీలు వేసుకోవచ్చు.ఉప్పు వేయాలి. 

 ................................

 

 దోసె....ఒక గ్లాస్ మినప్పప్పు, రెండు గ్లాసుల బియ్యం, ఒక టీ స్పూన్ మెంతులను పగలు 3 గంటలు   నానబెట్టి, సాయంత్రం  రుబ్బి,  రాత్రంతా పులవనిచ్చి , ఉదయం  దోసెలు వేసుకోవచ్చు.  ఇలా అయితే, దోస క్రిస్పీగా ఉంటుంది.

 

దోసెలు మెత్తగా రావాలంటే ఒకపావుకప్పు అటుకులను  నానబెట్టి,  కలిపి రుబ్బుకోవాలి.

  

ఈ పిండి రుబ్బిన తరువాత  పిండిలో అర్ధ కప్పు రాగిపిండి కాని, జొన్న పిండి కాని కలిపి  పులవనిచ్చి , ఉదయం  దోసెలు వేసుకోవచ్చు.   

మినపప్పు ఎక్కువగంటలు నానితే,దోసెలు  త్వరగా పులుస్తాయని యూట్యూబులో ఒక చానల్ ద్వారా విన్నాను. 3 గంటలు నానితే సరిపోతుందట. 

 

 దోసెల పిండి తక్కువ నీటితో రుబ్బి పునుగులు  వేసుకోవచ్చు. మరికొన్ని ఎక్కువ నీరు కలిపి దోసెలు, ఊతప్పం.. వేసుకోవచ్చు....పునుగులకు సుమారు  రెండు గ్లాసుల నీటితో రుబ్బుకోవచ్చు. దోసెలకు సుమారు  మూడున్నర గ్లాసుల నీరు పడుతుంది. 

 

నూనెలో వేగే పునుగులకు,  పొంగణాలకు పిండి గట్టిగా ఉండకూడదు,పల్చగా ఉండకూడదు మధ్యస్థంగా ఉండాలి. 

దోశపిండితో వేసే గుంతపొంగణాలకు పిండి మధ్యస్థంగా ఉండవచ్చు, దోసపిండిలా పలుచగా ఉన్నా కూడా పొంగణాలు పొంగి బాగుంటాయి.

 మినప్పప్పు, రేషన్ బియ్యం, సోనామసూరి, పాతబియ్యం రకాలను బట్టి, కొన్నిసార్లు నీరు కొంత ఎక్కువకానీ, తక్కువకానీ పట్టవచ్చు. 

దోసపిండిలో మెంతులు నానబెట్టి రుబ్బితే మిక్సీకి మెంతులు అంటుకుని శుభ్రం చేయటం కష్టం. అందుకని, ఒక టీస్పూన్ నీటిలో పావుటీస్పూన్ మెంతిపిండి వేసి కలిపి, రుబ్బినపిండిలో వేసి బాగా కలిపి పిండిని రాత్రంతా పులవనివ్వాలి. 

 

మెంతిపొడి డబ్బాకూడా పురుగు రాకుండా ఫ్రిజ్లో పెట్టాలి.
............................

1 కప్పు తెల్ల జొన్నలు, పావుకప్పు సోయా గింజలు, పావుకప్పు మినప్పప్పు, అర టీస్పూన్ మెంతులు..కడిగి,సుమారు 6 లేక 8 గంటలు నానబెట్టాలి. అన్నీ మెత్తగారుబ్బి, ఉప్పు కలిపి సుమారు 6 గంటలు పులవనిచ్చి, ఇడ్లీలు వేసుకోవచ్చు.

******************************

 links..

*పూర్ణాలు..గారెలు..విప్పింగ్ బ్లేడ్..పులిహోర..

 

 సులువుగా చక్కలు వత్తే పద్ధతి ...

 

ఈ రోజుల్లో ఆహారం గురించి కొన్ని విషయాలు.. మరియు స...

 

 

కొన్ని ఆహార విషయాలు... ఒకటవ భాగం...

ఇంటికి దూరంగా చదువుకుంటున్న  లేక ఉద్యోగం చేసుకుంటున్న టీనేజ్ యువత కొన్ని వంటలను నేర్చుకుంటే మంచిది.  రోజూ  వంట చేసుకోవటానికి సమయం కుదరకపోవచ్చు, కానీ అప్పుడప్పుడు ఖాళీ కుదిరినప్పుడు కొన్ని రకాలు వండుకుని తినవచ్చు.

కారెట్, బీన్స్, ఆలు.వంటి కూరగాయ ముక్కలు ఎక్కువగా వేసి  పులావ్ చేయటం.... బియ్యం, కందిపప్పు, కూరగాయలు వేసి  సాంబార్ బాత్  చేయటం..

బియ్యం, పెసరపప్పు తో పొంగలి, ఇష్టమయితే పొంగలిలోనే  బీన్స్, ఆలూ, కారట్, వంటి కూరగాయల ముక్కలు వేసుకుని  కిచిడీ.. వంటివి సులువుగా వండగలిగే పుష్టికరమైన వంటలు.

