మూడు చేపల కధ లా .............మనుషుల ఆలోచనా విధానాలు.

 

ఒక గ్రామంలో నీరు సమృధ్ధిగా ఉన్న ఒక చిన్న చెరువు ఉండేది. అందులో మూడు చేపలు కూడా నివసించేవి. అవి స్నేహంగా ఉండేవి.


ఇలా ఉండగా వేసవి కాలం సమీపించింది. ఎండలకు చెరువులో నీరు క్రమంగా తగ్గసాగింది.

ఒక రోజు కొందరు వ్యక్తులు వచ్చి, చెరువును పరిశీలించి .............. మరి కొన్ని రోజులు గడిస్తే నీరు మరింత తగ్గుతుందనీ...............అప్పుడు చేపలు పడితే బోలెడంత లాభం వస్తుందని చెప్పుకుని ............ మరికొన్ని రోజులు పోయాక వద్దామని అనుకుని వెళ్ళిపోతారు.


ఈ మాటలన్నీ మొదటి చేప విన్నది. దానికి పరిస్థితి అర్ధమయ్యింది.

అక్కడే ఉంటే ప్రమాదమని భావించి మిగతా రెండు చేపలను పిలిచి విషయం చెప్పింది.

ఆ చెరువుకు కొన్ని చిన్న కాలువలు ఉన్నాయి. వాటి ద్వారా వెళ్తే ఇంకో పెద్ద చెరువుకు చేరుకోవచ్చు.


*అలా వెళ్ళి ప్రాణాలు కాపాడుకుందామని మొదటి చేప మిగతా రెండు చేపలకు చెబుతుంది.............. అయితే మిగతా రెండు చేపలు ఈ విషయాన్ని సీరియస్ గా తీసుకోవు.


*ఇదంతా విని రెండవ చేప........ ఏమంటుందంటే ....... పరిస్థితి అంతదాకా వస్తే అప్పుడు చూసుకుందాములే అని వెళ్ళిపోతుంది.

*మూడో చేప.......... ఆ జాలరి వాళ్ళు మళ్ళీ రారు. ఇదంతా అనవసర భయం......... అంతా చాదస్తం అని విసుక్కుని కులాసాగా తిరగటానికి వెళ్ళిపోతుంది.


*ఇక చేసేదేమీ లేక మొదటి చేప.......... ఆ కాలువల ద్వారా బయలుదేరి పెద్ద చెరువుకు వెళ్ళిపోతుంది.

ఎందుకంటే ఆలస్యం చేస్తే ఎండలు పెరిగి కాలువలు కూడా ఎండిపోతే పెద్ద చెరువుకి వెళ్ళటానికి దారి మూసుకుపోతుంది కాబట్టి.


కొన్ని రోజులు పోయాక జాలరి వాళ్ళు వచ్చి వలలు వేసి చేపలను పట్టుకుంటారు. ఈ రెండు చేపలు కూడా ఆ వలలో చిక్కుతాయి.

జాలరులు చేపలను వలలో నుంచి తీసి ఒడ్డున వేస్తుంటారు.

ఈ రెండో చేప........... అప్పటికఫ్పుడు ఆలోచించి చచ్చిన దానిలా కదలకుండా ఒడ్డున పడిఉంటుంది.

జాలరులు ఆ చేప చనిపోయిందని భావించి ........ ఇక ఎక్కడికి పోతుందిలే అనుకుని దానిని పెద్దగా పట్టించుకోరు. అప్పుడు ఆ రెండో చేప నెమ్మదిగా నీటిలోకి జారిపోతుంది.


* చావుతప్పి కన్ను లొట్టపోయినట్లుగా ఆ రెండవ చేప.......... అప్పటికి తప్పించుకుంటుంది.

అయితే ఇంకోసారి జాలర్లు వస్తే మాత్రం దాని పరిస్థితి చెప్పలేము. ఇప్పుడు అది ఏమనుకుంటుందంటే ..............మొదటి చేప చెప్పినట్లు విని తాను కూడా ముందే పెద్ద చెరువుకి వెళ్ళిపోతే ఎంతో బాగుండేది కదా ! అని బాధపడుతుంది.


ఇప్పుడు వెళ్ళటానికి దానికి దారి లేదు. ఎందుకంటే ఆ పెద్ద చెరువుకి వెళ్ళే కాలువల్లో నీళ్ళు ఎండిపోయాయి.


ఇక మూడో చేప వలలో పడ్డాక ఏమి చేయాలో తెలియక ప్రాణ భయంతో ఎగిరెగిరి పడుతుంటే జాలరులు కర్రతో ఒక దెబ్బ వేసి దానిని చంపేస్తారు.

*పాపం మూడో చేప ........... కధ అలా అర్ధంతరంగా ముగిసిపోయింది.

మనుషులలో కూడా ఇలా రకరకాల స్వభావాల వాళ్ళు ఉంటారు.

*ఒకోసారి ఒకే మనిషిలో............ మూడు చేపల స్వభావాలు కూడా ఉండొచ్చు.

అంటే ఒక విషయములో ఎంతో ముందు చూపుతో తెలివిగా ప్రవర్తించిన వ్యక్తే ......... ఇంకో విషయములో తెలివితక్కువగా ప్రవర్తించవచ్చు.

ఇలా ఎందుకు జరుగుతుందో తెలియదు. అలా జరగటాన్ని తలరాతగా చెప్పుకోవచ్చేమో !

*అందుకే మన ఆలోచనలు ఎప్పుడూ సరిగ్గా సాగాలని దైవాన్ని ప్రార్ధించాలి...

( ఈ కధ గుర్తుంది గానీ చేపల పేర్లు అవి సరిగ్గా గుర్తు లేవండి. ఎప్పుడో చదివిన కధ..... .మొదటి చేప పేరు,.........దీర్ఘదర్శనుడు, రెండవ దాని పేరు.....ప్రాప్తకాలజ్ఞుడు ఇలా ఏవో పేర్లున్నాయండి..)..