స్థానికతను ఎలా నిర్ణయిస్తారో దయచేసి తెలియజేయండి .

వెనకటికి  ఒక  ఈగ  ఇల్లిల్లు  తిరుగుతూ  తన  పేరు  మర్చిపోయి  అందరిని  అడిగిందట.   బదిలీల  వల్ల  ఊర్లు  తిరిగే  మాకు   మా  సొంత  ఊరు  ఏదో     దయచేసి  చెబుతారా  ?

 ...............................

* మాకు రాష్ట్రంలోని అన్ని ప్రాంతాల లోనూ బంధువులున్నారు. మాది బదిలీలతో కూడిన ఉద్యోగము. ఈ బదిలీల వల్ల మంచీ ఉంది. చెడూ ఉందనిపిస్తుంది.

ఒకసారి బదిలీ వల్ల ఒక ప్రాంతానికి వెళ్ళాము. యధాప్రకారం చుట్టుప్రక్కల వారితో పరిచయాలు అయ్యాయి.

కొంతకాలం తర్వాత , ఒకరోజు మా పొరుగామె ఒకామె మా ఇంటికి వచ్చారు.

ఆమెతో నాకు మంచి స్నేహమే ఉంది. నాకన్నా వయసులో పెద్ద. అలా మాటల్లో ఇళ్ళ అద్దెలు, స్థలాల రేట్ల ప్రసక్తి వచ్చింది.

నేను, ఇక్కడ వాటి రేట్లు ఎలా ఉంటాయండి ? అని అడిగాను.

అంతే, అప్పటివరకు చక్కగా కబుర్లు చెబుతున్న ఆమె ఒక్కసారిగా .

* ఏం ? కొంటారా ? బదిలీపై వచ్చారు. అద్దెకుండి మీ పని అయ్యాక వెళ్ళిపొండి. అంతే. ఇక్కడ రేట్లతో మీకేం పని ?  అనేసింది.

నేను ఒక్క క్షణం బిత్తర పోయి, అబ్బే నేను కొనాలని అడగలేదండి. అన్నాను.

* నిజంగానే , నేను కొనే ఉద్దేశంతో అడగలేదు. నాకు అలా విషయసేకరణ చేయటం అలవాటు.విషయ పరిజ్ఞానం పెంచుకుందామని పనీపాటా లేక అలా అడిగానంతే.

కానీ, ఆమె ముఖం మీదే అలా అనేస్తుందని అనుకోలేదు.

 ఇంకొకామె   ఇతరప్రాంతం   వాళ్ళు   తమ  ప్రాంతానికి  వచ్చి స్థిరపడుతున్నారని   వారిని  తిట్టారు. 


ఇతర ప్రాంతాల నుంచీ వలసలు మితిమీరి పెరిగితే స్థానికులు ఆందోళన పడటం , వలసలవల్ల తమకు ఉపాధి అవకాశాలు తగ్గుతాయని భయపడటం జరుగుతుంది.


* ఈ భయం ప్రపంచవ్యాప్తంగా ఉంది. అందుకే  ఎక్కడివాళ్ళు అక్కడే జీవించటం వల్ల ఇలాంటి గొడవలు తగ్గే అవకాశం ఉంది  అనిపిస్తుంది. 


సరే, అప్పుడు వాళ్ళు నాతో అలా అన్నందుకు నాకు బాధతో పాటు ఆశ్చర్యము,    ఎన్నో   ఆలోచనలు కూడా కలిగాయి.

* ఎందుకంటే , నన్ను అలా అడిగిన   వాళ్ళ యొక్క   పిల్లలు,  బంధువులు ..   ఇతర ప్రాంతాలలోనూ, రాష్ట్రాల్లోనూ,   ఇతరదేశాల్లోనూ  ఉద్యోగ, వ్యాపార రీత్యా ఉంటున్నారు.

వారు అక్కడ ఆస్తులూ కొనుక్కుంటున్నారు.

అలాంటప్పుడు ఆమె నన్ను అలా అడగటం న్యాయమా?

* కొందరు తమకొక నీతి ఇతరులకు ఒక నీతిగా ప్రవర్తిస్తుంటారు.

* మా ఊరు ఎవరూ రాకూడదు అనేవారు ఇతరుల ఊళ్ళు కూడా వెళ్ళకూడదు కదా !