పులావ్, సాంబార్ బాత్  , పొంగలి, గోధుమ రవ్వ ఉప్మా.. వంటివి పక్కాగా చేయితిరిగిన వాళ్లు అన్ని దినుసులు సమపాళ్ళలో వేసి వండినట్లు వండకపోయినా....  మామూలుగా వండినా రుచిగానే ఉంటాయి. 
*******

పులావ్ ..  కుక్కర్లో  కొద్దిగా నూనె  వేసి... అందులో కారెట్, బీన్స్, ఆలు...వంటి కూరగాయముక్కలు, కొద్దిగాఉల్లి, పచ్చిమిర్చి ముక్కలు, కొద్దిగా తరిగిన పుదీనా, కొత్తిమీర, మసాలా దినుసులు ..పావు టీ స్పూన్ షాజీర, పులావ్ ఆకులు రెండు, రెండు ఇలాచి, కొద్దిగా లవంగాలు, ఒక స్టార్పువ్వు, ఒక స్పూన్ గరం మసాలా, సగం స్పూన్ అల్లం.. వెల్లులి..పచ్చిమిర్చి ముద్ద ...వేసి కొద్దిగా వేయించి...

 

కడిగి ఉంచుకున్న బియ్యం వేసి , రుచికి సరిపడినంత ఉప్పు వేసి, తగినన్ని నీళ్లు పోసి కుక్కర్ మూత పెట్టి, తరువాత వెయిట్ పెట్టాలి. అన్నంలా వండుకుని దింపేస్తే , పులావ్ తయారవుతుంది. 

మామూలు అన్నం కన్నా, పులావ్ కు బియ్యంలో కొద్దిగా నీళ్ళు తక్కువ పోయాలి.

పులావ్ తో పాటు పెరుగులో ఉల్లిముక్కలు, మిర్చి వేసి తినవచ్చు.  పులావ్లో ధనియాలు+జీలకర్ర పొడి వేయనవసరం లేదు.  ధనియాలు+జీలకర్రపొడి మసాలా గ్రేవీకూరల్లో వేయాలి.
.................................................................

పులావ్ తో కూర..అల్లం..వెల్లుల్లి..పచ్చిమిర్చి పేస్ట్ చేసుకోవాలి. పచ్చికొబ్బరి, జీడిపప్పు, వేయించిన చాలాకొన్ని వేరుశనగపప్పు రుబ్బి,  అందులోనే టమేటోముక్కలు వేసి రుబ్బి పెట్టుకోవాలి.

 

నూనెలో సన్నగా తరిగినఉల్లిముక్కలు లేక మిక్సీలో కచ్చాపచ్చగా (coarse)చేసిన ఉల్లిముక్కలు, ఉప్పు, పసుపు, కారం వేసి వేయించి, పచ్చిమిర్చి, అల్లం, వెల్లుల్లి కలిపి పేస్ట్ చేసి వేసి వేయించాలి. బటాణి, కారట్, ఆలూ, బీన్స్ వేయాలి.

  జీడిపప్పు, కొబ్బరి,  కొద్దిగా వేరుశనగపప్పు , టమేటోముక్కలు..రుబ్బిన  పేస్ట్   వేయాలి. 3 టీ స్పూన్లు (1Table spoon) ధనియాలు+జీలకర్ర పొడివేయాలి....టీ స్పూన్  గరం మసాలా పొడివేయాలి

 

కూరలో నీరుపోసి చిక్కగా అయ్యేవరకు ఉడికించుకుంటే పులావుతో  పాటు  తినే  గ్రేవీ తయారవుతుంది.  దింపేముందు కొద్దిగా కసూరిమెంతిపొడి కూడా వేసి రెండునిమిషాలు ఉడికించి కొత్తిమీర వేసుకోవచ్చు.కుక్కర్లో కూడా వండుకోవచ్చు.

ఈ విధంగా ఆలూ ముక్కలు వేసి వండితే ఆలూకూర , పూల్మఖానా వేస్తే మఖానా కూర, బీన్స్, కారట్, ఆలు వేసి మిక్స్ వెజిటబుల్ కూర చేయొచ్చు.

 

ఉల్లి, వెల్లుల్లి తిననప్పుడు కొబ్బరి, జీడిపప్పు, కొద్దిగా వేరుశనగపప్పు, గుమ్మడివిత్తనాలు పేస్ట్ చేసి వేస్తే గుజ్జు వస్తుంది. గ్రేవీగుజ్జులో   వేరుశనగపప్పు  కొద్దిగా వేస్తే చాలు.

.........................................................
 సాంబార్ బాత్.. బియ్యం, కందిపప్పు, కూరగాయలు వేసి సాంబార్ బాత్  చేయటం..కూరగాయల ముక్కలు, టమేటో మరియు కొద్దిగా చింతపండు ఉడికించుకుని ఉంచుకోవాలి. 

ఒక గ్లాస్ బియ్యానికి పావుగ్లాస్ కందిపప్పు,  సరిపడినంత నీరు పోసి, కుక్కర్ మూత పెట్టి తరువాత వెయిట్ పెట్టాలి. 

అన్నం, పప్పు ఇలా ఉడికించుకుని, మెత్తగా మెదిపి అందులో ఉడికిన కూరగాయల ముక్కలు, చింతపండు పులుసు, ఉప్పు, కారం, ధన్యాలు, జీలకర్రపొడి, సాంబార్ పౌడర్.. వేసి నీరు పోసి పల్చగా చేయాలి.

