కొన్ని ఆహార విషయాలు... రెండవ భాగం...

ఇక స్నాక్స్ విషయానికొస్తే , 

పకోడి...  సెనగపిండిలో   చాలా  కొద్దిగా  బియ్యపు పిండి, ఉల్లి, పచ్చిమిర్చి ముక్కలు కలిపి పకోడీ వేయటం కూడా తేలికే. ఉల్లిముక్కలు తిననివారు సన్నగా తరిగిన క్యాబేజ్ ముక్కలు, పచ్చిమిర్చి   వేసి పకోడి వేసుకోవచ్చు.

పకోడి కోసం కలిపే పిండిలో ఎక్కువ నీరు పోయకూడదు. ఎక్కువ నీరు పోస్తే నూనె బాగా పీల్చుకుంటుంది.  తక్కువ నీటితోనే  పిండి కలపాలి.  

......

 మసాలా వడ...పచ్చిశనగపప్పు నానబెట్టి..నీరు అసలు పోయకుండా  పప్పును కచ్చపచ్చగా రుబ్బుకుని , కొత్తిమీర, పుదీనా, ధనియాలపొడి, అర  టీ  స్పూన్   అల్లంవెల్లుల్లి ముద్ద , కొంచెం గరం మసాలాపొడి వేసి కలిపి మసాలా వడలు వేసుకోవచ్చు.  ఈ మసాలా వడలు  నూనె ఎక్కువగా పీల్చవు.

 దోసె....

ఒక గ్లాస్ మినప్పప్పు, రెండు గ్లాసుల బియ్యం, ఒక టీ స్పూన్ మెంతులను పగలు 6 గంటలు   నానబెట్టి, సాయంత్రం  రుబ్బి,  రాత్రంతా పులవనిచ్చి , ఉదయం  దోసెలు వేసుకోవచ్చు. 

ఊల్లిముక్కలు, పచ్చిమిర్చి...  దోస పైన వేసి కాల్చుకోవాలి.

........

పెసరట్టు...   ఒక గ్లాసు పెసలను  రాత్రంతా నానబెట్టి, కొద్దిగా పచ్చి మిర్చి, అల్లం,  ఉప్పు..  మిక్సీలో రుబ్బి  అట్లు  వేసుకోవచ్చు.  

. పెసరట్టు పిండిని.. మినపట్టు పిండిలా పులవబెట్టకూడదు. పెసరట్టు పిండిని రుబ్బిన వెంటనే దోసెలు వేసుకోవాలి. పిండి మిగిలితే వెంటనే ఫ్రిజ్లో పెట్టుకోవాలి. 


పెసరట్టు పిండిలో  రెండు టీ స్పూన్ల బియ్యం పిండి  కలిపితే కరకరలాడుతాయని అంటారు . పెసరట్టు పల్చగా వేసుకుంటే కరకరలాడుతూ వస్తుంది .

ఊల్లిముక్కలు, పచ్చిమిర్చి, కొత్తిమీర,  జీలకర్ర....దోస పైన వేసి కాల్చుకోవాలి. 

బయట ఫుడ్ ఎక్కువగా తినకుండా ,అప్పుడప్పుడు అయినా  కొంచెం ఓపికతో ఇంట్లో చేసుకుంటే అనారోగ్యం రాకుండా బాగుంటుంది. 

**************

1.  ఇడ్లీలోకి, దోసెలకు పచ్చడి... చిన్నగా తరిగిన పచ్చికొబ్బరి ముక్కలు, వేయించిన పచ్చిమిర్చి ముక్కలు,  వేయించిన శనగపప్పు( పుట్నాల పప్పు) కానీ,  వేయించిన  వేరుశనగపప్పు కానీ  తీసుకుని, ఉప్పు కూడా  మిక్సీలో  వేసి  మెత్తగా పేస్ట్ చేసుకోవాలి. బాణలిలో పోపు వేయించి , పైన  పచ్చడిలో కలుపుకుంటే ఇడ్లీలోకి, దోసెలకు పచ్చడి తయారవుతుంది.

2.ఇడ్లీలోకి, దోసెలకు పచ్చడి... బాణలిలో నూనెలో వేసి, అందులో  ఒక తరిగిన ఉల్లిపాయ ముక్కలు, ఒక టమేటో ముక్కలు, కొద్దిగా వేరుశనగపప్పు, కొద్దిగా చింతపండు, కొద్దిగా కరివేపాకు, కొన్ని వెల్లున్ని  రెబ్బలు, ఉప్పు, పసుపు, కొన్ని ఎండుమిరపకాయలు, పచ్చిమిరపకాయలు..ఇవన్నీ నూనెలో  కొద్దిసేపు వేయించి , మిక్సీలో మెత్తగా పచ్చడి చేసుకుంటే ఇడ్లోకి, దోసెలకు ,  ఈ పచ్చడి కూడా  వేసుకోవచ్చు.