* అయినా ఆమె నన్ను పరాయి ప్రాంతం వాళ్ళగా భావించింది కానీ, మాకు ఆ ప్రాంతం వారితో వివాహబంధుత్వాలు కూడా ఉన్నాయి.

* మాకు రాష్ట్రంలోని నాలుగు ప్రాంతాల్లోనూ బంధువులు, ఆత్మీయులు ఉన్నారు.

......................................... 

భార్యా భర్తలు వేరేవేరే ప్రాంతాలకు చెందిన కుటుంబాల్లో ఈ స్థానికత అనే విషయాలపై అపార్ధాలు కూడా చోటుచేసుకుంటున్నాయి.
.............................

*  విదేశాలకు  వెళ్తే  స్థానికులు .. వలసదారులు  అనే  తేడా  ఉందంటే  ఆశ్చర్యం  అనిపించదు.  స్వదేశంలోనే  వలసదారులు.. దోపిడిదారులు..  అంటుంటే  ఎంతో  అవమానంగా,  బాధగా  ఉంది.

 *   స్థానికులు..వలసవాదులు ...  అంటూ  ఉద్యమాలు  చేస్తున్న  స్టూడెంట్స్   భవిష్యత్తులో ఉద్యోగాలు ,  వ్యాపారాలు కొరకు ఇతర రాష్ట్రాలు,  దేశాలు  వెళ్ళకుండా ఉంటారా ?

 బదిలీలవల్ల   మనకు ఇష్టం ఉన్నా లేకపోయినా ఇతర ప్రాంతాలకు వెళ్ళవలసి వస్తుంది.
............................ 

*  మేధావులు ఇవన్నీ ఆలోచించి కొన్ని ఊళ్ళు   ఒక ప్రాంతంగా  నిర్ణయించి (  జోనల్  సిస్టం లా )..ఇక అక్కడి వాళ్ళు బయటికి పోకుండా అక్కడనే జీవించేటట్లూ ఉపాధి అవకాశాలు కల్పించాలి.

బదిలీలు కూడా ఆ పరిధిలోని ఊళ్ళలోనే జరగాలి.

* ఇదంతా సంకుచితతత్వం అంటే నేనేమీ చెప్పలేను. గొడవలు రాకుండా ఉంటాయని ఇలా చెబుతున్నాను.

బదిలీల   ఉద్యోగాలు   చేసేవారు  ఆస్తిపాస్తులను  కొనుక్కోవాలన్నా   ఎక్కడ  కొనాలనే  సమస్య  ఎదురవుతుంది.  

* ఇది మన రాష్ట్రం అనుకునేంతలో మీ రాష్ట్రం కాదంటున్నారు. మన ప్రాంతం అనుకుంటే  మీ  ప్రాంతం కాదంటున్నారు. ఇలాంటి   పరిస్థితిలో   స్థానికత   గురించి  అయోమయంగా  ఉంటుంది .

.......................... 

*    స్థానికతను   భాష  ఆధారంగా   కూడా   నిర్ణయిస్తారని  ఇంతకుముందు  అనుకునేవారం.  ఒకే  భాష  వాళ్ళ  మధ్య    కూడా  స్థానికులు..వలసవాదులు  అనే  తేడాలు  వచ్చిన  ప్రస్తుత  పరిస్థితిలో  అసలు స్థానికత అంటే ఏమిటో తెలియటం  లేదు.

* చదివిన ప్రాంతం ఆధారంగా స్థానికత నిర్ణయిస్తారని కొందరు  అంటున్నారు. 

అలా  అయితే,  బదిలీల వల్ల  ఒకే ఇంట్లోని కుటుంబసభ్యులు వేరేవేరే ప్రాంతాల్లో చదివితే .... ఒకే ఇంట్లో కుటుంబసభ్యులు వేరేవేరే ప్రాంతాలకు చెందే అవకాశం ఉంది  కదా !

ఏమిటో..స్థానికత  విషయం   ప్రస్తుత పరిస్థితిలో గందరగోళంగా  ఉంది .
............................. 

* మేము  ఇక్కడ  స్థానికులం  అని    మనము,  మన  తరువాతి  తరాల  వాళ్లు  కూడా  చెప్పుకుని  ప్రశాంతంగా  జీవించాలంటే  అసలు  స్థానికత  అనేది  ఎలా  నిర్ణయిస్తారో  తెలియాలి. 

*  స్థానికత అనే విషయం గురించి మేధావులు గట్టిగా ఆలోచించి  దయచేసి    తెలియజేయండి .