అయిదు నిమిషాలు ఉడికిన తరువాత నూనె, నేయి వేసి , ఆవాలు, జీలకర్ర, ఇంగువ, కొద్దిగా మెంతిపొడి, కరివేపాకుతో తిరగమోత వేసుకుని, అంతా గరిటెతో మెత్తగా తిప్పుకుంటే రుచికరమైన సాంబార్ బాత్ రెడీ. 

ఇది కొద్దిగా వండినా చాలా అవుతుంది. కొద్దిగా తిన్నా బోలెడు తిన్నట్లుంటుంది.

........................................
మాములుగా అన్నం కొరకు .... రేషన్ బియ్యం, సోనామసూరి..ఇంకా రకాలుంటాయి.
కొన్ని రకాల బియ్యానికి, ఒకకప్పు బియ్యానికి..ఒకటిన్నర నుండి రెండుకప్పుల నీరు పడుతుంది. పాతబియ్యం అయితే, ఒకకప్పు బియ్యానికి..రెండు కప్పుల నుండి రెండుంపావు లేక రెండున్నర కప్పుల నీరు పట్టవచ్చు.

బాస్మతి బియ్యం అయితే, కొద్దిగా తక్కువ నీరు పోస్తారు. కుక్కర్లో ఒకకప్పు బియ్యానికి ఒకటిన్నర కప్పు నీరు పోస్తారు. విడిగా గిన్నెలో వండితే గ్లాసుకు రెండుగ్లాసుల నీరు పోస్తారు.

బాస్మతి బియ్యంతో కాకుండా, సోనామసూరి బియ్యంతో కూడా పులావ్ చేయవచ్చు. అయితే, కొంత తక్కువ నీరు పొయ్యాలి. 

 ..............................................
పొంగలి.... కప్పు బియ్యం, అరకప్పు పెసరపప్పు కడిగి ఉంచుకోవాలి. కుక్కర్లో కొద్దిగా నూనె, కొద్దిగా నేయి వేసి అందులో కొద్దిగా జీలకర్ర వేసి, కడిగి ఉంచిన బియ్యం, పెసరపప్పు అందులో వేసి బియ్యం, పెసరపప్పు కొద్దిగా వేయించుకుని, అందులో తగినన్ని నీరు పోయాలి. 

బియ్యంకప్పు, పెసరపప్పుకప్పు కూడా వేసుకోవచ్చు.ఆ నీటిలో ఉప్పు వేయాలి. కుక్కర్ మూత పెట్టి, తరువాత వెయిట్ పెట్టాలి.

విడిగా మూకుడులో నూనె లేక నెయ్యి వేసి, జీడిపప్పు,దంచిన మిరియాలపొడి, ఇంగువ, కరివేపాకు వేసి వేయించి పొంగలిలో కలిపి రెండునిమిషాలు ఉడికించాలి.

ముందే బియ్యంలో కొద్దిగా నీరు ఎక్కువ పోసుకోవచ్చు. నీరు ఎక్కువయితే పొంగుతుందనుకుంటే, ఉడికిన తరువాత పొంగలిని     గరిటతో మెత్తగా మెదిపి, ఒక అరగ్లాస్ నీటిని వేడి చేసి,  పొంగలిలో కలిపితే  పొంగలి  పల్చగా అవుతుంది.  మళ్ళీ  గరిటెతో ఒకసారి తిప్పితే సరిపోతుంది. 

*********************
నిమ్మకాయ పులిహోరకు .. అన్నం వండి ఒక పళ్ళెంలో ఆరబెట్టాలి. బాణలిలో కొద్దిగా నూనె వేసుకుని , ఎండుమిరపకాయలు, ఆవాలు, జీలకర్ర, పప్పులు, ఇంగువ, మెంతిపొడి, కరివేపాకు, పచ్చిమిరపకాయముక్కలు, పసుపు..  వేసి వేయించాలి. వేగిన తరువాత అన్నంలో కలపాలి. 

 అన్నం  వేడి ఆరిన తరువాత  అందులో  ఉప్పు, నిమ్మకాయ రసం పిండుకుని బాగా కలుపుకుంటే నిమ్మకాయ పులిహోర తయారవుతుంది.
.................................

గోధుమ రవ్వ ఉప్మా.. పొయ్యి పైన కడాయి పెట్టి  రెండు టేబుల్స్పూన్ల  నూనె వేసి అందులో ఆవాలు, జీలకర్ర, పచ్చిసెనగపప్పు, వేరుశనగపప్పు, కరివేపాకు, వేసి వేయించి, ఒక ఉల్లిపాయ ముక్కలు, కొద్దిగా పచ్చిమిర్చి, తరిగిన చిన్న ఆలూ, ఒక చిన్న కారెట్, ఒక చిన్న టమేటో ముక్కలు, ఉంటే కొన్ని పచ్చి వేసి కొద్దిసేపు వేయించాలి. టమేటో ముక్కల బదులు మిక్సీలో మెత్తగారుబ్బిన టమేటోగుజ్జు కూడా వేయవచ్చు.