**********************

 సొరకాయ గింజల పచ్చడి ... సొరకాయ{ ఆనపకాయ } లేత  గింజలు ఉంటే  గింజలు తీసి పచ్చడి చేసుకోవచ్చు.  సొరకాయ  గింజలు, మిర్చి, చింతపపండు, ఉప్పు, పసుపు, టమేటో , కరివేపాకు, కొత్తిమీర..అన్నీ బాణలిలో వేయించి , మిక్సీలో మెత్తగా రుబ్బి పోపు పెట్టుకుంటే సొరకాయ గింజల పచ్చడి. తయారవుతుంది. సొరకాయలో మిగతా భాగం కూర వండుకోవచ్చు.

*************************

మామూలుగా అరకప్పు బియ్యం ఒక మనిషికి సరిపోతుందట. 

ఉప్మా కు కూడా అరకప్పు రవ్వ ఒక మనిషికి లెక్క.

అంటే, నలుగురు మనుషులుంటే నాలుగు అరకప్పులు అంటే రెండు కప్పుల రవ్వ   సరిపోతుంది. 

అయితే,  తినే వారి అలవాటును బట్టి కొంచెం ఎక్కువ, తక్కువా తీసుకోవచ్చు.

*********************

పప్పుల పొడి..... బాణలిలో కొంచెం మినప్పప్పు, కొంచెం కందిపప్పు, కొంచెం నువ్వులు, కొంచెం జీలకర్ర  విడివిడిగా వేయించుకుని తీసి   ప్రక్కన పెట్టుకోవాలి. 

బాణలిలో  కొద్దిగా  నూనె వేసి, అందులో  ఎండుమిరపకాయలు, కరివేపాకు  వేసి వేయించుకోవాలి.  పైన వేయించుకున్న పప్పులు, ఎండుమిరపకాయలు, కరివేపాకు,  వేయించిన శనగపప్పు ( పుట్నాల పప్పు ) ,  ఉప్పు, వెల్లుల్లి ....ఇవన్నీ పొడి కొట్టి పిల్లలకు పంపిస్తే వేడి అన్నంలో నేయి వేసుకుని తినవచ్చు. ఇడ్లీలో , దోసెల్లో తినవచ్చు. 

ఈ పొడిని వేపుడు కూరల్లో కూడా వేసుకోవచ్చు. కూరల్లో వేసి కొన్ని నీరు పోసుకుంటే గ్రేవీ కూర  కూడా తయారవుతుంది.  ఇష్టమున్నవారు   పొడిలో  ఎండుకొబ్బరి కూడా వేసుకోవచ్చు.  

******************************

 పిల్లలకు....    పెసలు, వేరుశనగపప్పు, శనగలు, రాగులు, బొబ్బర్లు.. ..వంటి రకరకాల గింజలను  తెచ్చి   రాత్రి పూట నానబెట్టి   ఉదయాన్నే అల్పాహారంలా తినవచ్చు. 

అందులో కొంచెం కొత్తిమీర, పుదీనా, కీరదోసముక్కలు, నిమ్మరసం, ఉల్లిముక్కలు వేసుకోవచ్చు.

లేకుంటే,  నానబెట్టిన  గింజలను  కుక్కర్లో ఉడికించి , గుగ్గిళ్లలా తినవచ్చు. 

ఇందులో  కొంచెం కొత్తిమీర, పుదీనా, కీరదోసముక్కలు, నిమ్మరసం, ఉల్లిముక్కలు వేసుకోవచ్చు.

పాతకాలంలో  నూనెవంటలు ఎప్పుడో పండుగల్లో వండుకునేవారట. 

పాతకాలంలో  గుగ్గిళ్లను ఎక్కువగా తినేవారట.  . ఈ కాలంలో శారీరికశ్రమ తగ్గి, తిన్నది   అరగటం లేదు కాబట్టి,  గుగ్గిళ్ళ్ను  కొద్ది మొత్తంలో తినవచ్చు.

 

 

పెసలు, శనగలు అన్నీ నానబెట్టినవి అమ్ముతున్నారు . 

అయితే, బయటవాళ్ళు నానబెట్టటం కాకుండా,   రకరకాల గింజలను కలిపి చిన్నప్యాకెట్లలో అమ్మితే, ఇంటికి తెచ్చి నానబెట్టుకోవచ్చు.  

**********************
ఉలవలను నానబెట్టి, కుక్కర్లో ఎక్కువసేపు ఉడికించాలి. తరువాత  చారులా చేయవచ్చు. 

లేదంటే ఉలవచారు బయట అమ్మేవి తెచ్చుకోవచ్చు. ఉలవలు ఆహారంలో తీసుకోవటం మంచిది. 

*********************

ఇక డ్రైఫ్రూట్స్ సంగతి తెలిసిందే. రోజూ కొద్దిగా తినవచ్చు. ఏదైనా,  ఎవరి అరుగుదలను బట్టి వారు తీసుకోవాలి.