ఇవన్నీ లేకపోయినా ఉన్నవి వేసుకోవచ్చు. ఒక గ్లాసు సన్నగోధుమ రవ్వకు మూడు లేక మూడున్నర గ్లాసుల నీరు పోసి సరిపడినంత ఉప్పు వేసి పది లేక పదిహేను నిమిషాలు ఉడికించాలి.పల్చగా కావాలంటే, మరికొన్ని నీరు పోసుకోవచ్చు.

గోధుమరవ్వను కొద్దిసేపు ముందు ఒకగ్లాసు నీరు పోసి నానబెట్టుకుంటే త్వరగా ఉడుకుతుంది. ఉప్మాలో నీరు పోసేటప్పుడు రవ్వ నానపెట్టటానికి పోసిన నీటిని కూడా లెక్కించి పోయాలి.
..................................
ఎవరి కుక్కర్ అలవాటు బట్టి వారు  ఎన్ని విజిల్స్ అవసరమో అలా వండుకోవాలి. 
కుక్కర్ అల్యూమినియంది కాకుండా , స్టెయిన్ లెస్ స్టీల్ కుక్కర్ అయితే ఆరోగ్యానికి మంచిది.

ఒక టేబుల్ స్పూన్ అంటే సుమారుగా మూడు టీ స్పూన్లు. 
..........................................

ఇవన్నీ పెద్దవాళ్లకు దూరంగా ఉన్న టీనేజ్ పిల్లలకు తేలికగా వండుకునేలా వ్రాసిన పుష్టికరమైన వంటలు. 

టీనేజ్ వాళ్ళు వీలుకుదిరినప్పుడు  కొంచెం ఓపికతో వండుకుంటే మంచిది.  ఎప్పుడూ బయటే తినడం కాకుండా ఇంటివద్ద  వండుకుని తినడం వల్ల ఆరోగ్యం పాడవకుండా ఉంటుంది.
............................................. 

ఈ రోజుల్లో పురుగుమందులు వేయకుండా, హైబ్రిడ్ కాని, పాతకాలపు బియ్యపు రకాలు లభిస్తున్నాయి. ఉదా.. నవారా బియ్యం, బహురూపి బియ్యం... రకాలు.

 

 ఆ బియ్యం వాడుకుంటే ఆరోగ్యానికి చాలా మంచిదని విజయరాం గారు తెలియజేసారు. ఆర్గానిక్ బియ్యంతో కట్టెపొంగలి, సాంబార్ అన్నం కూడా వండుకోవచ్చు.

.................................

లడ్దూ... కొద్దిగా వేరుశనగపప్పు, కొద్దిగా  నువ్వులు   వేటికవి  విడివిడిగా వేయించి  మిక్సీలో తిప్పితే పొడి అవుతుంది. తరిగిన బెల్లం  వేసి  మరల  మిక్సీలో తిప్పాలి. 

 ఈ పొడిని ప్లేట్లో వేసి కరిగించిననెయ్యి లేక వేడిచేసిన నూనె కలిపి లడ్దూలు చుట్టుకోవాలి. వేయించిన జీడిపప్పు, బాదం పలుకులు లడ్దూలో కలిపితే ఇంకా బాగుంటాయి. ఇందులో వేయించిన డ్రైఫ్రూట్స్ పొడి కూడా కలపవచ్చు.

  వేరుశనగపప్పు, నువ్వులు వేయించి .. బెల్లం పాకం వేసి చిక్కీలు చేయవచ్చు. ఇలాంటివి పెద్దవాళ్ళు తయారుచేసి  పిల్లలకు  పంపవచ్చు.
..........................

 టీనేజ్ పిల్లలు తేలికగా స్వీట్ .... చేసుకోవాలంటే ఇలాగ చేయొచ్చు...... 

రెండు లేక మూడు టీ స్పూన్ల గోధుమపిండిని కొద్దినీటిలో కలిపి ఉండలు రాకుండా పొయ్యిపై జావలా కాచి కొద్దిగా  పాలు , కొద్దిగా నేయి, వేయించిన జీడిపప్పు కలిపి కొద్దిసేపు కాచితే చక్కటి పాయసం రెడీ అవుతుంది. అందులో  తరిగిన బెల్లాన్ని కానీ, పంచదార కానీ కలుపుకోవాలి.

దీనిని ఫ్రిజ్లో ఉంచి త్రాగితే చల్లగా బాగుంటుంది.

గోధుమపిండితో పాటు రెండు స్పూన్ల జొన్నపిండి కలుపుకుంటే మంచిది. అయితే ఎక్కువ స్పూన్ల పిండి కలిపితే మరీ చిక్కగా అయిపోతుంది. అప్పుడు మరిన్ని నీళ్లు, పాలు  కలుపుకోవాలి. ఇది  ఉత్తరాది వారు తయారుచేసే ఫిర్నీ వంటిది. 

 రాగి పిండి, జొన్నపిండి తో జావ  ... రెండు టీ స్పూన్ల  రాగి పిండిని రెండు టీ స్పూన్ల జొన్న పిండిని ఒక గ్లాస్ నీళ్ళు పోసి ఉండలు కట్టకుండా జావలా కాచి బెల్లం లేక పంచదార వేసుకుని త్రాగవచ్చు.ఇష్టమయిన వారు బోర్నవిటా వంటివి  కూడా కలుపుకోవచ్చు.

 రాగి పిండి, జొన్నపిండి తో  సూప్.... బాణలిలో ఒక స్పూన్   నూనె  లేక వెన్నవేసి,   సన్నగా తరిగిన క్యాబేజ్, క్యారెట్, ఉల్లి, పచ్చిమిర్చి ముక్కలు, కొద్దిగా మిరియాల పొడి  వేసి వేయించి అందులో   రెండు   టీ  స్పూన్ల  రాగిపిండి, రెండు టీ స్పూన్ల   జొన్నపిండి కలిపిన నీరు పోసి,  ఉప్పు వేసి  సూపులా కాచినా బాగుంటుంది. 

 సన్నగా  తరిగిన  కారట్, బీన్స్, ఆలు..వంటి  కూరగాయ ముక్కలను ఎక్కువగా  నీరుపోసి కుక్కర్లో  మెత్తగా  ఉడికించి, మెత్తగా మెదిపి  వడకట్టి.  ఆ రసాన్ని కూడా  సూప్ లో  వేసి కాచినా సూప్  బాగుంటుంది. 
 
*******************
కొబ్బరి పైన ఉండే పొట్టుతో సహా తింటే త్వరగా అరగదట.
పచ్చికొబ్బరి అయితే పై పొట్టును పీలర్ తో తేలికగా తీయవచ్చు.

 పచ్చికొబ్బరి చిప్పపైన తోలును పీలర్ తో తీసి.. కొబ్బరి ముక్కలు సన్నగా తరిగి.. అవి ఎండలో ఎండిన తరువాత డబ్బాలో నిల్వ చేసుకుని(ఫ్రిజ్లో కూడా పెట్టవచ్చు).. అవసరమైనప్పుడు వాటిని మిక్సీలో పొడి చేసుకుని వంటలో వాడుకోవచ్చు.

పచ్చికొబ్బరిని ఇడ్లిపాత్రలో కొద్దిసేపు వేడిచేసి, తరిగి, ఎండలోపెట్టి వాడుకుంటే చాలాకాలం నిల్వ ఉంటాయి.    లేదంటే, వేడినీటిలో కొబ్బరిచిప్పలను కొద్దిసేపు ఉంచి, తుడిచి ఎండలో పెట్టాలి. 

 

కొబ్బరి పొడి....కొబ్బరిని తురిమి లేక మిక్సిలో కొబ్బరి పొడి చేసి,  వేయించిన ఎండుమిరపకాయలు, కొద్దిగా చింతపండు, ఉప్పు, పసుపు, వేయించిన కరివేపాకు వేసి, మిక్సిలో మెత్తగా కొబ్బరి పొడి కొట్టుకోవచ్చు. కొబ్బరి పొడి పచ్చిపోయేవరకు కడాయిలో దోరగా వేయించి, చల్లారాక నిల్వచేసుకోవాలి.
................................
 
 కొన్ని వేపుడు కూరలు తక్కువనూనెతో మాడిపోకుండా చక్కగా ఉడకాలంటే, వాటిని కడాయిలో కొద్దిగా నూనెవేసి తిరగమోతవేసి, కూరగాయల ముక్కలు వేసి,  కొంత ఎర్రగా అయ్యేవరకు సగం వేయించాలి. 

 

అప్పుడు ఆ కూరను ఒక గిన్నెలో తీసి, కుక్కర్లో కొద్దిగా నీరుపోసి, ఈ కూరగిన్నెను కుక్కర్లో పెట్టాలి. గిన్నెపై మూతపెట్టక్కర్లేదు. కుక్కర్ మూతపెట్టి విజిల్ కూడా పెట్టి సుమారు మూడు విజిల్స్ వచ్చిన తరువాత పొయ్యి ఆఫ్ చేయాలి.

దొండకాయ త్వరగా వేగదు. దొండకాయ వేపుడు  ఇలా చేయొచ్చు. గుత్తివంకాయ కూర కూడా ఇలా చేయవచ్చు. పచ్చికూరగిన్నెను కుక్కర్లో పెట్టటం కన్నా, కొద్దిగా వేయించిపెడితే వేగిన రుచి వస్తుంది.మూత పెట్టకపోయినా కుక్కర్ నీరు గిన్నెలో పడదు. ఒకవేళ కొద్దిగా నీరు వస్తే, ఇంతకుముందు కూరవేపిన మూకుడులో ఈ కూరను వేసి ఒకనిమిషం వేయించితే నీరు పోతుంది.
 
దొండకాయ వేపుడుకు కొంచెం నూనె ఎక్కువవేసి, అడుగుభాగం మందంగా ఉన్న మట్టి మూకుడులో నిదానంగా వేయించినా చక్కగా వేగుతుంది.

 

పూజలలో అఖండదీపము పెట్టడానికి మందంగా ఉండే మూకుడు వాడతారు. అలాంటిది కొత్తది కొని కూరలు వండుకోవచ్చు.

 .................................................

 ఈ రోజుల్లో కొలతలతో స్పూన్లు అమ్ముతున్నారు. ఉప్పుజాడీలో అర టీస్పూన్ కొలత ఉన్న ప్లాస్టిక్ స్పూన్ వేసుకుంటే, కొన్నిసార్లు రుచి చూడకుండా కూడా,  కూరలో ఉప్పు సరిపోయేలా వేసుకోవచ్చు.

ఉదా..అరకిలో బీన్స్ కూరకు ఒకటీస్పూన్ ఉప్పు వేసి చూడండి. సరిపోతే ప్రతిసారి అలా వేయొచ్చు. 

అయితే, బీన్స్ లో కొబ్బరి పొడికానీ, ఉడికించిన పెసరపప్పు కానీ, తరిగిన ఉల్లిపాయ కానీ వేయించి వేస్తే, ఆ పరిమాణాన్ని బట్టి మరికొంచెం ఉప్పు కలుపుకోవచ్చు. టమేటో , చింతపండు , నిమ్మరసం పిండినా మరికొద్దిగా ఉప్పు వేసుకోవచ్చు.

....................................

రసం.. ...రెండు  లేక మూడు  మీడియం సైజ్ టమేటోలను మిక్సీలో మెత్తగా రుబ్బి,  రసాన్ని గిన్నెలో పోసి, అరలీటర్ నీటిని అందులో పోయాలి. అందులో కొద్దిగా(సగం నిమ్మకాయంత)   చింతపండు, ఒక టీస్పూన్ లేక ఒకటిన్నర టీస్పూన్ ఉప్పు, అర టీస్పూన్ మిరియాల పొడి, ఒక టేబుల్ స్పూన్ ధనియాలు..జీలకర్ర పొడి, ఒక పచ్చిమిర్చి, ఒక ఎండుమిర్చి, చిటికెడు బెల్లం, కొద్దిగా కొత్తిమీర వేయాలి.  ఒక టీస్పూన్ శనగపప్పు..కందిపప్పు వేయించి కొట్టిన పొడి వేయాలి. ఇవన్నీ వేసి ఐదు నిమిషాలు మరిగించి దించాలి.

చింతపండు బదులు నిమ్మరసం కూడా పిండవచ్చు.అలాంటప్పుడు, పొయ్యి బంద్ చేసాక ఒక నిమ్మకాయ రసాన్ని రసంలో పిండాలి. 

 చిన్న గిన్నెలో ఒకస్పూన్ నూనెవేసి వేగాక.. ఆవాలు, జీలకర్ర వేయించచాలి. ఇంగువ, చిటికెడు మెంతిపొడి, కరివేపాకు కూడా వేసి వీటిని ఎక్కువ వేపనక్కరలేదు. దించి రసంలో వేసి, రెండు నిమిషాలు కాచి దింపాలి. 
............
తిరగమోత ఆఖరికి కాకుండా, ముందే కూడా వేయవచ్చు. ముందే గిన్నెలో తిరగమోత వేసి, అందులో టమేటో గుజ్జు, నీరు, మిగతా దినుసులు అన్నీ వేసి కూడా కాచుకోవచ్చు.
.................

నేను రసంలో శనగపప్పు..కందిపప్పు వేయించిన పొడి వేసాను. ఇలా కాకుండా, అన్ని దినుసులతో చేసిన రసం పొడి వేయవచ్చు, కొద్దిగా ఉడికించిన కందిపప్పును మెత్తగా మెదిపి వేయవచ్చు లేదా ఉడికించిన పప్పు పైన నీటిని కలపవచ్చు....పప్పులపొడి ఎక్కువ వేస్తే పప్పు చారులా అయిపోతుంది కాబట్టి, రసంలో పప్పు ఎక్కువ వేయకూడదు.
..........................................
 కొబ్బరి ఎండబెట్టి పొడి, మిరియాలపొడి, ధనియాలు+జీలకర్ర వేయించిన పొడి, కందిపప్పు+పచ్చిశనగపప్పు వేయించిన పొడి, నువ్వులు వేయించిన పొడి, కరివేపాకు+పప్పులు వేయించిన పొడి..ఇలా కొన్ని పొడులు ముందే కొట్టి డబ్బాలలో ఉంచుకుంటే రోజూ అప్పటికప్పుడు కొట్టనవసరం లేదు.

 ................................

 రసం, సాంబారు, పులిహోర, పప్పుకూరలు, పులుసు, దప్పళం..లో తిరగమోతలో మెంతిపొడి కొద్దిగా పావుటీస్పూన్ వేస్తే బాగుంటుంది.ఎక్కువ వేయకూడదు. ఎక్కువవేస్తే కూర చేదు వస్తుంది.

................................. 

బూడిదగుమ్మడితో స్వీట్  చేస్తారు. మనకు బూడిదగుమ్మడి వడియాలు ఎక్కువ పడతారు. బూడిద గుమ్మడికాయ, కందిపప్పు వేసి పప్పు కూర కూడా చేసుకోవచ్చు. 

 

అయితే, బూడిదగుమ్మడిని సొరకాయలా ఎక్కువ వాడవచ్చో లేదో.. నాకు తెలియదు. బూడిద గుమ్మడి మెడిసిన్ లాంటిది కాబట్టి, వారానికి ఒకసారి అలా తినవచ్చు అనుకుంటున్నాను. మనలో ఎక్కువమంది తీపి గుమ్మడిని కూడా అప్పుడప్పుడు మాత్రమే వండుతాము. కర్ణాటక వాళ్లు బూడిదగుమ్మడి ముక్కల చెక్కుతీసి కొబ్బరి వేసి కూర వండుతారట.చెన్నైలో..  బూడిదగుమ్మడి, తీపి గుమ్మడి సన్నటి ముక్కలుగా కోసి బండి మీద అమ్ముతారు.( సాంబారు, అవియల్ లో వేస్తారేమో?)

 

బూడిదగుమ్మడి పచ్చిరసాన్ని అలాగే తాగకూడదన్నట్లు, ఆయుర్వేదం తెలిసిన వారు ఒకరు తెలియజేసారు.

...................

 ఒక కప్పు సోయా గింజలను 8 గంటలు నానబెట్టి , ఒక గ్లాస్ నీరుపోసి మిక్సిలో మెత్తగా రుబ్బాలి. దీనిని సన్నటి మంటపై సుమారు 2 లేక 3 నిమిషాలు వేడిచేసి, నిమ్మకాయ పిండితే విరిగినట్లు అవుతుంది. దీనిని వడపోసి నీటిని పిండి, గట్టిగా పనీరు ముక్కలు చేయవచ్చు.

 

 అలా ముక్కలు రానివాళ్లు, విరిగినదాన్ని అలాగే ఉడికించి టమేటో, గరం మసాలా వేసి కూర వండుకోవచ్చు.సోయాపన్నీరు లాగ ఇది ఇంకో రకం. మసాల వేయటం వల్ల సోయా వాసన ఉండదు. సోయా అప్పుడప్పుడు తింటే మంచిదట.

 ........................................

 అవకాడో చప్పగా ఉంటుందని కొందరంటారు. అవకాడో పండు బాగుంటుంది. ముక్కలు కోసి ఉప్పు, మిరియాలపొడి జల్లుకుని తింటే చాలాబాగుంటుంది.అవకాడోతో చేసే గ్వాకమొలె గ్వాకమోలె కన్నా చేయటం తేలిక. 

 

 

చావైనా, బ్రతుకైనా ప్లాస్టిక్ తోటే నా. ...?

పర్యావరణదినోత్సవం రోజున కొంతసేపు ప్లాస్టిక్ వంటి  వాటితో  కలుగుతున్న నష్టాల గురించి కొంతసేపు బాధపడుతూ చర్చలు జరుపుకోవటం, ఆనక  మళ్లీ మన  బ్రతుకులు మనం బ్రతకటం అలవాటయ్యింది. 


అయినా , ప్లాస్టిక్ వాడకం ప్రజలు మానేయాలంటే చాలా కష్టం కదా!   


ప్లాస్టిక్ సంచులు  బదులు కాటన్ సంచి వాడినంత మాత్రానా ప్లాస్టిక్ పోతుందా? 


 షాపింగ్ మాల్స్ లో  ఉప్పు, పప్పులు, అన్నీ ప్లాస్టిక్ కవర్లలోనే  నింపి  ఉంటాయి. 

  ఈ  విధంగా కూడా  ప్రతి ఇంటిలో నెలకు గుట్టలుగా ప్లాస్టిక్  ప్రోగుపడుతుంది.  


చాలా వస్తువులు  ప్లాస్టిక్తోనే తయారవుతున్నాయి. 

 ప్లాస్టిక్ నుంచి విడదీయలేనంతగా బ్రతుకులు మార్చుకున్నాము.

 ఇక చావైనా, బ్రతుకైనా ప్లాస్టిక్ తోటే.  


సెల్ఫోన్లతో  రేడియేషన్ ప్రమాదమున్నా చేయగలిగేది ఏం లేదు. 

  చాలామంది విషయంలో  చావైనా, బ్రతుకైనా సెల్ఫోనుతోటే. 


  వాతావరణం మారి పిడుగులు పడుతున్నా మనం చేయగలిగిందేమీ లేదు ..

అయ్యో ! ఇంతలా  పిడుగులు పడటమేమిటి ? అని ఆశ్చర్యపడటం తప్ప..


ప్లాస్టిక్ నేలలో కలవకుండా వందల ఏళ్లు ఉండిపోతుందట.


 మనం పోయినా..  మనం వాడిపారేసిన  ప్లాస్టిక్ సంచీలు  వందల ఏళ్లు  అలాగే  ఉండటం అంటే  ఎంతగొప్ప? అని సంబరపడదాము. 


ఇక ఇంతగా పొల్యూషన్ పెరిగితే భావి తరాల సంగతి ఏమిటంటారా? 

ఇప్పటి  తరాలు పొల్యూషన్ వల్ల  నాశనం కాకుండా మిగిలి  ఉంటేనే కదా ...భావితరాలంటూ ఉండేది...  

అయితే, అతిగా ఉండకూడదు....

ఆధునికకాలంలో కుటుంబవ్యవస్థలో ఎన్నో మార్పులు వచ్చాయి. విదేశాలవారికి కూడా కుటుంబపద్ధతులు ఉంటాయి. 


అయితే, ఆధునికకాలంలో కొన్ని విదేశాల్లో టీనేజ్ నుండే పిల్లలు చదువు, ఉపాధి కోసం తలీతండ్రి సపోర్ట్ లేకుండా తమసొంత ప్రయత్నాలు తాము చేసుకోవలసిన పరిస్థితి  ఉన్నది.


 ధన సంపాదన కష్టంగా మారిన ఈ రోజుల్లో టీనేజ్ పిల్లలు తమ చదువులకోసం, ఉపాధికోసం ప్రయత్నించే   సమయంలో ఎన్నో కష్టాలు పడే పరిస్థితి ఉండవచ్చు. అమ్మాయిల విషయంలో అయితే మరెన్నో కష్టాలు ఉంటాయి. 


భారతదేశంలో అయితే, పిల్లలు జీవితంలో చదువు, వివాహం  వంటి పరిస్థితి వరకూ కూడా తల్లితండ్రి అండగా ఉంటారు. 


అయితే, కొన్ని  విదేశాల్లో వలే  పిల్లలను  టీనేజ్లోనే వారి బ్రతుకు వారిని బ్రతకమని వదిలేయటం సరైనది కాదనిపిస్తుంది.


కొన్ని  విదేశాల్లో స్వేచ్చ మరీ ఎక్కువ. భారతదేశంలో ఆంక్షలు మరీ ఎక్కువ. రెండూ సరైనవి కాదనిపిస్తుంది. 

స్వేచ్చ కొంతవరకూ అవసరమే...అయితే,  అతిగా ఉండకూడదు.

ఆంక్షలు కొంతవరకూ అవసరమే... అయితే,  అతిగా ఉండకూడదు.

........................
 ఇక, విదేశాలకు వెళ్లిన భారతీయుల పిల్లల పరిస్థితి చూస్తే, దేశం కాని దేశంలో తమ బాధలు ఎవరికీ చెప్పుకోలేక,  చెప్పుకున్నా అర్ధం చేసుకునేవాళ్ళు లేక, తల్లితండ్రికి సరిగ్గా చెప్పలేక... పిల్లలు పడుతున్న బాధలు ఎన్నో ఉన్నాయి.

 ముఖ్యంగా మధ్యతరగతి, ఉన్నత మధ్యతరగతి వాళ్లు అప్పులు చేసి పిల్లలను విదేశాలకు పంపిస్తున్నారు. ఇలాంటి వారి పరిస్థితి కష్టంగా ఉంటుంది.

ఒక పక్క విపరీతంగా చదవవలసి ఉంటుంది.

 విదేశాల్లో  ధరలు ఎక్కువగా ఉంటాయి. వంట చేసుకోవడానికి సమయం సరిపోదు. ఇక వండుకునే ఓపిక లేక పిల్లలు  ఒక పూట తినీతినకా అలా ఉంటుంటారట.  

ఇంత కష్టపడి చదివినా ఉద్యోగం వస్తుందో రాదో తెలియదు. విదేశాల్లో అనారోగ్యం వస్తే మరింత కష్టం.

 ఉన్నత చదువులు చదవడానికి వెళ్లిన కొందరు పిల్లల పరిస్థితి చాలా బాధ కలిగిస్తుంది.

ఇలాంటి పరిస్థితిలో భారతదేశంలోని తల్లితండ్రులు పిల్లలకు ఇష్టం లేకపోయినా  వారిని  బలవంతంగా విదేశాలకు పంపడం చేయకూడదు.

విదేశాల్లో జీతాలు ఎక్కువగా వస్తాయని అనుకోవటమే కానీ, అక్కడ ధరలు చాలా ఎక్కువగా ఉంటాయి.

ఇండియాలో నెలకు లక్ష వచ్చినా ఇక్కడ ధరలు తక్కువ. విదేశాల్లో నెలకు నాలుగు లక్షలు జీతం వచ్చినా అక్కడ ధరలు బాగా ఎక్కువ. ఏదైనా ఒకటే.
............

 విదేశాల్లో స్థానికులకేమో తమ  ఉద్యోగాలు తమకు కాకుండా చేస్తున్నారని భారతీయులపై కోపం.

ఇండియాలోనే ఒకే రాష్ట్రం, ఒకే భాషవాళ్లు కూడా సర్దుకుపోలేక  మా ఉద్యోగాలు మాకే కావాలంటూ  విడిపోతున్నారు.

ఇక ఎక్కడో విదేశాల్లో వాళ్లు మా ఉద్యోగాలు మాకే కావాలి... అంటున్నారంటే ఆశ్చర్యం ఏముంది. 

 కొన్ని విదేశాల్లో కొందరు  పిల్లలకు పేరెంట్స్ సపోర్ట్ అంతగా ఉండదు. పిల్లలు ఉపాధి కోసం వాళ్ళ బాధలు వాళ్లు పడవలసి వస్తుంది.

 ఈ రోజుల్లో నిరుద్యోగసమస్య బాగా పెరిగింది. ఇలాంటప్పుడు భారతదేశం వంటి దేశాల నుంచి  వెళ్లి ఉపాధి పొందుతున్న వారి పట్ల కొన్ని సార్లు  నిరసన వ్యక్తమవుతోంది.

 ఎక్కడో ఇతరదేశాలనుంచి వచ్చి తమ ఉపాధికి అడ్దుపడుతున్నారనే అభిప్రాయం అక్కడి స్థానికులలో కలుగుతోంది.

ఇవన్నీ గమనిస్తే,  మన దేశాన్ని అభివృద్ధి చేసుకోవటం మంచిదనిపిస్తుంది.